اسلام آباد : سپریم کورٹ کا آئینی بینچ فوجی عدالتوں میں سویلین ٹرائل سے متعلق درخواست پر نو دسمبر کو سماعت کرے گا۔
تفصیلات کے مطابق سپریم کورٹ آئینی بینچ نے فوجی عدالتوں میں سویلین ٹرائل سے متعلق درخواست سماعت کیلئے مقرر کردی۔
جسٹس امین الدین کی سربراہی میں چھے رکنی آئینی بینچ نو دسمبر کو سماعت کرے گا، جسٹس جمال خان مندوخیل،جسٹس محمدعلی مظہر،جسٹس حسن اظہر رضوی،جسٹس مسرت ہلالی اور جسٹس نعیم اختر افغان بینچ کا حصہ ہوں گے۔
یاد رہے سپریم کورٹ نے فوجی عدالتوں میں سویلینز کے ٹرائل کیس میں سپریم کورٹ نے ملزمان سے غیرانسانی سلوک نہ کرنے کا حکم دیتے ہوئے کہا تھا کہ ملاقاتوں میں آئندہ تعطل نہیں ہوناچاہیے۔
جسٹس امین الدین خان کا کہنا تھا کہ زیر حراست افراد کی اہلخانہ سے ملاقات کیوں نہیں کرائی جا رہی؟ اٹارنی جنرل نے عدالت کے روبرو کہا متعلقہ حکام کو بتایا تھا کہ ملاقات کرانے کا حکم عدالت کا ہے، تسلیم کرتا ہوں کہ ملاقاتوں کا سلسلہ نہیں رکنا چاہیے تھا، آج دو بجے زیرحراست افراد کو اہلخانہ سے ملوایا جائے گا۔
