Tag: سپریم کورٹ

اسلام آباد : تحریک انصاف (پی ٹی آئی) نے لیول پلیئنگ فیلڈ نہ ملنے پر الیکشن کمیشن کیخلاف توہین عدالت کی درخواست سپریم کورٹ سے واپس لے لی۔

تفصیلات کے مطابق سپریم کورٹ میں پی ٹی آئی لیول پلیئنگ فیلڈ کیس کی سماعت ہوئی، چیف جسٹس قاضی فائز عیسیٰ کی سربراہی میں بینچ نے کیس کی سماعت کی۔

سماعت میں پی ٹی آئی نے لیول پلیئنگ فیلڈ نہ ملنے پر الیکشن کمیشن کیخلاف توہین عدالت کی درخواست سپریم کورٹ سے واپس لے لی۔

وکیل لطیف کھوسہ نے بتایا کہ جمہوریت اور عوام کی بقاکیلئے عوام کی عدالت جانا چاہتے ہیں، آپ کی بہت مہربانی بہت شکریہ، جس پر چیف جسٹس پاکستان استفسار کیا آپ کیس چلانا چاہتے ہیں یا نہیں؟

وکیل لطیف کھوسہ نے جواب دیا مجھے ہدایات ملی ہیں درخواست واپس لےلی جائے، ہم 25 کروڑ عوام کی عدالت میں جانا چاہتے ہیں، ہم آپ کےشفاف انتخابات اورلیول پلیئنگ فیلڈکیلئےآئے تھے، آپ کے فیصلے سے ہماری 230 نشستیں چھین لی گئیں، کسی کو ڈونگا،کسی کو گلاس دے دیا گیا.

چیف جسٹس پاکستان نے لطیف کھوسہ سے مکالمے میں کہا کہ ہمارا فیصلہ ماننا ہےنہیں ماننا تو یہ آپ کی مرضی ہے تو وکیل پی ٹی آئی کا کہنا تھا کہ ہم اب کیا توقع کریں کہ ہمیں لیول پلیئنگ فیلڈ ملے گی.

جسٹس قاضی فائز عیسیٰ نے ریمارکس دیئے آپ نے عدالتی فیصلہ تسلیم کرنا ہے کریں نہیں کرنا نہ کریں تو لطیف کھوسہ نے کہا کہ آپ نے تو پی ٹی آئی کی فیلڈ ہی چھین لی،تحریک انصاف کا شیرازہ ہی بکھیر دیا گیا ہے،الیکشن کمیشن صرف انتخابی نشان واپس لے سکتا ہے،ایک جماعت کو پارلیمان سے باہر کرکے بین کیا جا رہا ہے،پی ٹی آئی امیدوار آزاد انتخابات لڑیں گےاورکنفیوژن کاشکار ہوں گے۔

جسٹس مسرت ہلالی نے سوال کیا کہ کیا آپ کو لگتا ہے انتخابات شفاف نہیں ہیں؟ وکیل تحریک انصاف نے جواب دیا کہ انتخابات بالکل غیرمنصفانہ ہیں، ہم نے عدلیہ کےلئے خون دیا، قربانیاں دیں، جس پر چیف جسٹس نے کہا کہ اب آپ ہمیں بھی بولنےکی اجازت دیں، دوسرے کیس کی بات اس کیس میں کرنامناسب نہیں۔

وکیل لطیف کھوسہ نے کہا کہ عدالت کے فیصلے سےجمہوریت تباہ ہو جائے گی، جس پر چیف جسٹس نے ریمارکس دیے بار بار کہا تھا دکھا دیں انٹراپارٹی انتخابات کاہونادکھادیں، آپ کو فیصلہ پسندنہیں تو کچھ نہیں کر سکتے، لیول پلیئنگ فیلڈ پر ہم نے حکم جاری کیا تھا، عدالت حکم دےسکتی ہے حکومت نہیں بن سکتی۔

جسٹس قاضی فائز عیسیٰ نے بیرسٹر گوہر کے گھر پر چھاپے کا ذکر کرتے ہوئے کہا کہ بیرسٹر گوہر کے معاملے پر پولیس اہلکار معطل ہوگئے، بیرسٹر گوہر کا کوئی ایسا رہ گیا ہے توعدالت آپ کر بتائیں۔

