Tag: سکھر

سکھر: سندھ میں ڈاکٹروں کی ہڑتال مریضوں کی زندگیاں نگلنے لگی، سکھر میں علاج نہ ہونے پر ایک اور مریض دم توڑ گیا۔

تفصیلات کے مطابق صوبہ سندھ میں تنخواہوں کے معاملے پر ڈاکٹروں کی ہڑتال کے باعث مریضوں کا کوئی پرسانِ حال نہیں رہا، سکھر میں ایک اور مریض جان سے ہاتھ دھو بیٹھا۔

[bs-quote quote=”ہڑتال کے دوران مرنے والوں کی تعداد 6 ہو گئی ہے۔” style=”style-7″ align=”left” color=”#dd3333″][/bs-quote]

حادثے میں زخمی طارق کو سِول اسپتال لایا گیا تو کوئی ڈاکٹر ڈیوٹی پر موجود نہیں تھا، زخموں کی تاب نہ لا کر طارق نے دم توڑ دیا۔

ہڑتال کے دوران مرنے والوں کی تعداد 6 ہو گئی ہے، جب کہ سندھ بھر میں ینگ ڈاکٹرز کی ہڑتال آج 5 ویں روز میں داخل ہو گئی ہے، دوسری طرف محکمۂ صحت نے ہڑتالی ڈاکٹرز کے خلاف کارروائی کا فیصلہ کر لیا ہے۔

محکمۂ صحت نے سرکاری اسپتالوں کے سربراہان سے ڈیوٹی نہ دینے والے ڈاکٹروں کی فہرست طلب کر لی۔

یہ بھی پڑھیں:  سندھ حکومت کا ینگ ڈاکٹرز کے خلاف کارروائی کا اعلان

یاد رہے کہ ڈاکٹروں کی ہڑتال کے باعث صوبے کے تمام سرکاری اسپتالوں کی او پی ڈیز اور آپریشن تھیٹرز بند ہیں، مریض نجی اسپتالوں میں جانے پر مجبور ہیں۔

دوسری طرف سندھ حکومت نے کل سے تمام او پی ڈیز کھولنے کے احکامات جاری کر دیے ہیں جس کا نوٹیفکیشن جاری کر دیا گیا ہے، سندھ حکومت کے ترجمان کا کہنا ہے کہ ڈاکٹروں کا غیر پیشہ ورانہ عمل قابل قبول نہیں ہے۔

سکھر: پیپلزپارٹی کے رہنما خورشید شاہ نے کہا ہے کہ وزیراعظم عمران خان ملک کے لیے بہتر کام کریں گے تو ہم ان کا ساتھ دیں گے۔

تفصیلات کے مطابق سکھر میں میڈیا سے گفتگو کرتے ہوئے خورشید شاہ نے کہا کہ اپوزیشن کے چیئرمین پی اے سی کو ہٹانا بہت مشکل ہے، کوئی ملک میں سرمایہ کاری لارہا ہے تو ویلکم کریں گے۔

انہوں نے کہا کہ پاکستان کا جب بھی بہتر وقت آیا وہ پیپلزپارٹی کے دور حکومت میں آیا ہے، ہم نے لوگوں کو کھیلوں کی سہولت دینے کے لیے اسپورٹس کمپلیکس بنائے ہیں۔

خورشید شاہ نے کہا کہ کیا ملک میں بجلی، گیس مہنگی ہم نے کی ہے، گیس کی قیمتوں میں 147 فیصد اضافہ کیا گیا، گزشتہ حکومتیں عوام کو ریلیف بھی دے رہی تھیں، موجودہ حکومت نے جتنا قرضہ لیا اتنا کبھی ماضی کی کسی حکومت نے نہیں لیا۔

مزید پڑھیں: ٹکراؤ سیاست کا حصہ ہے مگر ہم چاہتے ہیں یہ نظام چلے، خورشید شاہ

پیپلزپارٹی رہنما نے کہا کہ کوئی ڈھیل یا ڈیل نہیں مانگ رہا ہے، حکومتی کی کارکردگی سب کے سامنے ہے، کوئی کام ٹھیک سے نہیں کررہے ہیں، بہت کچھ کرسکتے ہیں لیکن نہیں کررہے ہیں۔

انہوں نے کہا کہ ایک کروڑ نوکریوں کی بات ہم نے کی تھی یا حکومت نے کی، لوگوں سے 7 ارب ڈالر لینے والے خود کیا کررہے ہیں، حکومت تو خود پیسے مانگنے نکل پڑی ہے۔

