Tag: سکھر

سکھر: قومی احتساب بیورو (نیب) ٹیم نے پنو عاقل کے مختیار کار کے دفتر پر چھاپا مار کر سارا ریکارڈ تحویل میں لے لیا ہے۔

تفصیلات کے مطابق نیب ٹیم نے سکھر میں انجینئر گل شیخ اور اہل خانہ کے نام پر کروڑوں کی جائیداد کا ریکارڈ ضبط کر لیا ہے، یہ ریکارڈ انھوں نے مختیارکار کے دفتر سے تحویل میں لیا۔

نیب کی کارروائی کے بعد دیگر محکموں کے افسران میں کھلبلی مچ گئی، ادھر نیب نے تحویل میں لیے گئے ریکارڈ کی چھان بین شروع کر دی ہے۔

خیال رہے کہ مختیار کار پنو عاقل کا دفتر خورشید شاہ کے حلقے میں واقع ہے، نیب ٹیم نے چھاپے کے دوران عملے اور افسران سے سوالات کیے۔

یہ بھی پڑھیں:  نیب نے خورشید شاہ سے اثاثوں کی تفصیلات طلب کر لیں

نیب نے کراچی اور حیدر آباد کے کمشنرز کو گل شیخ اور اہل خانہ کی املاک کا ریکارڈ فراہم کرنے کا بھی حکم جاری کیا ہے۔

گل شیخ کئی برس ایس ڈی او اور ایکس ای این رہے ہیں، نیب ذرایع کے مطابق اس بات کی تحقیقات شروع کی گئی ہیں کہ گل شیخ نے کروڑوں کی املاک کیسے بنائیں۔

یاد رہے کہ دو دن قبل نیب نے پاکستان پیپلز پارٹی کے سینئر رہنما خورشید شاہ سے اثاثوں کی تفصیلات بھی طلب کر لی تھیں، آمدن سے زاید اثاثہ جات اور منی لانڈرنگ کی تحقیقات کے سلسلے میں‌ خورشید شاہ کو سوال نامہ ارسال کیا گیا۔

موصولہ اطلاعات کے مطابق 50 سے زاید محکموں سے خورشید شاہ کے اثاثوں کی تفصیلات مانگی گئی تھیں۔

کراچی: سندھ حکومت کی طرف سے لاڑکانہ کے بعد حیدر آباد اور سکھر میں پیپلز بس سروس شروع کرنے کی تیاریاں جاری ہیں، حیدر آباد اور سکھر میں انٹرا سٹی بس منصوبے کے لیے نجی شعبے سے تجاویز طلب کر لی گئیں۔

تفصیلات کے مطابق وزیر ٹرانسپورٹ اویس شاہ نے کہا ہے کہ حیدر آباد اور سکھر بس منصوبے کے لیے مکمل سرمایہ کاری نجی شعبے کی ہوگی۔

وزیر ٹرانسپورٹ کا کہنا ہے کہ پہلے مرحلے میں سکھر اور حیدر آباد میں پیپلز بس سروس کا پائلٹ پراجیکٹ شروع ہوگا، تجرباتی مرحلے میں سکھر کے لیے 30، حیدر آباد کے لیے 40 بسیں چلانے کی تجویز ہے۔

اویس شاہ نے کہا کہ ایئر کنڈیشنڈ پیپلز بس سروس کا کرایہ حکومت کا مقرر کردہ ہوگا، جب کہ محکمہ ٹرانسپورٹ اس بس منصوبے کے لیے بس ڈپو فراہم کرے گی۔

یہ بھی پڑھیں:  سندھ حکومت کی لاڑکانہ میں انٹر سٹی بسیں چلانے کی تیاری

انھوں نے کہا کہ سکھر میں پنوعاقل، روہڑی، پرانا سکھر، بائی پاس اور کندھرا کے درمیان سروس شروع کی جائے گی، جب کہ حیدرآباد میں بس سروس لطیف آباد سے قاسم آباد، سٹی ایریا، پریٹ آباد، ٹنڈو جام، کوٹڑی کے درمیان چلائی جائے گی۔

