کراچی : یورپی یونین نے وزیر اعلیٰ سندھ سے شفقت حسین کی پھانسی رکوانے کی درخواست کردی، پاکستان میں پھانسی کی سزا بحال کئے جانے بعد یورپی یونین تشویش کا شکار ہے۔
یورپی یونین کے وفد نے وزیراعلیٰ سندھ سید قائم علی شاہ سے ملاقات میں شفقت حسین کی پھانسی روکنے کی درخواست کی ہے۔
یورپی یونین کا مؤقف تھا کہ شفقت حسین کوکم عمری میں پھانسی کی سزا سنائی گئی تھی۔ یورپی یونین کے وفد کی درخواست پروزیر اعلیٰ سندھ کا کہنا تھا کہ درخواست وفاقی حکومت کو بھیجیں گے۔
کراچی : وزیراعلیٰ سندھ سید قائم علی شاہ کی زیر صدارت ایپکس کمیٹی کا اجلاس وزیراعلیٰ ہاؤس میں ہوا۔ تین گھنٹے تک جاری رہنے والے اجلاس میں گورنر سندھ ڈاکٹر عشرت العباد، کورکمانڈر کراچی نوید مختار، ڈی جی رینجرز بلال اکبر، آئی جی سندھ غلام حیدر جمالی، اور صوبائی وزراء شریک ہوئے۔
ذرائع کے مطابق اجلاس میں رینجرز نے سندھ پولیس کے تبادلوں اور تقرریوں پر تحفظات کا اظہار کیا ۔ وزیراعلیٰ سندھ کاکہنا تھا سانحہ صفورہ کے بعد پولیس نے جتنی تیزی سے ملزمان کو گرفتار کیا ،وہ قابل تعریف ہے۔
وزیراطلاعات سندھ شرجیل میمن کاکہنا تھا سندھ میں اڑتالیس مدرسوں کو مشکوک قراردیا گیا ہے، اجلاس کے بارے میں ذرائع کاکہنا ہے کہ قومی ایکشن پلان پر تفصیلی غور کیا گیا اور اجلاس میں وزیراعلیٰ سندھ نے سیکریٹری داخلہ مختار سومرو پر برہمی کا اظہار کیا کہ کالعدم تنظیموں کے 61 افراد کو گرفتار کیوں نہیں کیا گیا۔
ذرائع کے مطابق اجلاس میں رینجرز کی طرف سے سندھ پولیس کے تبادلوں اور تقرریوں پر تحفظات کا اظہار کیا گیا ہے اور کہا گیا ہے کہ پولیس تبادلوں سے قبل ایپکس کمیٹی کو اعتماد میں نہیں لیا جاتا۔
وزیراعلیٰ سندھ کاکہنا تھا کہ دہشت گردوں کے خلاف جاری آپریشن میں اہم کامیابیاں حاصل کی ہیں، خصوصی طور پر سانحہ صفورہ کے بعد پولیس نے جتنی تیزی سے ملزمان کو گرفتار کیا ،وہ قابل تعریف ہے۔
اجلاس کو بتایا گیا کہ کراچی میں کاررائیوں میں مزید تیزی لائی جائے گی اور مشکوک مدرسہ جات کے خلاف بھی کارروائی کی جائے گی ۔
اجلاس سے خطاب کرتے ہوئے وزیراعلیٰ سندھ نے کہا کہ اس وقت حالت جنگ میں ہیں دہشت گردوں کے خاتمے تک جنگ جاری رہے گی ۔
انہوں نے بتایا کہ آئندہ مالی سال میں امن و امان کیلئے 70 ارب روپے کا بجٹ مختص کیا جارہا ہے ،ا جلاس کے بعد میڈیا سے گفتگو کرتے ہوئے وزیراطلاعات سندھ شرجیل میمن کاکہنا تھا کہ اجلاس میں پیٹرول اور ڈیزل کی اسمگلنگ میں ملوث ملزمان کو گرفتار کرنے اور سزائیں دینے کا فیصلہ کیا گیا ہے اور دہشت گردوں کی فنڈنگ کو روکنے کیلئے کارروائی کی جائے گی ۔
