کراچی : متحدہ قومی موومنٹ پاکستان کے سربراہ ڈاکٹر محمد فاروق ستار نے کہا ہے کہ کراچی میں رہنے والا ایک ایک شہری اس شہر کو اپنا سمجھتے ہوئے اس کی تعمیر اور ترقی کے لیے ہمارے شانہ بشانہ کھڑے ہو۔

یہ اپیل انہوں نے پی آئی بی میں قائم اپنے عارضی دفتر پر میڈیا سے گفتگو کرتے ہوئے کہی، اس موقع پر انہوں نے کراچی کی تعمیر اور ترقی کے لیے سو دن کی خدمتی مہم کے آغاز کا بھی اعلان کیا۔

اسی سے متعلق : عوامی رابطہ اورسو دن کی خدمتی مہم کا آغاز کریں گے،فاروق ستار

سو دن کی خدمتی مہم کی تفصیلات بتاتے ہوئے انہوں نے بتایا کہ میئر کراچی وسیم اختر کی سربراہی میں کل سے چار اضلاع کی 20 مختلف یو سیز میں سڑکوں کی مرمت، کچرا اُٹھانے اور صفائی و ستھرائی کی مہم شروع کر رہے ہیں جس میں شہریوں اور مخیر افراد سے اپنا حصہ ڈالنے کی اپیل کرتے ہیں۔

ڈاکٹر فاروق ستار نے شکوہ کیا کہ بلدیہ عظمی کراچی کو اختیارات دینے کے بجائے سندھ حکومت انتظامی ادارے بھی چھین رہی ہے اور فنڈز منجمد کر رکھے ہیں اس کے باوجود ایم کیو ایم پاکستان اپنی مدد آپ کے تحت شہر کراچی کے مسائل کو حل کرنے کی بھرپور کوشش کر رہی ہے۔

ایم کیو ایم کے سربراہ کا کہنا تھا کہ کراچی شہر سب کا ہے اس لیے ہر طبقے اور قومیت سے تعلق رکھنے والے افراد کو اس مہم میں ہمارا ساتھ دینا چاہیے اور ہمارے شانہ بشانہ شہر کی صفائی و ستھرائی کا کام کرنا چاہیے۔

یہ بھی پڑھیں : اختیارات محدو صحیح، عزائم لا محدود ہیں، وسیم اختر

انہوں نے کراچی کے شہریوں سے درخواست کی ہے کہ اس مہم میں ہمارا ہاتھ بٹائیں اور شہر کی بہتری و ترقی کے لیے اپنا حصہ ضرور ڈالیں۔

واضح رہے کہ گزشتہ روز میئر کراچی وسیم اختر نے پریس کانفرنس کے ذریعے اپنے سو دن کے منصوبے اور اہداف کا اعلان کیا تھا فنڈز کی قلت کے باعث اپنی مدد آپ کے تحت شروع کیے جانے والے اس منصوبے میں ابتدائی طور پر 15 سے 20 یوسیز کو رول ماڈل بنانے کے لیے چُنا گیا ہے مہم کی کامیابی کے بعد اس منصوبے کو دیگر یوسیز تک پھیلایا جانا ہے۔

کراچی : ایم کیو ایم پاکستان کے سربراہ ڈاکٹر فاروق ستار نے کہا ہے کہ عوامی رابطہ مہم کے آغاز کا فیصلہ کرلیا ہے جب کہ منتخب اراکین صوبائی اور قومی اسمبلی اور لوگل گورنمنٹ کے نمائندے سو دن کی خدمتی مہم چلائیں گے۔

