کراچی : سپر سائیکلون کیار کے بعد بحیرہ عرب میں موجود شدید ٹراپیکل سائیکلون ‘ماہا’ شدت اختیار کرنے لگا، ابتدائی طور اس کا رخ شمال مغرب کی جانب ہے اور کراچی سے 1600 کلومیٹر دور ہے۔
تفصیلات کے مطابق محکمہ موسمیات نے خبردار کیا ہے کہ بحیرہ عرب کے جنوب مشرق میں موجود شدید سمندری طوفان ماہا شدت اختیار کررہا ہے، سائیکلون ماہا کراچی سے1600 کلومیٹر دور جنوب مشرق میں ہے اور کیٹگری ون کے سمندری طوفان میں تبدیل ہوچکا ہے۔
محکمہ موسمیات کا کہنا ہے کہ آئندہ آنے والے دنوں میں یہ مذید شدت اختیار کرسکتا ہے، ابتدائی طور اس کا رخ شمال مغرب کی جانب ہے۔
دوسری جانب سائیکلون کیار بتدریج کمزور ہورہا ہے، سائیکلونک اسٹارم کیار کیٹگری 1 میں آچکا ہے اور کراچی کے جنوب مغرب سے 1030 کلومیٹر دور اور گوادر کے جنوب سے 825کلومیٹر دور ہے۔
سمندری طوفان کیار خلیج عدن کی جانب بڑھ رہا ہے جو صومالیہ کے ساحل سے ٹکرا سکتا ہے ، جس کے بعد یہ ڈپریشن کی صورت میں دم توڑ دے گی۔
مزید پڑھیں : سپرسائیکلون’کیار‘کی شدت میں کمی ، کراچی میں ہلکی بارش کا امکان
محکمہ موسمیات نےدو روز کے دوران سندھ کے زیریں اور مکران کے ساحلی علاقوں میں بارش کا امکان ظاہرکردیا ہے اور ماہی گیراب بھی جمعرات تک کھلے سمندر میں نہیں جاسکتے۔
خیال رہے کہ گوادر کے ساحلی بستی گنز میں بے قابو سمندری لہروں نے تباہی مچا دی ہے، بستی میں سمندر کی بے قابو لہریں داخل ہوچکی ہیں اور درجنوں گھروں کو ڈبو دیا تھا۔
ترجمان پاک بحریہ کا کہنا تھا کہ پاک بحریہ کے عملے نے کیٹی بندر اور شاہ بندر کے نواحی علاقوں میں ریسکیو آپریشن کیا اور سمندری طوفان سے متاثرہ علاقے میں لوگوں کی مدد کی۔
