Tag: سونیا ہتھنی

کراچی: سونیا ہتھنی کی موت کے حوالے سے انکشاف ہوا ہے کہ اس کی موت بیکٹیریا کی وجہ سے ہوئی۔

تفصیلات کے مطابق کراچی کے سفاری پارک میں مرنے والی ہتھنی سونیا کے حوالے سے جانوروں کے لیے کام کرنے والی بین الاقوامی تنظیم فور پاز نے اپنی ویب سائیٹ پر اہم انکشاف کیا ہے۔

فور پاز کے مطابق سونیا ہتھنی کی ابتدائی پوسٹ مارٹم رپورٹ میں جسم میں بیکٹیریا کی موجودگی کا انکشاف ہوا ہے، پوسٹ مارٹم رپورٹ میں سونیا کے پاؤں میں موجود پرانا پھوڑا بیکٹیریا کی بنیادی وجہ بتائی گئی ہے۔

فور پاز کا کہنا ہے کہ پھوڑے کے باعث شدید بیکٹیریل انفیکشن سونیا ہتھنی کے لیے جان لیوا ثابت ہوا، تنظیم نے یہ بھی کہا کہ ہتھنی سونیا اور نور جہاں کی موت غیر موزوں ماحول اور ناکافی نگہداشت کا نتیجہ ہیں۔

سفاری پارک میں ’سونو‘ نامی ہتھنی مرگئی

تنظیم فور پاز کا کہنا ہے کہ ہاتھیوں کی صحت کے لیے مناسب دیکھ بھال اور غذا نہایت ضروری ہے۔

واضح رہے کہ 8 دسمبر کو سونیا عرف سونو کراچی کے سفاری پارک میں اچانک مر گئی تھی، پارک انتظامیہ کا کہنا تھا کہ ہتھنی سونو صحت مند تھی، کھانا پینا بھی جاری تھا لیکن جب عملہ صبح سفاری پارک پہنچا تو ہتھنی کو مرا ہوا دیکھا۔

اس سے قبل کراچی چڑیا گھر کی علیل ہتھنی ’نور جہاں‘ 17 سال کی عمر میں 3 سال قبل مر گئی تھی، نور جہاں عرصہ دراز سے علیل تھی، تاہم 13 اپریل کو چڑیا گھر کے تالاب میں گِرنے کے بعد سے وہ اپنے پیروں پر کھڑی نہیں ہو سکی تھی۔