سیالکوٹ : پی آئی اے کی سیالکوٹ سے لندن کیلئے پہلی پرواز پی کے777لندن پہنچ گئی، لندن کے ہیتھرو ایئرپورٹ پر پاکستانی ڈپٹی ہائی کمشنر محمد ایوب اور کنٹری منیجر نے مسافروں کا استقبال کیا۔
تفصیلات کے مطابق سیالکوٹ اور لندن کے درمیان قومی ائرلائنز پی آئی اے کی براہ راست ہفتہ وار پہلی پرواز لندن پہنچ گئی، پہلی پرواز کے مسافروں کا شاندار استقبال کیا گیا۔
لندن پہنچنے والے مسافروں کو گلدستے پیش کیے گئے۔ اس موقع پر پی آئی اے کی تاریخ میں پہلی مرتبہ ہیتھرو ائیرپورٹ انتظامیہ کے اعلی افسران بھی موجود تھے۔
میڈیا سے گفتگو کرتے ہوئے ڈپٹی ہائی کمشنر محمد ایوب نے کہا کہ سیالکوٹ سے لندن کیلئے پی آئی اے کی پروازوں کیلئے پاکستانی مسافروں کو سفری سہولت میسر آئی ہے۔
وزیراعظم عمران خان کے وژن کے مطابق پی آئی اے ترقی کی جانب گامزن ہے اور بہت جلد یہ اپنا مقام دوبارہ سے حاصل کرے گی۔
ڈپٹی ہائی کمشنر کا مزید کہنا تھا کہ سیالکوٹ سے لندن کیلئے پروازیں شروع ہونے سے آزاد کشمیر اور اس کے اطراف کے علاقوں کو سب سے زیادہ فائدہ ہوگا، پاکستانی ہم وطنوں کو ایک بہتری سفری سہولت میسر آئے گی۔
قبل ازیں سیالکوٹ اور لندن کے درمیان قومی ائرلائنز پی آئی اے کی براہ راست ہفتہ وار پہلی پرواز پی کے777 کے مسافروں کو سیالکوٹ ایئر پورٹ سے وزیر اعظم کے مشیر عثمان ڈار، پی آئی اے کے ہیڈ آف سیکورٹی اینڈ ویجلینس ایئر کموڈور شاہد قادر، چیئرمین سیال ندیم انور قریشی ،چیف ایگزیکٹو آفیسر میجر جنرل (ر) محمد عابد نذیر، اسٹیشن مینیجر پی آئی اے طارق گلزار اور دیگر حکام نے مسافروں کو الوداع کیا تھا۔ گزشتہ ایک سال کے دوران یہپی آئی اے کا یہ دسواں نیا روٹ ہے۔
اس حوالے سے وفاقی وزیر ہوابازی غلام سرور خان نے اپنے پیغام میں کہا کہ سیالکوٹ سے لندن کیلئے ہفتہ وار پروازیں آپریٹ کی جارہی ہیں جس سے سیالکوٹ اور ملحقہ علاقوں میں رہنے والے اوور سیز پاکستانیوں کو بہت آسانی میسر آئے گی۔
غلام سرور خان کا مزید کہنا ہے کہ سیالکوٹ تا لندن پروازوں سے پی آئی اے کے ریونیو میں مزید اضافہ ہوگا اور پروازویں شروع ہونے سے بالخصوص کارگو بزنس کو فروغ ملے گا۔
پی آئی اے کے سی ای او ایئر مارشل ارشد ملک نے کہا ہے کہ ہمیں دلی مسرت ہے کہ ہماری یہ کوشش کامیاب رہی۔ اس سلسلے میں
تعاون پر ہم وفاقی وزیر ہوابازی غلام سرور خان کے بے حد مشکور ہیں۔ دریں اثناء پرواز صبح لندن سے سیالکوٹ کی پہلی پرواز پی کے778 بھی پہنچ گئی جس کی آمد پر واٹر سلیوٹ پیش کیا گیا۔