چیف جسٹس نے مزید کہا کہ ہمارا کام انتخابات قانون کے مطابق کرانا ہے،الیکشن کا معاملہ ہم نے اٹھایا، پی ٹی آئی درخواست پر 12دن میں تاریخ مقررکی، الیکشن کمیشن کہتا رہا پارٹی انتخابات کرائیں لیکن نہیں کرائےگئے، کسی اور سیاسی جماعت پراعتراض ہے تو درخواست لے آئیں۔

لطیف کھوسہ نے عدالت کو بتایا کہ ہم نے جس جماعت سے اتحاد کیا اس کے سربراہ کو اٹھا لیا ،پریس کانفرنس کرائی گئی، اتحاد کرنے پر بھی اب ہم پر مقدمات بنانےکی تیاریاں کی جارہی ہیں، آپ کے فیصلے سے ہمیں پارلیمانی سیاست سے نکال دیا گیا، آپ کے فیصلےکے بعد تحریک انصاف کے لوگ آزاد انتخابات کریں گے۔

جسٹس مسرت ہلالی نے وکیل پی ٹی آئی سے استفسار کیا آپ بتا رہے تھے آپ نے کسی جماعت سے اتحاد کیا ہے،لطف کھوسہ نے جواب دیا میں وہی تو بتا رہا ہوں کہ ہمیں اتحاد بھی نہیں کرنےدیا گیا، جس پر جسٹس مسرت ہلالی نے کہا کہ الیکشن کمیشن فیئر نہیں ہے، الیکشن کمیشن ایک پارٹی کے پیچھے بھاگ رہا ہے، اسے دوسری سیاسی جماعتیں نظر نہیں آتیں ؟

اسلام آباد : بیرسٹر علی ظفر نے پی ٹی آئی انٹراپارٹی انتخابات سےمتعلق پولنگ مٹیریل پیش کردیا، چیف جسٹس نے ریمارکس دیئے آپ کے آئین میں لکھا ہے کہ بلا مقابلہ بھی ہو تو بھی ووٹ ڈالنا پڑتا ہے۔

تفصیلات کے مطابق سپریم کورٹ میں پشاورہائیکورٹ کے پی ٹی آئی انتخابی نشان سے متعلق فیصلے کیخلاف الیکشن کمیشن کی اپیل پر سماعت ہوئی، چیف جسٹس قاضی فائز عیسیٰ کی سربراہی میں 3 رکنی بینچ نے سماعت کی، بینچ میں جسٹس محمد علی مظہر اور جسٹس مسرت ہلالی شامل ہیں۔

وکیل پی ٹی آئی بیرسٹرعلی ظفر نے سماعت کے وقفے کے بعد دلائل میں کہا کہ انٹراپارٹی الیکشن میں نامزدگی فارم ایک ہی سائیڈکی جانب سے جمع کرائے گئے، انٹراپارٹی الیکشن میں کوئی مدمقابل پینل ہی نہیں تھا، اسلام آباد میں انٹراپارٹی الیکشن کیلئے کوئی جگہ دینے کو تیارنہیں تھا۔

چیف جسٹس نے سوال کیا کہ آپ کو دلائل کیلئےکتنا وقت درکار ہوگا؟ علی ظفر نے کہا کہ کوشش کروں گا ایک گھنٹے میں دلائل مکمل کرلوں، کاغذات نامزدگی جمع ہوناپہلا اور انتخابات کامقام دوسرا مرحلہ تھا، پی ٹی آئی چاہتی تھی کہ پولنگ اسلام آباد میں ہو، شادی ہال سمیت کوئی بھی اپنی جگہ دینے کیلئے تیار نہیں تھا۔

جسٹس مسرت ہلالی نے استفسار کیا کہ جہاں الیکشن ہوا کیا وہاں آپ کا دفتر ہے؟ وکیل نے جواب دیا کہ جس گراؤنڈ میں الیکشن ہوا وہ ہمارے دفتر کے ساتھ ہے، الیکشن کمیشن نےآئی جی کےپی کو پشاور میں سیکیورٹی فراہمی کیلئے خط لکھا، پی ٹی آئی انٹراپارٹی الیکشن سے متعلق تمام اخبا رات نے شائع کیا،عوام آگاہ تھے، پولیس کوالیکشن کے مقام سےمتعلق آگاہ کردیاگیاتھا۔