انہوں نے کہا کہ سندھ میں 48 مدرسوں کو مشکوک قراردیا گیا ہے اور دیگر مدرسوں کی بھی چھان بین کی جائے گی، شرجیل میمن کاکہنا تھا کہ ایپکس کمیٹی نے کراچی میں امن وامان اور کراچی آپریشن کے حوالے سے اہم فیصلے کئے ہیں اور تمام اداروں کے درمیان مضبوط رابطے ہیں، کوآرڈینیشن کا کوئی فقدان نہیں ہے ۔
کراچی : پاکستان تحریک انصاف کے اراکین سندھ اسمبلی نے وزیراعلیٰ سندھ سید قائم علی شاہ سے ملاقات کی اور کراچی میں پانی کے بحران کے حل کے لئےتجاویز پیش کیں۔
وزیراعلیٰ ہاؤس کراچی میں ہونے والی ملاقات کے بعدتحریک انصاف کے اراکین اسمبلی نےمیڈیا سے گفتگو کرتے ہوئے کہا کہ سندھ حکومت نے ان کے مسائل کو غور سے سنا ہے اور یقین دلایا ہے کہ واٹر بورڈ میں کرپشن اور گھوسٹ ملازمین کا خاتمہ کیا جائے گا۔
پی ٹی آئی اراکین اسمبلی کا کہنا تھا کہ بلدیاتی الیکشن جیتنے کے لئے ایک جماعت نے پانی کا مسئلہ اٹھایا وہ جماعت ہمیشہ حکومت میں شامل رہی مگر اس جماعت نے کبھی بھی پانی کا مسئلہ حل نہیں کیا، اب بلدیاتی الیکشن کی تیاری ہے۔
پی ٹی آئی رہنماءخرم شیر زمان نے کہا کہ اب پانی پر لڑائیاں ہوں گی ، اس لئے کے فور منصوبے پر جلد از جلد کام شروع کیا جائے تاکہ آئندہ سال گرمیوں میں پانی کا بحران ختم ہوسکے۔
کراچی : شہر قائد میں پانی کے بحران پر وزیر اعلیٰ سندھ سید قائم علی شاہ سے ایم کیو ایم کے پانچ رکنی وفد نے ملاقات کی اور پانی کی قلت کو دور کرنے اور فراہمی کو منصفانہ بنانے کے لئے پانچ نکاتی ایجنڈہ پیش کیا۔
ملاقات میں پیپلز پارٹی سے شرجیل میمن ، مراد علی شاہ ، اور سکندر میندھرو جبکہ ایم کیو ایم کی جانب سے خواجہ اظہار الحسن ، کنور نوید جمیل، محمد حسین، سید سردار احمد نے شرکت کی ۔
ملاقات کے بعد میڈیا سے گفتگو کرتے ہوئے خواجہ اظہار الحسن نے کہا کہ وزیر اعلیٰ سندھ نے یقین دہانی کرائی ہے کہ پانی کے بحران پر قابو پانے کے لئے ہر ممکن کردار ادا کریں گے اور پینسٹھ ایم گی ڈی کے حوالے سے جون کے پہلے ہفتے میں ٹینڈر کیا جائے گا۔
اس سے قبل ایم کیوایم کے قائد الطاف حسین نے وزیراعلیٰ سندھ سید قائم علی شاہ سے فون پر گفتگو کی اور کراچی میں امن وامان کی صورتحال اور پانی کے شدید بحران پر تفصیلی تبادلہ خیال کیا۔
پانی کے شدید بحران کے حوالے سے الطاف حسین کا کہنا تھا کہ پانی کےبحران کےباعث کراچی کے شہریوں میں شدید بے چینی پائی جاتی ہے، وزیراعلیٰ شہریوں کوپانی کی فراہمی یقینی بنانے کیلئے اپنا کردار ادا کریں۔
کراچی : وزیر اعلیٰ سندھ سید قائم علی شاہ نے آئی جی سندھ غلام حیدر جمالی کو عہدے سے ہٹا نے سے متعلق خبر کی تردید کردی.
