کراچی: ایم کیو ایم پاکستان آج کراچی میں عوامی طاقت کا مظاہرہ کرے گی، جلسے کے لیے انتظامات کو حتمی شکل دی جا رہی ہے۔
تفصیلات کے مطابق متحدہ قومی موومنٹ پاکستان کی جانب سے آج مزار قائد سے متصل باغ جناح میں جلسہ منعقد کیا جا رہا ہے۔
ایم کیو ایم پاکستان کے سربراہ خالد مقبول صدیقی نے عوام سے اپیل کی ہے کہ وہ جلسہ عام میں شرکت کریں۔
خالد مقبول صدیقی نے کہا کہ آج کا جلسہ شہری عوام کے غصب شدہ حقوق اور ان کے ساتھ جاری ظلم وزیادتیوں کے خلاف اہم سنگ میل ہے۔
ایم کیو ایم پاکستان شعبہ خواتین کی جانب سے جلسہ عام کے سلسلے میں گھر گھر رابطہ مہم کے ذریعے بزرگوں، نوجوانوں اور خواتین سے ملاقاتیں کرکے جلسہ عام میں شرکت کی دعوت دی گئی۔
جلسے سے متعلق ایم کیوایم کے کارکنان کی جانب سے چھوٹی بڑی ریلیاں بھی نکالی گئیں، جلسہ گاہ کو ایم کیو ایم کے پرچم، بینرز اور پینافلکس اور اسکرین لگا کر سجا دیا گیا۔
