Tag: سپریم کورٹ

اسلام آباد: سپریم کورٹ نے فوجی عدالتوں سے سزائے موت پانے والے چارملزمان کی سزا کیخلاف درخواست سماعت کیلئے منظور کرلی۔

چیف جسٹس انورظہیرجمالی کی سربراہی میں لارجربنچ نے سپریم کورٹ میں فوجی عدالتوں سے سزائے موت پانے والے 16 ملزمان کی اپیلوں کی سماعت کاآغازکردیا جوروزانہ کی بنیاد پرکی جائے گی۔

سزائے موت کے ملزم حیدر علی اور قاری ظاہر کی جانب سے عاصمہ جہانگیر نے دلائل دیتے ہوئے کہا کہ فوجی عدالتوں میں ملزمان کو شفاف ٹرائل کا حق نہیں دیا گیا،انہوں نے کہا کہ فوجی عدالتیں صرف طریقہ کارکی ہی خلاف ورزی نہیں ہو رہی بلکہ وہاں کینگرو ٹرائل ہورہا ہے۔

کیس کی سماعت کے دوران چیف جسٹس کاکہناتھا کہ ملزم حیدر علی کے بیان سے واضح ہے کہ اس نے پاکستان کے خلاف جنگ میں دہشت گردوں کا ساتھ دیا، ملزم نے مانا کہ وہ بم دھماکوں کے پلاننگ میں شریک کار رہا پھر کس اعترافی بیان کی بات کررہی ہیں عاصمہ جہانگیر نے موقف اختیارکیا کہ وہ یہ دعوی نہیں کرتیں کہ ملزمان نے کچھ کیا یا نہیں لیکن قانون کے مطابق شفاف ٹرائیل کاشک وشبہ سے بالاترثابت ہونا ملزمان کاحق ہے۔

عدالت نے ان کی اس دلیل کوتسلیم کرتے ہوئے درخواست سماعت کیلئے منظور کرلی جبکہ دیگردوملزمان جن میں سے ایک پرملٹری چیک پوسٹ پرفائرنگ اورایک شخص کوزخمی کرنے کاالزام ہے اوردوسرے ملزم کے اے پی ایس واقعے میں ملوث ہونے کاالزام ہے کے کیس کی سماعت کی چوکی پرفائرنگ کے حوالے سے ملزم کے وکیل کاکہناتھا کہ ملزم نے فائرنگ نہیں کی بلکہ انھیں گاڑی سے اتارکراغواکرنے کی کوشش کی گئی جس سے دونوں کے درمیان تلخ کلامی ہوئی اورسرکاری اہلکار نے فائر کھول دیا جس میں ایک راہگیربھی زخمی ہوا۔

سرکاری اہلکارملزمان کواٹھا کرلے گئے جبکہ ان افرادکاپتہ اس وقت چلا جب ایک اخبارنے انھیں سزائے موت سنائے جانے کی خبرشائع ہوئی اس طرح جس ملزم پراے پی ایس واقعے میں ملوث ہونے کاالزام ہے وہ اپنی بیوی کے علاج کے سلسلے میں ہسپتال میں تھا اورموقع پرموجودنہیں تھا لیکن اسے شک کی بنا پراٹھا کرخفیہ مقدمہ چلا کرسزائے موت سنادی گئی, وقت ختم ہونے کے باعث سماعت منگل تک ملتوی کردی گئی۔

اسلام آباد: سپریم کورٹ نے دوہرے قتل کے ملزم سائیں داد کی سزائے موت ختم کرتے ہوئے اسے باعزت بری کردیا۔

ٹرائل کورٹ نے ملزم کو سزائے موت سنائی تھی جبکہ بلوچستان ہائی کورٹ نے ملزم کی سزائے موت عمر قید میں تبدیل کردی تھی ملزم سائیں داد پر غیرت کے نام پر شہر بانو اور نادر علی کو قتل کرنے کا الزام تھا۔

آج چیف جسٹس کی سربراہی میں تین رکنی بنچ نے ملزم کی سزائے موت و عمر قید کے خلاف اپیلوں کی سماعت کی ملزم کے وکیل صدیق بلوچ نے عدالت کو بتایا کہ وقوعہ کا کوئی چشم دید گواہ نہیں کسی نے قتل ہوتے نہیں دیکھا۔

ناکافی شواہد کی بنا پر ملزم کو سزائے موت یا عمر قید نہیں دی جاسکتی وکیل کے ان دلائل کی بمیاد پر عدالت نے غیرت کے نام پر قتل کا ملزم بری کر دیا۔

اسلام آباد: شیشہ کیفے پر پابندی کے باوجود حکومت شیشہ کیوں درآمد کر رہی ہے؟سپریم کورٹ نے جواب طلب کرلیا۔

تفصیالت کے مطابق گزشتہ سال نومبر میں سپریم کورٹ نے شیشہ کیفے کے خلاف کریک ڈاؤن کا حکم صادر کیا تھا جس پہ عمل کرتے ہوئے کراچی میں ڈیفینس ہاؤسنگ سوسائیٹی کے ایڈمنسٹریٹر نے 800 شیشہ حقوں کو روڈرولر کی مدد سے تباہ کر دیا گیا تھا،تاہم دیگرعلاقوں میں اس فیصلے پہ عمل درآمد نہیں ہو سکا تھا۔