وزیر ٹرانسپورٹ اویس شاہ کا کہنا تھا کہ لاڑکانہ میں پیپلز بس سروس کو عوام میں خاصی پذیرائی ملی ہے۔

خیال رہے کہ لاڑکانہ، نوڈیرو اور رتو ڈیرو کے درمیان پیپلز بس سروس شروع کرنے کے لیے سندھ حکومت نے نجی کمپنی سے معاہدہ کیا تھا، جس کے بعد یہ سروس لاڑکانہ میں شروع ہو چکی ہے۔

سکھر: پاکستان پیپلز پارٹی کے سینیئر رہنما خورشید شاہ کا پڑوسی ملک کی جانب سے ایل او سی پر کلسٹر بموں کے استعمال پر کہنا ہے کہ بھارت کی پوری کوشش ہے کہ خطے کا امن خراب ہو۔

تفصیلات کے مطابق خورشید شاہ سندھ کے شہر سکھر میں میڈیا سے گفتگو کر رہے تھے، انھوں نے کہا کہ بھارت اس خطے میں مسلسل امن خراب کرنے کی کوشش کر رہا ہے۔

انھوں نے سینیٹ میں اپوزیشن کی تحریکِ عدم اعتماد کی ناکامی پر کہا کہ سینیٹرز کو چاہیے تھا کہ وہ ووٹ نہ دیتے اور اجلاس سے چلے جاتے۔

پی پی رہنما کا کہنا تھا کہ پارلیمنٹ کے اراکین بھی اگر بکیں اور پارٹی سے غداری کریں تو ملک کو کیا عزت ملے گی، مذکورہ ارکان نے ملک کی جگ ہنسائی کرائی۔

یہ بھی پڑھیں:  سینیٹ میں تحریک عدم اعتماد کی ناکامی، بلاول بھٹو نے فیکٹس فائنڈنگ کمیٹی بنادی

خورشید شاہ نے مزید کہا کہ ہم ایسے لوگ ہیں جو کبھی بھی دباؤ میں نہیں آئے، سیاست دانوں کو جیل میں ڈال کر کم زور نہیں کیا جا سکتا، ہم نے نہ کبھی کسی کی بالا دستی قبول کی تھی اور نہ اب کریں گے۔

انھوں نے کہا کہ ہمارے پاس سب سے بڑا ہتھیار پارلیمنٹ ہے، تاہم ہمارے ہی سینیٹرز چوری ہوئے اور ہم نہ روک سکے، تو حکومت کو کام سے کیا روک سکیں گے۔

خیال رہے کہ چیئرمین پیپلز پارٹی بلاول بھٹو نے چیئرمین سینیٹ کے خلاف تحریک عدم اعتماد کی ناکامی پر پارٹی پالیسی کے خلاف ووٹ دینے والے سینیٹرز کو بے نقاب کرنے کے لیے فیکٹس فائنڈنگ کمیٹی بنا دی ہے۔

سکھر: چیئرمین پیپلزپارٹی بلاول بھٹو نے کہا ہے کہ سندھ حکومت کے ذریعے بلاسود قرضے دے رہے ہیں، مفت علاج اور صحت ہماری ترجیح رہی ہے۔

تفصیلات کے مطابق چیئرمین پیپلزپارٹی بلاول بھٹو زرداری نے سکھر میں نیوز کانفرنس کرتے ہوئے کہا کہ آج سندھ کے ہر ڈسٹرکٹ میں دل کا مفت علاج ہورہا ہے، مہنگے ترین علاج غریب عوام کو مفت فراہم کررہے ہیں، معیاری انفرا اسٹرکچر کے تحت سندھ میں دل کے اسپتال چلا رہے ہیں۔

انہوں نے کہا کہ گمبٹ میں بھی اسپتال بنایا ہے، کوشش ہے کہ سکھر میں بھی بنے، اسپتالوں میں ڈاکٹرز اور نرسز کی کمی کو پورا کرنا چاہتے ہیں، ہم چاہتے ہیں کہ آنے والی نسلوں کو روزگار اور تعلیم ملے۔