تفصیلات کے مطابق وزیر اعلیٰ سندھ نے صفورہ کے علاقے میں آغا خان کمیونٹی کی بس فائرنگ کے اندوہناک واقعے میں 45 بے گناہ افراد کے جاں بحق ہونے بعد انسپکٹر جنرل آف پولیس سندھ کو ان کے عہدے سے برطرف کرنے کی خبر کی تردید کردی ہے.
قائم علی شاہ کا کہنا تھا کہ میں ایسا کوئی حکم جاری نہیں کیا، جبکہ اے آر وائی کے نمائندے کے مطابق وزیر اعلیٰ ہاؤس کےٹیلی فون نمبر سے آنے والی کال کے ذریعے پیغام دیا گیا تھا کہ آئی جی سندھ غلام حیدر جمالی کو عہدے سے ہٹا دیا گیاہے اور ان کی جگہ ڈی آئی جی سندھ غلام قادر تھیبو کو آئی جی سندھ کا اضافی چارج دے دیا گیا ہے.
تاہم بعد ازاں وزیراعلیٰ سندھ سید قائم علی شاہ نے میڈیا کو بتایا کہ میں ایسا کوئی آرڈر نہیں دیاہے اور آئی جی سندھ غلام حیدر جمالی اپنے عہدے پر برقرار ہیں.
علاوہ ازیں اس سے قبل وزیراعلیٰ سندھ نےغفلت برتنے پر ڈی ایس پی اور ایس ایچ اوکومعطل کردیا تھا، وزیر اعلیٰ سندھ کا کہنا تھا کہ بس کو سیکورٹی کیوں نہیں دی گئی اس کی انکوائری کروائی جارہی ہے۔
کراچی : پنجاب میں توبےشمارترقیاتی منصوبےبن رہے ہیں، لیکن سندھ اوردوسرے صوبے ان پروجیکٹ سے محروم ہیں۔ وزیراعلٰی پجناب شہبازشریف کےمقابلےمیں سندھ کےسائیں کی کارکردگی پرسوال اٹھ رہےہیں۔
شمسی بجلی گھر، میٹرو بس سروس، دانش اسکول پروگرام، آشیانہ اسکیم، پندرہ ارب لاگت سے دیہی روڈز پروگرام اور بے شمار تعمیراتی کام پنجاب میں جاری ہیں۔
وزیراعلیٰ پنجاب نے صوبے میں ترقیاتی منصوبوں کے ڈھیر لگادیے۔ دوسری جانب سید قائم علی شاہ سات سال سے وزیراعلیٰ سندھ کی کرسی پر ڈیرہ جمائے بیٹھے ہیں۔
اس کے باوجود سب سے زیادہ ریونیو دینے والا کراچی کھنڈر بنتا جا رہا ہے۔ سڑکیں، پُل، انڈر پاسز ٹوٹ پھوٹ کا شکار ہیں۔
تو دوسری جانب تھر میں کوئلے سے بجلی بنانے کا منصوبہ، ہو یا پورٹ قاسم پربجلی پراجیکٹ یا کوئی اور سندھ حکومت کا کوئی منصوبہ بھی پایہ تکمیل تک نہیں پہنچ سکاہے۔ اندرون سندھ کے شہری بھی تباہ حالی کا شکار ہیں۔
کراچی : وزیر اعلیٰ سندھ سید قائم علی شاہ نےکہا ہےکہ کراچی کو صوبہ بنانےکا مطالبہ مناسب نہیں،سندھ کی وحدت تاریخی ہے۔
اُن کاکہنا تھا کہ الطاف حسین تو خودکو سندھ کا سپوت کہتےتھے اب کیا ہوا جو انہوں نے سندھ کے بٹوارے کی بات کی۔انہوں نےکہا کہ کراچی کو صوبہ بنانےکی بات بالکل غیر مناسب ہے۔
