لاہور: سپریم کورٹ لاہور رجسٹری میں کٹاس راج تالاب کیس کی سماعت ہوئی ، چیف جسٹس نے خشک کیے گئے کٹاس راج مندر کے تالاب کو ہر صورت پانی سے بھرنے کا حکم دے دیا۔
تفصیلات کے مطابق چیف جسٹس ثاقب نثار کی سربراہی میں دو رکنی بنچ نے لاہور رجسٹری میں کٹاس راج کیس سماعت کی۔ اس موقع پر چیف جسٹس نے سیمنٹ فیکٹریوں میں استعمال ہونے والے پانی کی تحقیقاتی رپورٹ بھی طلب کرلی ۔
سماعت کے دوران چیف جسٹس نے قرار دیا کہ اگر ٹینکروں کے ذریعے بھی پانی لے جانا پڑے تو مندر تک لے جا کر تالاب بھرا جائے۔ عدالت نے مزید ہدایت کی کہ ڈی سی چکوال آگاہ کریں کہ سیمنٹ فیکٹریوں نے اتنا پانی کہاں سے حاصل کیا؟۔
یاد رہے کہ دو روز قبل اسلام آباد میں ہونے والی سماعت میں چیف جسٹس نے انسانی حقوق کے ڈائریکٹر عامر سلیم رانا کو حکم دیا تھا کہ دیکھ کرآئیں کہ اصل پوزیشن کیا ہے۔عدالت کا کہنا تھا کہ عامر سلیم خود جاکر دیکھیں کہ پانی کے لیے کتنے بور کیے گئے ہیں اور ان کے پانی کے بل بھی لے کر آئیں۔
ساتھ ہی ساتھ چیف جسٹس نے عدالتی کمیشن کو موقع کا وزٹ کرنے کا حکم دیتے ہوئے کہا تھا کہ سیشن جج چکوال بھی کمیشن کے ساتھ جائے، اگر کوئی مزاحمت کرے تو اس کے خلاف پرچہ درج کردیا جائے ۔
یاد رہے کہ رواں سال 8 مئی کو چیف جسٹس نے کیس کی سماعت کےدوران کٹاس راج مندر کے تالاب کے حوالے سے حکم دیا تھا کہ سیمنٹ فیکٹریاں مل کرمندر کی بہتری اور تالاب کو بھرنے کا کام کریں۔
انہوں نے مزید کہا تھا کہ سیمنٹ فیکٹریاں مل کر2 ارب روپے کی سیکیورٹی جمع کرائیں اور 6 ماہ کے اندر متبادل پانی کا انتظام کریں۔