سپریم کورٹ نے اپنے گذشتہ فیصلے میں مزید کہا تھا کہ شیشہ کیفے شیشہ کے ساتھ ساتھ دیگرنشہ آور چیزیں بھی بیچتے ہیں۔ جس سے نوجوان نسل تباہی کے دہانے پر پہنچ چکی ہےلیکن ضلعی انتظامیہ اس کے روک تھام میں سنجیدہ نظر نہیں آتے۔

تفصیلات کے مطابق آج سپریم کورٹ نے تمام صوبائی ایڈوکیٹ جنرلز سے شیشہ پر پابندی عائد کرنے کے فیصلے پر عمل درآمد کرانے کی رپورٹ طلب کی۔ حکومتی کارکردگی پر عدم اطمینان کا اظہار کرتے ہوئے سپریم کورٹ نے پوچھا کہ حکومت شیشہ کیوں در آمد کررہی ہے جبکہ شیشہ کیفے پر پابندی ہے؟

صوبائی ایڈوکیٹ جنرلز کی جانب سے ناکافی دلائل دینے پرعدالت نے برہمی کا اظہار کرتے ہوئے شیشہ کی درآمد پر پابندی عائد کرنے کا حکم صادر کردیا۔عدالت نے تمام صوبائ ایڈوکیٹ جنرلز کو انسداد تمباکو نوشی قانون پر سختی سے عمل در آمد کرا نے کی بھی ہدایات جاری کیں۔اورمفصل رپورٹ جمع کرانے کاحکم دیا۔

اسلام آباد: سپریم کورٹ کے جج نے کہا ہے کہ جب تک سندھ میں شاہ صاحب ہیں تب تک کوئی کام نہیں ہو سکتا۔

اراضی کاریکارڈ کمپیوٹرائز کرنے کے کیس میں سپریم کورٹ کےجج جسٹس امیر ہانی مسلم نے ریمارکس دیئے کہ جب تک سندھ میں شاہ صاحب ہیں تب تک کوئی کام نہیں ہو سکتا۔

عدالت کوبتایا گیا کہ پنجاب،بلوچستان اور خیبرپختونخوا میں لینڈ کمپیوٹرائزیشن کا نظام مکمل ہو گیا ہے اور سندھ میں معاملہ ابھی تکنیکی مراحل میں ہے۔

عدالت نے سندھ کاریکارڈ پیش نہ کرنے پر برہمی کا اظہار کرتے ہوئے کہا کہ عدالتی فیصلہ انتظامی پیچیدگیوں میں الجھا دیا جاتا ہے،عدالت نے حکم دیا کہ سندھ لینڈ کمپوٹرائزیشن جلد مکمل کرکے رپورٹ پیش کرے۔

اسلام آباد: چیف جسٹس انور ظہیر جمالی نے کہا ہے کہ ہمیں محدود وسائل میں رہتے ہوئے انصاف کی فراہمی کو یقینی بنانا ہوگا ،مقننہ نے اپنی بصیرت کے مطابق مسائل کے حل کے لیے اقدامات اٹھائے ہیں۔

چیف جسٹس انور ظہیر جمالی کا صوبائی انصاف کمیٹیوں کی کانفرنس سے خطاب کرتے ہوئے کہنا تھا کہ ہمارا فوجداری نظام دہشتگردی، تشدداوربدعنوانی کے چیلنجزسے نبردآزماہے، شعبہ انصاف سے وابستہ لوگوں کودائرہ اختیار اور دستیاب وسائل میں ہی مسائل کا حل نکالناچاہیے۔

انہوں نے کہا کہ انتظامیہ بھی محدودوسائل کے اس قسم کی دردناک صورتحال سے نبردآزماہے ،انصاف کی فراہمی یقینی بناناہماری ذمہ داری ہے، تاہم بلاشبہ سزاوں کی کم شرح ہمارے سب کے لئے باعث تشویش ہے، اس نہ صرف اداروں کی انفرادی کارکردگی پر بلکہ پورے عدالتی نظام پر منفی اثرات مرتب ہورہے ہیں۔

چیف جسٹس کا کہنا تھا کہ ہمیں اس بات کی فکر کرنی چاہیئے کہ ضرر رسیدہ افراد کو انصاف کی فراہمی میں بظاہر ہماری ناکامی نظام انصاف پر عوامی اعتماد کو بری طرح متاثر کرہی ہے اور عوام انصاف کیلئے دیگر ذرائع تلاش کررہے ہیں اور ننتیجتاَ مروجہ نظام عدل بے ثمر ہوتا جارہا ہے۔

ان کا مزید کہنا تھا مقننہ نے اپنی بصیرت کے مطابق مسائل کے حل کے لیے اقدامات اٹھائے ہیں۔یہ بھی ضروری ہے کہ ہم اپنے اداروں کے خصوصاخدمات کی فراہمی کی سطح پر قائدانہ صلاحیت پیدا کریں۔