Tag: سپریم کورٹ پریکٹس

اسلام آباد : وفاقی حکومت کا سپریم کورٹ پریکٹس اینڈ پروسیجر بل پر دوبارہ غور کا فیصلہ کرلیا اور اس حوالے سے اٹارنی جنرل نے سپریم کورٹ کو آگاہ کردیا۔

تفصیلات کے مطابق سپریم کورٹ میں سپریم کورٹ پریکٹس اینڈ پروسیجر ایکٹ 2023 سے متعلق کیس کی سماعت ہوئی، چیف جسٹس پاکستان عمر عطا بندیال کی سربراہی میں 8 رکنی لارجر بینچ نے سماعت کی۔

اٹارنی جنرل نے دوران سماعت سپریم کورٹ کو آگاہ کیا کہ وفاقی حکومت کا سپریم کورٹ پریکٹس اینڈ پروسیجر بل پر دوبارہ غور کا فیصلہ کیا ہے۔

اٹارنی جنرل نے کہا کہ سپریم کورٹ کے حوالے سے 2 قوانین بنائے گئے، حالیہ قانون نظرثانی درخواستوں سے متعلق تھا۔

اٹارنی جنرل کا کہنا تھا کہ پریکٹس اینڈ پروسیجر بل اور نظرثانی قانون دونوں میں کچھ شقیں ایک جیسی ہیں، دونوں قوانین کا باہمی تضاد سے بچانے کیلئے دوبارہ جائزہ لیا جائے گا۔

اٹارنی جنرل نے مزید بتایا کہ سپریم کورٹ کے انتظامی معاملے پر قانون سازی عدلیہ کے مشورے سے نہیں ہوئی، سپریم کورٹ کی مشاورت سے اب قانون میں ترمیم ہوگی، دونوں قوانین کے علاوہ دیگر معاملات میں بھی مشاورت ہوگی۔

چیف جسٹس نے اٹارنی جنرل کو ہدایت کی کہ آپ حکومت سے ہدایات لے لیں تب تک کسی اور کو سن لیتے ہیں، اگلے ہفتے اس کیس کو سنیں گے۔

چیف جسٹس کا کہنا تھا کہ کراچی سے لمبا سفر کرکے آنے والے تمام وکلا سے معذرت کرتے ہیں، جس پر اٹارنی جنرل کا کہنا تھا کہ یہاں موسم خوشگوار ہے، امید ہے سب انجوائے کریں گے، بعد ازاں عدالت نے سماعت آئندہ ہفتے تک ملتوی کر دی۔

اسلام آباد : سپریم کورٹ پریکٹس اینڈپروسیجرایکٹ کیخلاف درخواستوں پر سماعت آج ہوگی ، پی ٹی آئی نے نیا قانون کالعدم قرار دینے کی استدعا کر رکھی ہے۔

تفصیلات کے مطابق سپریم کورٹ میں سپریم کورٹ پریکٹس اینڈ پروسیجر بل 2023 کی ترامیم کو کالعدم قرار دینے کے حوالے سے درخواستوں پر سماعت آج ہوگی۔

چیف جسٹس کی سربراہی میں8رکنی بینچ دن12 بجے سماعت کرے گا، تحریک انصاف نے نیا قانون کالعدم قرار دینے کی استدعا کر رکھی ہے۔

گذشتہ روز تحریک انصاف نے بطور فریق جواب سپریم کورٹ میں جمع کرا دیا تھا، جس میں استدعا کی تھی کہ سپریم کورٹ پریکٹس اینڈ پروسیجرل قانون کو اور قانون کی شقوں 2،3،4،5،7 اور 8 کو غیر آئینی قرار دیا جائے۔

پی ٹی آئی نے جواب میں کہا تھا کہسپریم کورٹ پریکٹس اینڈ پروسیجرل قانون عدلیہ کی آزادی کے خلاف ہے، قانون سے عدلیہ کے اندرونی انتظامی امور میں مداخلت کی گئی ہے۔