وکیل پی ٹی آئی نے بتایا کہ اکبرایس بابرجس وقت آئےاس وقت تک نامزدگی فارم جمع کرانےکاوقت ختم ہوگیاتھا، وقت 3 بجے کا تھا مگر پھر بھی اکبر ایس بابر کو آفس آنے کی اجازت دی گئی، اگر اکبر ایس بابر کا پینل ہوتا تو انٹرا پارٹی الیکشن لڑ سکتے تھے، آج تک اکبرایس بابرنےاپناپینل نہیں دیا، ابھی بھی نہیں بتایاکہ میرایہ پینل تھااورمیں الیکشن لڑناچاہتاتھا، اگراکبرایس بابرکےپاس اپناپینل ہوتاتوہمیں کوئی اعتراض نہیں ہوتا۔

بیرسٹر علی ظفر نے مزید کہا کہ کاغذات نامزدگی جمع ہونا پہلا اور انتخابات کا مقام دوسرا مرحلہ تھا، پی ٹی آئی چاہتی تھی کہ پولنگ اسلام آباد میں ہو، شادی ہال سمیت کوئی بھی اپنی جگہ دینے کیلئے تیار نہیں تھا۔

چیف جسٹس نے سوال کیا کہ کیا ایک شخص الیکشن نہیں لڑ سکتا،کہیں لکھا ہوا ہے؟ بیرسٹر علی ظفر نے بتایا کہ ایک شخص انٹراپارٹی الیکشن نہیں لڑ سکتا، چیف جسٹس نے مزید پوچھا چیئرمین کے انتخابات کیلئے بھی پینل ہونا لازمی ہے؟ چیئرمین کا الیکشن کہاں ہوا تھا، جس پربیرسٹر علی ظفر نے بتایا کہ چیئرمین کیلئے پینل کا ہونا لازمی نہیں،وہ اکیلئے لڑ سکتا ہے، پارٹی چیئرمین کا الیکشن بھی پشاور میں ہوا تھا۔

جسٹس محمد علی مظہر نے استفسار کیا الیکشن کمیشن نے پولنگ کا مقام اور دیگر تفصیلات مانگی تھیں کیا وہ بتائی گئیں؟ وکیل پی ٹی آئی نے بتایا کہ الیکشن کمیشن کے اس خط کا جواب نہیں دیا لیکن پولیس کو آگاہ کر دیا تھا، میڈیا کے ذریعے پولنگ کے مقام سے بھی آگاہی فراہم کر دی تھی، جو پینل سامنے آئے انکی تفصیلات بھی ریکارڈ کا حصہ ہیں،اکبرایس بابر نے آج تک اپنا پینل ہی نہیں دیا کہ وہ کہاں سے الیکشن لڑناچاہتےتھے۔

چیف جسٹس قاضی فائزعیسیٰ نے ریمارکس دیئے سینیٹرکاانتخاب بھی اِن ڈائریکٹ ہوتاہے،مطلوبہ ووٹ حاصل کرنےہوتےہیں، اگرآپ کوایک ووٹ بھی نہ پڑےتوآپ سینیٹرنہیں بن سکتےتھے، جس پر علی ظفر نے بتایا کہ میں ٹیکنوکریٹ نشست پر بلامقابلہ سینیٹ رکن منتخب ہواتھا۔

بیرسٹر علی ظفر نے پی ٹی آئی انٹراپارٹی انتخابات سےمتعلق پولنگ مٹیریل پیش کردیا، چیف جسٹس نے ریمارکس دیئے آپ کے آئین میں لکھا ہے کہ بلا مقابلہ بھی ہو تو بھی ووٹ ڈالنا پڑتا ہے،آپ ڈکٹیٹرشپ کی طرف جا رہے ہیں ایک آدمی کہہ دے یہ پینل وہ پینل، یہ جمہوریت تو نہ ہوئی، سیکرٹری جنرل بھی ایسے ہی آ گئے، چیئرمین بھی ایسے ہی آ گئے، بورڈ بھی ایسے ہی آ گیا۔