بلاول بھٹو نے کہا کہ کوشش ہے کم پیسے اور زیادہ محنت سے منصوبوں کو مکمل کریں، کام ہوتے رہیں تو عوام کے مسائل بھی حل ہوتے رہیں گے، پبلک پرائیویٹ پارٹنر شپ کے تحت چائلڈ ایمرجنسی سینٹرز کھولیں گے، کورنگی کراچی میں چلڈرن ایمرجنسی سینٹر بنایا ہے، پبلک پرائیویٹ پارٹنرشپ کے تحت کارکردگی سب کے سامنے ہے۔

مزید پڑھیں: جمہوری حقوق محفوظ ہونے تک معاشی حقوق بھی محفوظ نہیں ہوں گے: بلاول بھٹو زرداری

چیئرمین پیپلزپارٹی نے کہا کہ ہم مہنگائی، عوام دشمن بجٹ کے خلاف احتجاج کررہے ہیں، اداروں کو غیرمتنازع ہونا پڑے گا۔

بلاول بھٹو نے کہا کہ ویڈیو اسکینڈل سوالیہ نشان ہے، عدالت اس کی تحقیقات کرے، ویڈیو میں کتنا سچ اور کتنا ہے جھوٹ ہے معلوم نہیں ہے، کسی میں جج پر دباؤ ڈالنے کی ہمت نہیں ہونی چاہئے، پارٹی منشور کے مطابق جوڈیشل ریفارمز کی جدوجہد کرتا رہوں گا۔

انہوں نے کہا کہ سندھ میں کم عمری اور زبردستی کی شادیوں کے خلاف قانون سازی کی گئی، اقلیتوں کے خلاف ناانصافی کرنے والوں کو پہلے میرا سامنا کرنا پڑے گا۔

سکھر: چیئرمین پاکستان پیپلز پارٹی بلاول بھٹو زرداری 3 روزہ دورے پر سکھر پہنچ گئے، بلاول بھٹو صوبائی وزیر اویس شاہ کی رہایش گاہ پر قیام کریں گے۔

تفصیلات کے مطابق پی پی چیئرمین بلاول بھٹو سکھر پہنچ گئے، جہاں وہ کل ورکرز کنونشن سے خطاب کریں گے، ان کا سکھر کا دورہ تین روز پر مشتمل ہے۔

اس دوران بلاول بھٹو سے سینئر پی پی رہنما خورشید شاہ اور دیگر رہنما ملاقاتیں کریں گے جب کہ بلاول بھٹو پریس کلب میں اہم پریس کانفرنس بھی کریں گے۔

تین روزہ دورے کے دوران سکھر اور گھوٹکی میں مختلف پروگراموں میں پی پی چیئرمین کی شرکت بھی شیڈول کا حصہ ہے۔

یہ بھی پڑھیں:  کراچی: فائرنگ کے واقعات میں نجی چینل کے اینکر سمیت پانچ افراد جاں بحق

دریں اثنا، بلاول بھٹو زرداری نے کراچی کے علاقے ڈیفنس میں اینکر پرسن کے قتل کی شدید مذمت کرتے ہوئے کہا کہ مرید عباس کے قتل میں ملوث ملزمان کو جلد قانون کی گرفت میں لایا جائے۔

پی پی چیئرمین نے کہا کہ کسی کو بھی قانون ہاتھ میں لینے کی اجازت نہیں دی جا سکتی۔ بلاول بھٹو نے سوگوار خاندان سے ہم دردی و یک جہتی کا بھی اظہار کیا۔

یاد رہے کہ گزشتہ روز بلاول بھٹو نے قائمہ کمیٹیوں کے تمام اجلاس منسوخ کیے جانے پر کہا تھا کہ اجلاس منسوخ کرنا پارلیمنٹ پر اندر سے حملے کے مترادف ہے۔