انہوں نے کہا کہ کنٹونمنٹ بورڈز الیکشن میں پیپلز پارٹی کو کامیابی ملے گی ۔وزیراعلی سندھ نےوفاقی حکومت کو تنقید کا نشانہ بناتے ہوئےکہاکہ بغیرکسی مشورےکے وفاقی حکومت نےسات لاکھ ٹن سستی اور غیر معیاری گندم منگوائی جس کی ضرورت نہیں تھی۔
کراچی : وزیر اعلیٰ سندھ سید قائم علی شاہ نے کہا ہے کہ ذوالفقار مرزاکو پتہ نہیں کیا ہوگیا ہے کہ وہ ایک دم اُبل پڑے ہیں مرزا صاحب پہلے آصف علی زرداری کی مہربانیاں گنواتے تھے اور وزارت جانے کے بعد ہوش گنوا بیٹھے ہیں۔
وزیر اعلیٰ ہاؤس میں لیاقت یونیورسٹی آف میڈیکل اینڈ ہیلتھ سائنسز کے تحت پہلی ڈی این اے لیبارٹری کے قیام کی تقریب کے بعد میڈیا سے بات چیت کرتے ہوئے ان کا کہنا تھا کہ ڈاکٹر فہمیدہ مرزا سپیکر قومی اسمبلی رہی ہیں انھیں سیکیورٹی فراہم کی جائے گی۔
ڈاکٹر ذوالفقار مرزا کا سیکیورٹی کے حوالے سے کوئی خط نہیں ملا یہ خبر میڈیا کے ذریعے مجھ تک پہنچی ہے ، ایک سوال کے جواب میں وزیر اعلیٰ سندھ کا کہنا تھا کہ افسوس کی بات ہے کہ ڈبل سواری کے معاملے پرڈاکٹر فاروق ستار اتنی ناراضگی کا اظہار کر رہے ہیں ۔
ان کا کہنا تھا کہ جب کراچی میں ڈبل سواری پر پابندی لگی تو میں اسلام آباد میں تھا مجھ سے اجازت نہیں لی گئی بعد میں جب پتہ چلا تو اس ڈبل سواری کی پابندی کو سیکیورٹی کی بنیاد پر صرف حلقہ این اے246تک محدود کردیا ۔
انہوں نے کہا کہ سندھ حکومت کی کوشش ہے کہ حلقہ این اے246میں غیر جانبدار اور شفاف انتخابات ہوں جس کیلئے تمام وسائل استعمال کئے گئے اور اس انتخاب میں جو بھی جیتے گا اس کو مبارکباد دیں گے۔
اس سے قبل ڈی این اے لیبارٹری کی تقریب سے خطاب کرتے ہوئے وزیر اعلیٰ سندھ کا کہنا تھا کہ ڈی این اے لیبارٹری سندھ کی ضرورت تھی اکثر حادثات کی صورت میں اسلام آباد اور لاہور کی لیبارٹری سے رجوع کرتے تھے اب سندھ میں قائم ہونے والی یہ ڈی این اے لیب سے آسانی سے ڈی این اے ٹیسٹ کے بروقت تائید لے سکیں گے۔
یونیورسٹی کے وائس چانسلر ڈاکٹر پروفیسر نوشاد شیخ نے بتایا کہ جامشورو میں قائم ہونے والی ڈی این اے لیب اڑتالیس سے باہتر گھنٹے میں ڈی این اے رپورٹ دے سکے گی۔
انھوں نے وزیر اعلیٰ سندھ سے کہا کہ پولیس اور سول افسران کی ٹریننگ کیلئے بھی یہ ڈی این اے لیب موجود ہے جس سے فائدہ اٹھا یا جاسکتا ہے۔
کراچی : سندھ ایپکس کمیٹی نے صوبےمیں اسلحےکی نمائش پرپابندی عائد کرنے کافیصلہ کرلیا۔تفصیلات کے مطابق
وزیر اعلیٰ سندھ سید قائم علی شاہ کی زیر صدارت اپیکس کمیٹی کے اجلاس میں فوجی عدالتوں میں مزید کیس بھجوانے پر غور کیا گیا۔