واضح رہے کہ گزشتہ ماہ گھوٹکی میں میڈیا سے گفتگو کرتے ہوئے خورشید شاہ کا کہنا تھا کہ وفاق نے سندھ حکومت گرانے کی کوشش کی تو نقصان اس کو ہوگا، ٹکراؤ سیاست کا حصہ ہے مگر ہم چاہتے ہیں یہ نظام چلے۔

سکھر: صوبہ سندھ کے شہر روہڑی میں پولیس نے کارروائی کرتے ہوئے کالعدم تنظیم کے دہشت گرد کو گرفتار کرلیا۔

تفصیلات کے مطابق روہڑی میں پولیس نے مقابلے کے بعد کالعدم تنظیم بلوچستان رپبلک آرمی کا اہم کارندہ گرفتارکرلیا۔

ایس ایس پی سکھرعرفان سموں کے مطابق ملزم کی شناخت علی مور بگٹی کے نام سے ہوئی ہے، ملزم سے بھاری تعداد میں بارودی مواد، ڈیٹونیٹرز، بولٹ اورتاربرآمد کیے۔

ایس ایس پی کا کہنا ہے کہ ملزم کراچی میں متعدد دہشت گردی کے واقعات میں ملوث رہا ہے، ملزم کے چارساتھی رات کی تاریکی کا فائدہ اٹھاتے ہوئے فرارہوگئے، ملزم کو تفتیش کے لیے نامعلوم مقام پرمنتقل کردیا گیا ہے۔

ہنگو میں فورسز کا آپریشن، کالعدم تنظیم کے کمانڈر سمیت 4 دہشت گرد ہلاک

یاد رہے کہ رواں ماہ جنوری کو صوبہ خیبر پختونخوا کے ضلع ہنگو میں قاضی پمپ کے قریب سیکیورٹی فورسز کی کارروائی کے دوران کالعدم تنظیم کے کمانڈر سمیت چار دہشت گرد ہلاک ہوگئے تھے۔

واضح رہے کہ 12 جنوری 2018 کو صوبہ پنجاب میں انسداد دہشت گردی فورس نے دہشت گردی کا منصوبہ ناکام بناتے ہوئے کالعدم تنظیم کے دو دہشت گرد گرفتار کرلیے۔

سکھر: سابق وزیر داخلہ احسن اقبال کو سکھر ایئرپورٹ پر وی آئی پی پروٹوکول دیا گیا، احسن اقبال نے آج صبح پی آئی اے کی پرواز 531 سے سکھر سے کراچی کا سفر کیا تھا۔

تفصیلات کے مطابق سکھرپورٹ پر سابق وزیر داخلہ کو وی آئی پی پروٹوکول دیا گیا، احسن اقبال کو دوران پرواز کپتان کو دیا جانے والا کھانا فراہم کیا گیا، ان کو لینے کے لیے گاڑی رن وے پر طیارے کے قریب بھی آئی۔

رپورٹ کے مطابق مسافروں کو کھانے میں سینڈوچ فراہم کیے گئے تاہم احسن اقبال کو کپتان کو دئیے جانے والا اسپیشل کیک دیا گیا۔

نمائندہ اے آر وائی نیوز کے مطابق احسن اقبال کو لینے کے لیے گاڑی طیارے کے قریب رن وے پر آئی، سابق وزیر داخلہ کو ڈبل کیبن گاڑی میں ایئرپورٹ سے لے جایا گیا۔

سابق وزیر داخلہ پی آئی اے کی پرواز 531 میں سکھر سے کراچی سفر کیا۔

ن لیگ کے مرکزی رہنما گزشتہ روز سکھر پہنچے تھے جہاں سے وہ کشمور اور شکار پور گئے اور مختلف پروگرامز میں شرکت کی۔

نمائندہ اے آر وائی نیوز کے مطابق میڈیا پر وی آئی پی پروٹوکول کی ویڈیو نشر ہونے کے بعد انتظامیہ حرکت میں آگئی ہے اور اس کی تحقیقات کے لیے کمیشن بنایا جائے گا۔

پی آئی اے کا ردعمل

ترجمان پی آئی اے کا کہنا ہے کہ تحقیقات میں کوئی غیر معمولی بات سامنے نہیں آئی اور نہ ہی احسن اقبال کو وی آئی پی پروٹوکول دیا گیا ہے، مسافروں کے لیے بس اور کوسٹرز دونوں استعمال کی جاتی ہیں۔