فاروق ستار پی آئی بی میں واقع عارضی مرکز پر پریس کانفرنس سے خطاب کررہے تھے انہوں نے کہا کہ 23 اگست کو کیا گیا اقدام مہاجر قوم کو متحد رکھنے کے لیے اُٹھایا گیا تھا اور آج بھی گراؤنڈ پر متحد و منظم کھڑے ہیں اور اب بھرپورعوامی رابطہ مہم کا آغاز کرنے جا رہے ہیں اس لیے عوام اور کارکنان پریشان نہ ہوں ہماری آئینی اورسیاسی جدو جہد جاری ہے اور رہے گی۔

انہوں نے اعلان کیا کہ ایم کیو ایم پاکستان کراچی میں بھرپور طاقت کا مظاہرہ کرتے ہوئے عوامی رابطہ مہم پر گلی گلی اور محلے محلے جائے گی،اپنے ووٹرز سے رابطہ کسی طور نہیں توٹنے دیں گے اس لیےعوام اورکارکنان سے کہوں گا کہ پریشان ہونے کی ضرورت نہیں ہے،ہم گراؤنڈ پر کھڑے ہیں اور جلد آپ کے مسائل کے حل کے لیے آپ کے دروازے پر ہوں گے۔

انہوں نے مزید بتایا کہ منتخب اراکین قومی و صوبائی اسمبلی اور لوگل گورنمنٹ نمائندے سو دن کی خدمتی مہم کا آغاز کریں گے جس کی تفصیلات سے اراکین اسمبلی خود ایک دو دن میں پریس کانفرنس کے ذریعے میڈیا کو آگاہ کریں گے،اس مہم کے دوران عوام کے بلدیاتی مسائل حل کیے جائیں گے اور صفائی ستھرائی،پانی کی کمی،سیوریج کے نظام کی بہتری سمیت دیگر شکایات کا ازالہ کیا جائے گا۔

فاروق ستار نے پریس کانفرنس میں بلدیاتی نمائندوں کو اختیارات اور فنڈز کی کمی کا ذکر کرتے ہوئے کہا کہ پورے ملک کو سب سے زیداہ ریونیو دینے والا شہر بے یار و مددگار ہے لیکن ہم کراچی،حیدر آباد اور میر پورخاص کو لاوارث نہیں چھوڑیں گے اور ایم پی اے ،ایم این اے فنڈز سے علاقوں میں جو بن سکا ترقیاتی کام کروائیں گے۔

انہوں نے ایک بار پھر یہ وضاحت کی کہ ایم کیو ایم پاکستان میرے یعنی ڈاکٹر فاروق ستار کے نام سے الیکشن کمیشن میں رجسٹرد ہے اور ہم ہی ایم کیو ایم ہیں اس حوالے سے ایک دھڑے کا دعوی خود ساختہ اور بے بنیاد ہے۔

ڈاکٹر فاروق ستارکا کہنا تھا کہ یہ دھڑا قوم کو 22 اگست سے ہی منسلک رکھنا چاہتا ہے تا کہ متحد مہاجر قوم کا شیرازہ بکھر جائے اور قوم کو متحد و منظم کرنے کی ہماری کاوشیں دم توڑ جائیں گے۔

ایم کیو ایم کے سربراہ فاروق ستار نے شکوہ کیا کہ ہمارے منتخب نمائندوں کو دھمکیاں جا رہی ہیں،وفاداریاں تبدیل نہ کرنے پر گرفتاری اور چھاپوں کی دھمکی دی جاتی ہیں،ہمارے منتخب ضلعی چیرمین و وائس چیرمین،یونین کونسل چیرمین و وائس چیرمین اور کونسلرز پر کہیں سے استعفی دینے کی تو کہیں سے وفاداریاں دینے کی دھمکیاں دی جا رہی ہیں۔

آخر میں فاروق ستار نے کہا کہ ایم کیو ایم پاکستان کا ایک ایک کارکن گراؤنڈ پر موجود ہے اور نہ اپنی وفاداریاں بدلے گا نہ ہی استعفی دے گا بلکہ قوم کی خدمت کرنے کی جو روایات ہماری رہی ہیں اُن پر کاربند رہے گا۔