اے آر وائی فلمز کی نئی فلم ’پنجاب نہیں جاؤں گی‘ کی پہلی جھلک جاری کردی گئی۔ جاری کیے جانے والے ٹیزر کو دیکھ کر محسوس ہوتا ہے کہ یہ فلم پاکستانی سینما کا ایک اور اہم سنگ میل ثابت ہوگی۔
اے آر وائی فلمز اور سکس سگما پلس کی کی مشترکہ کاوش ’پنجاب نہیں جاؤں گی‘ کا پہلا ٹیزر جاری کردیا گیا۔
فلم میں ہمایوں سعید اور مہوش حیات مرکزی کردار ادا کر رہے ہیں۔ ہمایوں سعید فلم کے پروڈیوسرز میں بھی شامل ہیں۔
جاری کیے جانے والے ٹیزر میں اداکارہ عروہ حسین بھی دکھائی دیں جو حال ہی میں رشتہ ازدواج میں منسلک ہونے کے بعد دوبارہ اپنی پیشہ وارانہ سرگرمیوں کا آغاز کر چکی ہیں۔
فلم میں پنجاب کے روایتی رنگوں، ڈھول تاشوں، بھنگڑا، مختلف رسومات اور سر سبز و لہلہاتے کھیتوں کو دکھایا گیا ہے۔
فلم کے دیگر کرداروں میں احمد علی بٹ اور صبا وسیم بھی شامل ہیں۔
اے آر وائی فلمز اور سکس سگما پلس کی یہ مشترکہ کاوش ندیم بیگ کی ہدایت کاری میں بنائی جارہی ہے جبکہ اس کے پروڈیوسر اے آر وائی ڈیجیٹل نیٹ ورک کے سربراہ سلمان اقبال ہیں۔
