اسلام آباد: سابق وزیراعظم اور مسلم لیگ ن کے سینئر نائب صدر شاہد خاقان عباسی نے کہا ہے کہ جب سیاست پیچھے رہ جاتی ہے تو اس کی جگہ آمریت آجاتی ہے، موجودہ حالات میں سیاسی جماعتوں پر بڑی ذمہ داری ہے۔
تفصیلات کے مطابق مسلم لیگ ن کے سینئر نائب صدر شاہد خاقان عباسی نے اے آروائی نیوز کے پروگرام ’سوال یہ ہے‘ میں گفتگو کرتے ہوئے کہا کہ فوج قومی مفاد کی بات کرتی ہے ان کی اپنی سوچ ہوتی ہے، معیشت کا تباہ ہونا، مہنگائی بہت خطرناک بات ہے۔
شاہد خاقان عباسی نے کہا کہ معیشت خراب ہو تو انارکی پھیلتی ہے پھر آمریت آتی ہے، پارٹی کی تنظیم نو کا عمل 4 سے 5 ماہ سے چل رہا ہے، پارٹی کے اندر الیکشن سے تفریق پیدا ہوتی ہے۔
مزید پڑھیں: شاہد خاقان عباسی اور مفتاح اسماعیل سمیت 7 افراد کے نام ای سی ایل میں شامل
مسلم لیگ ن کے سینئر نائب صدر نے کہا کہ پارٹی کے اندر الیکشن سے تفریق پیدا ہوتی ہے، دنیا میں کوئی بھی جماعت پارٹی الیکشن نہیں کراتی، الیکشن پارٹی کے لیے نقصان دہ ہوتا ہے۔
انہوں نے کہا کہ شاہد خاقان یا شہباز شریف کو نہیں ووٹ نواز شریف کو پڑتا ہے، ہماری جماعت نے ایک شخص کو چیئرمین پی اے سی کے لیے تجویز کیا ہے، اپوزیشن فیصلہ کرے گی چیئرمین پی اے سی کسے لگایا جائے۔
شاہد خاقان عباسی نے ایک بار پھر کہا کہ این آر او سوچنے والوں پر بھی لعنت ہو، این آر او جمہوریت میں ممکن ہی نہیں ہے، این آر او کوئی مانگ رہا ہے نہ کوئی مانگ سکتا ہے۔