وزیر اعلیٰ ہاؤس میں وزیر اعلیٰ سندھ سید قائم علی شاہ کی زیر صدارت اپیکس کمیٹی کے اجلاس میں گورنر سندھ ڈاکٹر عشرت العباد، صوبائی وزیر اطلاعات شرجیل میمن، چیف سیکرٹری، آئی جی سندھ غلام حیدر جمالی اور سیکرٹری داخلہ کے علاوہ کور کمانڈر کراچی لیفٹیننٹ جنرل نوید مختار اور ڈی جی رینجرز سندھ میجر جنرل بلال اکبرنے شرکت کی۔
اجلاس میں فیصلہ کیا گیا کہ دہشت گردی کیلئےفنڈنگ کرنےوالے تمام ذرائع روکےجائیں گے،غیرقانونی اسلحہ رکھنےوالوں کےخلاف کارروائی کی جائےگی، یہ بھی فیصلہ کیا گیا کہ فوجی عدالتوں کےمقدمات کی بہترطریقےسےنگرانی کی جائےگی، جبکہ سندھ کےسرحدی علاقوں کی فورس کوفعال کیاجائےگا۔
اجلاس میں فیصلہ کیا گیا کہ سندھ میں مدارس کی رجسٹریشن کےکام میں تیزی لائی جائےگی،غیر ملکی تارکین وطن کےخلاف مؤثرکارروائی ہوگی۔
اس سے قبل وزیر اعلیٰ ہاؤس میں گورنر سندھ ڈاکٹرعشرت العباد اور وزیر اعلیٰ سید قائم علی شاہ کے درمیان ہونے والی ملاقات میں ڈی جی رینجرز میجر جنرل بلال اکبر نے بھی شرکت کی جس میں صوبے خصوصا کراچی میں جاری ٹارگٹڈ آپریشن اور دیگر اہم امور پر تبادلہ خیال کیا گیا۔
کراچی: سیکیورٹی خدشات کے باوجود پیپلزپارٹی نے بلاول ہاؤس اور اطراف سے بیریئرز ہٹانے کا فیصلہ کرلیا۔
پیپلزپارٹی کے شریک چیئرمین آصف علی زرداری نے اپنی ہی صوبائی حکومت کو ہدایت کی ہے کہ وہ بلاول ہاؤس اور اس کے اطراف میں لگے ہوئے تمام بیریئرز کو ہٹادیں۔
پیپلزپارٹی پارلیمنٹرین کی نائب صدر شیریں رحمان کے مطابق بلاول ہاؤس اورا س کے اطراف کے بیریئرز پیپلزپارٹی کے شریک چیئرمین آصف علی زرداری کی ہدایت پر ہٹائے جارہے ہیں۔
واضح رہے کہ اس سے قبل جب ڈی جی رینجرز نے شہر بھر سے بیریئرز ہٹانے کی ہدایت کی تھیں تو اس دوران صوبائی حکومت نے بلاول ہاؤس کے اطراف لگے ہوئے بیریئرز کا دفاع کرتے ہوئے اپنے ہی ماتحت محکمہ داخلہ کے ذریعے ڈی جی رینجرز کو ایک خط لکھا تھا جس میں بیریئرز نہ ہٹانے کا کہا گیا تھا۔
تاہم ذرائع کے مطابق ڈی جی رینجرز نے بیریئرز ہٹانے کے معاملے پر کسی بھی تفریق کو ملحوظ خاطر نہ رکھنے کی ہدایت کی جس کے بعد اب پیپلزپارٹی نے بلاول ہاؤس اور اس کے اطراف رضاکارانہ طور پر بیریئرز ہٹانے کا فیصلہ کیا ہے ۔
وزیراعلیٰ سندھ سید قائم علی شاہ یہ بھی کہہ چکے ہیں کہ بلاول ہاؤس کے اطراف بیریئرز نہیں سیکیورٹی کیلئے پولیس چیک پوسٹ قائم ہیں۔