چیف جسٹس نے سوال کیا کہ یہ الیکشن ہے یا سلیکشن یا کیا ہے ؟ آپ کیوں نہیں الیکشن کرواتے، مسئلہ کیا تھا؟ بڑی بڑی ہستیاں توبلا مقابلہ آجاتی ہیں لیکن آپ کےتوچھوٹےسےچھوٹاعہدیداربھی بلا مقابلہ منتخب ہوا، بیرسٹر علی ظفر نے کہا کہ ن لیگ میں نواز شریف اور مریم نواز بلا مقابلہ منتخب ہوئے۔

جسٹس مسرت ہلالی نے وکیل پی ٹی آئی سے مکالمے میں کہا کہ اے این پی کو بھی کوئی 20 ہزار کا جرمانہ ہوا ہے، وکیل نے بتایا کہ جی آج ہی فیصلہ آیا ہے 20 ہزار جرمانہ کیا گیا ہے اور کہا ہے کہ پارٹی انتخابات کروائیں۔

جسٹس قاضی فائز عیسیٰ کا ریمارکس میں کہنا تھا کہ لیکن آپ کا مسئلہ تو کافی پرانا چل رہا ہے، اس طرح تو آپ آمریت کی جانب جا رہے ہیں، چیئرمین، سیکرٹری جنرل سمیت سب لوگ ایسے ہی آگئے یہ تو سلیکشن ہوگئی، پی ٹی آئی نے الیکشن کیوں نہیں کرایا آخر مسئلہ کیا تھا۔

وکیل پی ٹی آئی نے سپریم کورٹ میں ن لیگ کے بلامقابلہ انتخابات کا نوٹیفکیشن پیش کر دیا اور کہا ن لیگ میں بھی سب بلامقابلہ منتخب ہوئے تھے، جس پر چیف جسٹس نے کہا کہ بلامقابلہ انتخابات پارٹیوں میں ہوتےرہتےہیں، اس پرتبصرہ نہیں کریں گے۔

علی ظفر کا کہنا تھا کہ اے این پی کے ضلعی صدور بھی بلامقابلہ منتخب ہوئے تھے، اے این پی کو 20ہزارروپے جرمانہ کرکے پارٹی انتخابات جنرل الیکشن کے بعد کرانے کا کہا گیا تو جسٹس قاضی فائز عیسیٰ نے کہا کہ معاملہ فنڈنگ کا بھی 2014 سے پڑا ہے جو آپ چلنے نہیں دیتے۔

چیف جسٹس نے سوال کیا کل بیرسٹر گوہر وزیراعظم بن گئے تو کیا انہیں پارٹی کے لوگ جانتے ہوں گے؟ علی ظفر نے کہا کہ آپ اختلافی نقطہ نظر بھی سنتے ہیں جو اچھی بات ہے تو جسٹس قاضی فائز عیسیٰ کا کہنا تھا کہ آپ ہمیشہ پیشہ ورانہ انداز میں دلائل دیتے ہیں، بغیر انتخاب بڑے لوگ آ جائیں تو بڑے فیصلے بھی کرینگے، آئی ایم ایف سے معاہدہ بھی ہوسکتا ہے کرنا پڑے، لوگ اپنے منتخب افراد کو جانتے تو ہوں۔

اسلام آباد : سپریم کورٹ میں پی ٹی آئی انتخابی نشان کیس میں چیف جسٹس قاضی فائز عیسیٰ نے وکیل پی ٹی آئی سے مکالمے میں کہا کہ آپ کہتےہیں اسٹیبشلمنٹ کاالیکشن کمیشن پردباؤہےتواسکوثابت کریں، جب بدنیتی کاالزام لگاتے ہیں توبتائیں کہ بدنیتی کہاں ہے۔

تفصیلات کے مطابق سپریم کورٹ میں پشاورہائیکورٹ کے پی ٹی آئی انتخابی نشان سے متعلق فیصلے کیخلاف الیکشن کمیشن کی اپیل پر سماعت ہوئی، چیف جسٹس قاضی فائز عیسیٰ کی سربراہی میں 3 رکنی بینچ نے سماعت کی، بینچ میں جسٹس محمد علی مظہر اور جسٹس مسرت ہلالی شامل ہیں۔

