Tag: سیاسی ملاقاتوں

اسلام آباد: ملک میں سیاسی ملاقاتوں کا سلسلہ جاری ہے، خالد مقبول صدیقی کی قیادت میں متحدہ کے وفد نے وزیراعظم نواز شریف سے اہم ملاقات کی اورالطاف حسین کا خصوصی پیغام وزیراعظم کو دیا۔

ملاقات میں ملک کی موجودہ صورت حال اور پاکستان عوامی تحریک کے ساتھ رابطوں اور مذاکرات سے متعلق تبادلہ خیال کیا گیا جبکہ موجودہ سیاسی بحران کے حل کیلئے کوششوں پر بات چیت کی گئی۔

ملک میں بڑھتے سیاسی عدم استحکام کے باعث جمہوریت پسند قوتوں کی ملاقاتوں میں اضافہ ہوگیا ہے، ایک جانب دھرنے والوں کو منانے کی کوششیں جاری ہیں تو دوسری جانب مشاورت کا سلسلہ بھی چل نکلا ہے۔

سیاسی بحران کو ٹالنے کیلئے ایم کیو ایم بھی کوششوں میں مصروف ہے، خالد مقبول صدیقی کی سربراہی میں متحدہ قومی موومنٹ کے وفد نے وزیر اعظم نواز شریف سے ملاقات کی، ملاقات میں پرویز رشید اوراسحاق ڈار بھی شریک تھے جبکہ ایم کیو ایم کے وفد میں خالد مقبول صدیقی، فاروق ستار، بابر غوری اور حیدر عباس رضوی شامل ہیں۔