کراچی : پی آئی اے انتظامیہ نے ادارے کو سیاست سے پاک کرنے کیلئے فیصلہ کیا ہے کہ اب کسی ملازم نے کوئی سیاسی دباؤ یا اثر و رسوخ استعمال کیا تو سخت کارروائی کی جائے گی۔
تفصیلات کے مطابق پی آئی اے انتظامیہ نے بڑا فیصلہ کرتے ہوئے ادارے کو سیاست سے پاک کرنے کا عزم کیا ہے، پی آئی اے میں کوئی بھی سیاسی دباؤ یا اثر و رسوخ برداشت نہیں کیا جائے گا اگر کوئی بھی ملازم اس میں ملوث پایا گیا تو سخت کارروائی عمل میں لائی جائے گی۔
چیف ایچ آر کی جانب سے حکم نامہ جاری کردیا گیا، حکم نامہ کی کاپی اے آروائی نیوز کو موصول ہوگئی، حکم نامہ میں کہا گیا ہے کہ پی آئی اے میں کچھ ملازمین تبادلہ اور تقرریوں کیلئے سیاسی اثر رسوخ استعمال کرتے ہیں، اب کوئی بھی ملازم سیاسی اثر رسوخ استعمال کرتے ہوئے پایا گیا تو اس کے خلاف سخت کاروائی عمل میں لائی جائے گی۔
سیاسی اثر رسوخ استعمال کرنا پی آئی اے میں قوانین کی سنگین خلاف ورزی ہے، پی آئی اے انتظامیہ کا کہنا ہے کہ پی آئی اے کے شعبہ ہیومن ریسورسز کی جانب سے جاری کردہ حکم نامہ میں غیر قانونی عمل کی حوصلہ شکنی ہوگی۔
کوئی ملازم براہ راست یا دیگر ذرائع سے اثر و رسوخ استعمال کرتے ہوئے پایا گیا تو اس کے خلاف سخت کاروائی کی جائے گی، اگر کسی ملازم کو تحفظات ہیں تو وہ کمیٹی کو انتظامیہ کی کمیٹی کو آگاہ کرے۔