چیف جسٹس نے وکیل پی ٹی آئی سے مکالمے میں کہا کہ آپ کہتےہیں اسٹیبشلمنٹ کاالیکشن کمیشن پر دباؤ ہے تو اس کو ثابت کریں، اسٹیبلشمنٹ کا لفظ استعمال کرتے ہیں اصل نام فوج ہے، اسٹیبشلمنٹ کیوں الیکشن کمیشن پر دباؤ ڈالے گی؟

چیف جسٹس آف پاکستان کا کہنا تھا کہ عدالت آئینی اداروں کوکنٹرول تو نہیں کرسکتی، آپ جب بدنیتی کا الزام لگاتے ہیں توبتائیں کہ بدنیتی کہاں ہے، یہ انتخابی نشان کیا ہوتا ہے ہمیں معلوم ہے، ہمیں کھل کر اور مکمل بات کرنی چاہیے، آئینی اداروں کی عزت کرتا ہوں۔

جسٹس قاضی فائز عیسیٰ نے کہا کہ کسی اورجماعت میں کوئی ایک کاغذا کا ٹکڑا پیش کر دے اور دوسرا کوئی اور تو فیصلہ کون کرے گا؟ تو وکیل پی ٹی آئی نے جواب دیا کہ اس کافیصلہ سول کورٹ کرےگی، جس پر چیف جسٹس قاضی فائزعیسیٰ نے کہا کہ سول کورٹ اس کا فیصلہ کیوں کرے گی۔

وکیل پی ٹی آئی نے بتایا کہ کیوں کہ پارٹی ممبران کاآپس میں تنازع ہوگا تو چیف جسٹس کا کہنا تھا کہ سول کورٹ کہےیہ میرا نہیں الیکشن کمیشن کا کام ہے، علی ظفر نے کہا کہ اِس معاملے میں الیکشن کمیشن کادائرہ کار نہیں ہوگا۔

چیف جسٹس نے استفسار کیا آپ کہاں سے یہ بات کررہے ہیں؟ وکیل پی ٹی آئی نے بتایا میں آپ کوقانون پڑھ کرسناتاہوں، الیکشن ایکٹ کے مطابق ہر سیاسی جماعت نے پارٹی انتخابات کے 7 دن میں سرٹیفکیٹ دینا ہے تو جسٹس مسرت ہلالی کا کہنا تھا کہ سرٹیفکیٹ پارٹی آئین کے مطابق انتخابات سے مشروط ہے، جس پر علی ظفر نے کہا کہ الیکشن کمیشن کو انٹراپارٹی انتخابات کی اسکروٹنی کا اختیار نہیں ہے۔

چیف جسٹس کے علی ظفر سے مکالمے میں کہا کہ یا آپ تسلیم کر لیں جمہوریت چاہیے یا نہیں؟یا تو کہ دیں کہ جمہوریت گھر میں نہیں چاہیے لیکن باہر چاہیے، آپ کو سیاست چاہئے جمہوریت نہیں چاہئے، سیاست تو ہے ہی جمہوریت۔

جسٹس محمد علی مظہر نے ریمارکس دیئے اصل مسئلہ ہی دائرہ اختیار کا بنا ہوا ہے، ہمارےسامنےانتخابی نشان کیس نہیں پشاورہائیکورٹ فیصلہ دیکھ رہےہیں۔

جسٹس قاضی فائز عیسیٰ کا کہنا تھا کہ الیکشن کمیشن نےانتخابی نشان واپس نہیں لیا، الیکشن کمیشن کاپہلےخط پڑھیں،انہوں نے کہا انٹراپارٹی الیکشن کرائیں، الیکشن کمیشن نے دھمکی بھی دی انٹرپارٹی الیکشن نہیں کرائیں گےتونشان لے لیں گے۔

جس پر وکیل پی ٹی آئی نے کہا کہ سوال یہ ہےکیا الیکشن نہ کر انےپرکیاالیکشن کمیشن پارٹی نشان واپس لےسکتاہے تو چیف جسٹس نے ریمارکس دیئے آپ لوگوں نےالیکشن کمیشن کےخط کوقبول کیاہے، انٹراپارٹی الیکشن ہوگئے توانتخابی نشان خودبخودمل جائےگا۔

