کراچی : وزیراعلیٰ سندھ سید مراد علی شاہ نے کہا ہے کہ آئی جی سندھ کا معاملہ عدالت میں ہے اور پیپلز پارٹی نے ہمیشہ عدلیہ کا احترام کیا ہے اس لیے کوئی تبصرہ نہیں کروں گا تاہم افسران آتے جاتے رہتے ہیں اس سے نظام میں کوئی فرق نہیں پڑتا۔

یہ تبصرہ آج سیہون میں میڈیا سے گفتگو کرتے ہوئے وزیراعلیٰ سندھ سید مراد علی شاہ نے آئی جی سندھ اے ڈی خواجہ کی برطرفی کے حوالے سے پوچھے گئے سوال کے جواب میں کیا۔

انہوں نے کہا کہ افسران آتے جاتے رہتے ہیں اس لیے نظام میں کوئی فرق نہیں پڑتا کیوں کہ نظام کامیابی سے اپنے امور کی انجام دہی میں مشغول ہے اور سندھ حکومت ایک نظام کے تحت چل رہی ہے کسی ایک شخص پر نہیں۔

درگاہ لعل شہباز قلندر کے دورے پر آئے وزیراعلیٰ سندھ نے بتایا کہ درگاہ کی سیکیورٹی کا خود جائزہ لیا ہے جس کے تحت عرس میں سیکیورٹی کےموثرانتظامات کیے جائیں گے۔

وزیراعلیٰ سندھ نے ایم کیو ایم کے وائٹ پیپر اور پی ایس پی کے دھرنوں پر تبصرہ کرتے ہوئے کہا کہ ایم کیوایم کے دونوں دھڑوں کو اپنے بانی کی کمی محسوس ہو رہی ہے جیسے بانی متحدہ نے نفرتیں پھیلائیں یہ لوگ بھی وہی کر رہے ہیں۔

انہوں نے کہا کہ دونوں دھڑے اپنے بانی کا نام لینا پسند نہیں کرتے مگر طرز سیاست وہی اپنائی جا رہی ہے جب کہ وائٹ پیپر محض تعصب پرمبنی ہے اور اس میں کوئی سچائی نہیں ہے کیوں کہ ایم کیوایم پاکستان کو تو یہ بھی معلوم نہیں کہ سندھ میں 6 ڈویژن ہیں۔

کراچی: وزیراعلیٰ سندھ کے پرنسپل سیکریٹری کے جعلی دستخط سے بورڈ آف ریونیو میں 3 کلرکس کی بھرتیوں کا انکشاف ہوا ہے جس کی انکوائری کے لیے چیف سیکریٹری کو ہدایات جاری کردی گئیں۔

تفصیلات کے مطابق وزیر اعلیٰ سندھ سید مراد علی شاہ کے پرنسپل سیکریٹری کے جعلی دستخط سے محکمہ ریونیو میں بھرتیوں کا انکشاف ہوا ہے جس پر نوٹس لیتے ہوئے وزیراعلیٰ نے تحقیقات کے لیے چیف سیکیرٹری کو ہدایات جاری کردیں ہیں۔

ذرائع کے مطابق تینوں بھرتیوں کے لیے اپائنمنٹ لیٹرز وزیر اعلیٰ ہاؤس سے اس دوران جاری ہوئے جب پرنسپل سیکریٹری تعطیلات پر تھے، ان کی غیر موجودگی میں ان کے دستخط سے ہونے والی اپائنمنٹ نے بھرتیوں کا بھانڈہ پھوڑ دیا۔

وزیر اعلیٰ سندھ نے جعلی دستخط سے ہونے والی بھرتیوں پر سخت برہمی کا اظہار کرتے ہوئے چیف سیکریٹری سندھ رضوان میمن کو تحقیقات کے لیے ہدایات جاری کرتے ہوئے جلد از جلد رپورٹ جمع کرانے کا حکم دیا ہے جس کی روشنی میں ذمہ داروں کے خلاف سخت سے سخت کارروائی کی جائے گی۔

وزیر اعلیٰ سندھ نے تمام محکموں کے سربراہان کو ہدایت جاری کی گئی ہے کہ اگر میرے یا میرے اسٹاف کی جانب سے کسی کے پاس ملازمت کے لیے ایسا خط آئے تو عمل نہ کیا جائے کیوں کہ وزیر اعلیٰ ہاؤس سے ملازمتوں کے لیے براہ راست خط جاری نہیں کیے جاتے۔

واضح رہے کہ سندھ میں جعلی بھرتیوں اور نو سربازوں کی جانب سے عوام کو لوٹنے کے واقعات کے سدباب کے لیے موجودہ متحرک وزیر اعلیٰ سندھ نے اہم اقدامات اُٹھائے ہیں جس سے جعلی بھرتیوں کے واقعات میں نہ صرف یہ کہ کمی آئی ہے بلکہ اب جعلی بھرتیاں فوری گرفت میں بھی آجاتی ہیں۔