اسلام آباد: حکومت پاکستان نے معاشی میدان میں مشکلات کے باعث 2 ارب ڈالر کے سکوک بانڈز کا اجرا روک دیا۔
ذرائع کے مطابق آئی ایم ایف پروگرام میں تاخیر کے باعث سکوک بانڈز جاری نہیں کیے جائیں گے، کیوں کہ بانڈز اجرا کے لیے اچھا رسپانس نہیں ملے گا۔
رواں مالی سال کے دوران 2 ارب ڈالر کے سکوک بانڈز جاری کیے جانے تھے، تاہم مشکل معاشی صورت حال کے باعث بانڈز جاری کرنے کے لیے زیادہ منافع ادا کرنا پڑے گا، اور زرمبادلہ کم اور ادائیگیوں کا بوجھ بڑھنے کے باعث زیادہ شرح منافع نہیں دیا جا سکتا۔
ذرائع کا کہنا ہے کہ ڈیفالٹ کے خطرات کے باعث عالمی مارکیٹ سے اچھا رسپانس نہیں ملے گا، ریٹنگ ایجنسیز کی جانب سے منفی ریٹنگ کے باعث بھی بانڈز کا اجرا سود مند نہیں۔
واضح رہے کہ سکوک ایک اسلامی مالیاتی سند ہے جو مغربی مالیات میں بانڈ کی طرح ہوتی ہے، اسٹیٹ بینک آف پاکستان یہ بانڈز جاری کرتا ہے جب کہ اسلامی مالیاتی ادارے اور سرمایہ کاری میں دل چسپی رکھنے والی کارپوریشنز یہ بانڈز خرید کر اس کے عوض حکومت کو رقم دیتی ہیں، جو حکومت مالی خسارہ کم کرنے اور دیگر منصوبوں پر خرچ کرتی ہے۔