جسٹس قاضی فائز عیسیٰ نے مزید کہا کہ آپ کی حکومت تھی جب الیکشن کمیشن نےخط لکھاتھا، پی ٹی آئی نےاس وقت انٹرپارٹی الیکشن نہیں کرائے، پی ٹی آئی نےکوروناکی وجہ سےایک سال کی مہلت مانگی ،یہ نہیں کہاالیکشن کمیشن کون ہےنشان واپس لینے والا، الیکشن کمیشن نے بتایا 13جماعتوں کوانٹراپارٹی الیکشن نہ کرانےپرڈی لسٹ کرچکےہیں۔

چیف جسٹس نے مزید ریمارکس دیئے یا تو کہہ دیں کہ جمہوریت گھر میں نہیں چاہیے لیکن باہر چاہیے، الیکشن کمیشن کا ایک ہی دکھڑا ہے کہ پارٹی انتخابات کرا لو، جس پر بیرسٹر علی ظفر نے کہا کہ پارٹی الیکشن کرائے لیکن وہ الیکشن کمیشن نے مانے نہیں۔

چیف جسٹس نےوکیل پی ٹی آئی سے سوال کیا کہ 14درخواست گزاروں کو الیکشن کیوں نہیں لڑنے دیا ، وکیل پی ٹی آئی نے بتایا کہ کسی کو اعتراض ہے تو سول کورٹ چلا جائے تو جسٹس قاضی فائز عیسیٰ نے کہا کہ ہم جمہوریت کیساتھ کھڑے ہیں چاہے وہ گھر کے اندر ہو یا باہر ہو۔

بیرسٹر علی ظفر کا کہنا تھا کہ کوئی پٹواری انٹراپارٹی انتخابات کا فیصلہ نہیں کر سکتا کیونکہ اسے اختیار نہیں ہے تو چیف جسٹس نے ریمارکس دیے کہ آپ کو سیاست چاہئے جمہوریت نہیں چاہئے، سیاست تو ہے ہی جمہوریت، آپ کہتے ہیں کہ انٹرا پارٹی الیکشن نہ کروانے پر الیکشن کمیشن 2 لاکھ جرمانہ کر سکتا ہے لیکن ساتھ ہی آپ کہتے ہیں باقی اختیار الیکشن کمیشن کے پاس نہیں۔

چیف جسٹس کا کہنا تھا کہ اگر 8 فروری کو آپ 326 ارکان کو بلا مقابلہ جتوادیں تو ایسے الیکشن کو میں نہیں مانوں گا، بلا مقابلہ ہے تو قانونی ہی لیکن عقل و دانش بھی کوئی چیز ہوتی ہے، یعنی پاکستان اور انگلینڈ کا ٹیسٹ میچ کھیلے بغیر سرٹیفکیٹ آگیا کہ پاکستان جیت گیا۔

جسٹس قاضی فائز عیسیٰ نے کہا کہ پی ٹی آئی آئین کہتا ہے چیئرمین کا الیکشن 2 سال باقی 3 سال بعد ہونگے، یہاں تک تو پارٹی آئین کی خلاف ورزی ثابت ہوگئی۔

جسٹس مسرت ہلالی نے ریمارکس دیئے سرٹیفکیٹ اسی وقت مل سکتا ہے جب انتخابات پارٹی آئین کے مطابق ہوئے ہوں اور استفسار کیا کوئی پارٹی الیکشن کرائے بغیر سرٹیفکیٹ دیدے تو کیا الیکشن کمیشن کچھ نہیں کر سکتا؟

وکیل علی ظفر نے بتایا کہ الیکشن ایکٹ میں پارٹی انتخابات کی شفافیت کا جائزہ لینے کا اختیار نہیں ،انتخابات نہ کرانے پر الیکشن کمیشن 2 لاکھ روپے تک جرمانہ کر سکتاہے،جس پر جسٹس محمد علی مظہر نے کہا کہ پی ٹی آئی انتخابات کروا کر جرمانے کی اسٹیج سے تو آگے نکل چکی ہے۔