اگر آپ کو چاکلیٹ کھانا پسند ہے تو خوش ہوجائیے کیونکہ ماہرین کے مطابق ناشتہ میں چاکلیٹ کھانا آپ کی دماغی صلاحیت میں اضافہ اور وزن میں کمی کر سکتا ہے۔

یہ تحقیق نیویارک کی ایک یونیورسٹی میں کی گئی جہاں 23 سے 80 سال تک کی عمر کے 968 افراد کا جائزہ لیا گیا۔ ان لوگوں نے ایک عرصہ تک اپنے ناشتہ میں چاکلیٹ کا استعمال کیا۔

اس سے قبل بھی تل ابیب کے طبی ماہرین نے تحقیق پیش کی تھی کہ وہ ایک طویل عرصہ تک روز صبح ناشتہ میں چاکلیٹ کا استعمال کرتے رہے۔ اس سے ان کی دماغی کارکردگی میں اضافہ ہوا ور وہ اپنے کام کو بہتر طریقے سے کرنے میں کامیاب رہے۔

طبی ماہرین کے مطابق جب آپ صبح سو کر اٹھتے ہیں تو آپ کے دماغ کو فوری طور پر توانائی کی ضرورت ہوتی ہے۔ اس وقت آپ جو بھی غذا کھاتے ہیں وہ آپ کے دماغ کو توانائی پہنچانے میں صرف ہوجاتی ہے۔

مزید پڑھیں: باقاعدگی سے چاکلیٹ کھانا دماغی کارکردگی بڑھانے میں معاون

اس کے برعکس دن کے درمیانی حصہ میں ہم جو بھی کھاتے ہیں وہ ہمارے جسم کا حصہ بن جاتی ہے اور ذخیرہ ہوکر چربی پیدا کرنے کا سبب بنتی ہے۔

ایک عام تصور یہ بھی ہے کہ چاکلیٹ وزن میں اضافہ کا سبب بن سکتا ہے جبکہ ڈائٹنگ کرنے والے افراد چاکلیٹ کھانا چھوڑ دیتے ہیں، تاہم تحقیق کے مطابق چاکلیٹ وزن میں کمی کرنے کے لیے بھی معاون ہے۔

ماہرین کا کہنا ہے کہ اگر آپ صبح 9 بجے سے قبل زیادہ مقدار میں چاکلیٹ کھائیں گے تو وہ آپ کو نقصان نہیں پہنچائے گی۔ لیکن اگر اس کے بعد آپ کم مقدار میں بھی چاکلیٹ کھائیں گے تو وہ آپ میں موٹاپے کا سبب بنے گی۔

ماہرین کے مطابق چاکلیٹ میں وہی فائدہ مند اجزا پائے جاتے ہیں جو بغیر دودھ کی چائے، اور پودوں پر لگنے والے پھلوں جیسے انگور اور سیبوں میں پائے جاتے ہیں۔

اگر آپ چاکلیٹ کھانے کے شوقین ہیں تو اسے پڑھ کر یقیناً آپ بہت خوش ہوں گے۔ سیاہ چاکلیٹ گو کہ کھانے میں تھوڑی سی کڑوی ہوتی ہے مگر اس کے بے شمار فائدے ہیں۔

سیاہ چاکلیٹ میں ایپی کیچن نامی مادہ موجود ہوتا ہے جو صحت کے لیے بے حد فائدہ مند ہے۔ یہ مادہ سفید یا بھوری چاکلیٹ میں موجود نہیں ہوتا اور یہی مادہ سیاہ چاکلیٹ کو صحت کے لیے فائدہ مند بناتا ہے۔ آئیے جانتے ہیں کہ بلیک چاکلیٹ میں ایسے کیا فوائد موجود ہیں۔

یہ آنتوں اور رگوں کے لیے فائدہ مند ہے۔

یہ آپ کی خون کی روانی کو بہتر بناتا ہے۔

اس سے دل کی کارکردگی بہتر ہوتی ہے۔

یہ مسلز کے سیلز کی کارکردگی میں اضافہ کرتا ہے اور وہ زیادہ آکسیجن کو خون میں پمپ کرتے ہیں۔

ماہرین کے مطابق اگر کھلاڑی اپنی ٹریننگ کے دوران سیاہ چاکلیٹ کا استعمال کریں تو ان کی قوت میں اضافہ ہوگا۔

البتہ کچھ ماہرین کا کہنا ہے کہ چونکہ چاکلیٹ سے وزن میں اضافہ ہوتا ہے چنانچہ یہ کھلاڑیوں کی کارکردگی پر اثر انداز ہوسکتی ہے۔ اس بارے میں طبی ماہرین تذبذب کا شکار ہیں۔

تحقیق کے مقصد کے لیے جب سائیکلسٹوں کو 2 ہفتے تک سیاہ چاکلیٹ کا استعمال کروایا گیا تو ریس کے دوران ان کی کارکردگی میں اضافہ دیکھا گیا۔ ان کے تھکنے میں کمی آئی، انہوں نے آکسیجن کا استعمال کم کیا اور یوں وہ زیادہ دور تک جانے میں کامیاب ہوئے۔

لیکن خیال رہے کہ روزانہ سیاہ چاکلیٹ کی بار کھانا قطعی فائدہ مند نہیں۔ ہفتے میں 3 سے 4 دفعہ صرف 40 گرام چاکلیٹ ہی یہ سارے کام کر سکتی ہے۔