کراچی : وزیراعلیٰ سندھ سید مراد علی شاہ نے کہا ہے کہ صوبہ میں کرپشن اور بیڈ گورننس کا تاثر ہے لہذا نئی کابینہ نے ملکر اچھی حکمرانی قائم کر کے اس تاثر کو ختم کرنا ہے۔

یہ بات سندھ کے نو منتخب وزیر اعلٰی سید مراد علی شاہ نے آج وزیراعلیٰ ہاوٴس کابینہ کے پہلے اجلاس کی صدارت کرتے ہوئے کہی، انہوں نے کہا کہ ان کی حکومت کو بہت سے چیلنجز کا سامنا ہے اور سب سے اہم چیلنج صوبہ سندھ سے کرپشن اور بیڈ گورننس کے تاثر کا خاتمہ ہے اور یہ کوئی بڑا کام نہیں ہے ہمیں اپنے کام ایمانداری کے ساتھ اور عمل میں شفافیت دکھانا ہوگی۔

انہوں نے مزید کہا کہ ہم سندھ کی عوام کو جوابدہ ہیں، ہم اپنی پارٹی قیادت کو جوابدہ ہیں اور سب سے بڑھ کر ہم اللہ تعالیٰ کو جوابدہ ہیں لہذا ہمارا عمل اور کارکردگی شفاف ہونا چاہیے اگر ہم محنت اور ایمانداری کے ساتھ سندھ کے عوام کے مفاد میں کام کریں گے تو کوئی بھی ہم پر انگلی نہیں اٹھا سکتا۔

یہ خبر پڑھیے : وزیر اعلیٰ سندھ مراد علی شاہ نے اپنے عہدے کا حلف اُٹھا لیا

اپنی ترجیحات سے کابینہ کو آگاہ کرتے ہوئے سید مراد علی شاہ نے کہا کہ ہر شعبہ میں میرٹ ان کی اولین ترجیح ہے اگر آپ اپنے فیصلے میرٹ پر کریں گے تو تمام غلط تاثرات اور پروپیگنڈ ے خود بہ خود زائل ہو جائیں گے،دوسرے وہ تمام وزراء کومکمل اختیارات دیں گے اور پھر کارکردگی پر رپورٹ بھی لوں گا۔

انہوں نے کہا کہ میں کابینہ کو فری ہینڈ دونگا تو لازماً بہتر نتائج کی توقع بھی رکھونگا،میری کابینہ کا ہروزیر اپنے محکمے کا چیف منسٹر ہے لہذا وہ مکمل اعتماد اور اتھارٹی کے ساتھ کام کرے۔

یہ خبر بھی پڑھیں : وزیر اعلیٰ نے ٹیم چن لی، 8 مرد ایک خاتون وزیر اور چار مشیران کا تقرر

سید مراد علی شاہ نے تمام صوبائی وزراء کو ہدایت کی کہ وہ جب اپنے فیلڈ ٹرپس پر ہوں تو وہ پولیس اسٹیشن ، اسپتالوں ، اسکولوں اور دیگر صوبائی دفاتر کے دورے کریں اور اپنی تحقیق رپورٹس متعلقہ وزراء کو بھیجیں، وزراء اس پر کاروائی کرنے کے پابند ہونگے اور یہی ہماری مشترکہ کوششیں سرکاری محکموں کی کارکردگی کو بہتر بنائیں گی۔

وقت کی پابندی کے لیے مشہور اور صبح سویرے بیدار ہونے والے وزیراعلیٰ سندھ نے کابینہ کے تمام اراکین پر زور دیا کہ وہ اپنے دفاتر میں باقاعدگی کے ساتھ آئیں اور عوام کے مسائل کا تدراک کریں، انہوں نے کہا کہ اگر آپ اپنے دن کا آغاز بروقت کریں گے تو آپ دیگر کام بھی بہتر طریقے سے کرسکیں گے۔

نومنتخب وزیر اعلیٰ نے اپنی کابینہ سے پہلے خطاب میں اپنا تجربہ بیان کرتے ہوئے کہا کہ یہ انکی پریکٹس اور تجربہ رہا ہے کہ وقت کی پابندی اور نظم و ضبط سے کارکردگی میں بہتری آتی ہے اس لیے وزراء اپنے اپنے محکموں میں نظم و ضبط کو یقینی بنائیں۔

اس موقع پر کابینہ کے اراکین نے وزیراعلیٰ سندھ پر اپنے بھرپور اعتماد کا اظہار کیا اور انہیں یقین دلایا کہ وہ نئے وزیراعلیٰ کی پالیسیوں اور گائیڈ لائنز کو فالو کریں گے۔

کراچی : تحریک انصاف کے رکن سندھ اسمبلی خرم شیر زمان، قائم علی شاہ اور دیگر اراکین اسمبلی نے نئے وزیراعلی کو مباکباد پیش کی اور سندھ کے مسائل کی جانب توجہ دلاتے ہوئے اِن مسائل کے حل کے لیے ہر ممکن تعاون کا یقین دلایا۔

وزارت اعلیٰ کیلئے مراد علی شاہ کے مد مقابل پی ٹی آئی کے رکن خرم شیر زمان نے سندھ اسمبلی میں خطاب کرتے ہوئے نو منتخب وزیر اعلیٰ مراد علی شاہ کو وزیر اعلیٰ منتخب ہونے پر تحریک انصاف کی طرف سے مبارک باد پیش کی ,انہوں نے کہا کہ نئے وزیراعلیٰ سے تعلیم،کرپشن کے خاتمے اور صحت کی بہتری کے لیے کام کرنے کی امید ہے جب کہ سندھ میں امن عامہ کی بحالی کے لیے سندھ رینجرز کو اختیارات دلوانے میں بھی کامیاب ہو جائیں گے۔

قبل ازیں سابق وزیراعلیٰ سندھ قائم علی شاہ نے اسمبلی میں خطاب کرتے ہوئے کہا کہ  وہ اپنے دوست اور پرانے ساتھی اور سابق وزیر اعلیٰ سندھ سید عبداللہ شاہ کے فرزند مراد علی شاہ کو وزیر اعلیٰ سندھ بننے پر مبارک باد دیتے ہیں اس منصب کے لیے سید مراد علی شاہ کی نامزدگی ہماری لیڈر شپ کی کی چوائس ہے جب کہ ایوان کی اکثریت بھی سید مراد علی شاہ کے حق میں ہے اس طرح وہ اکثریت کے وزیر اعلی ہیں اور سب کے لیے قابل قبول ہیں۔

ایم کیوایم کے رہنما سید سرداراحمد کاسندھ اسمبلی میں خطاب کرتے ہوئے کہنا تھا کہ مرادعلی شاہ کووزیراعلیٰ منتخب ہونے پرمبارک باد دیتے ہیں،ان سے کئی توقعات ہیں،نئے وزیراعلیٰ کو کئی چیلنجز کا سامنا کرنا پڑے گا۔

ذوالفقار مرزا کے صاحبزادے اور رکن سندھ اسمبلی حسنین مرزا نے اسمبلی کے باہر میڈیا سے بات چیت کرتے ہوئے کہا ہے کہ وزیر اعلیٰ سندھ کی تبدیلی خوش آئند ہے، رینجرزبھی سندھ میں امن و امان کے لیےکام کررہی ہے اس وقت حکومت اور قانون نافذ کرنے والےاداروں میں تصادم کی صورتحال ہے، سندھ کی نئی کابینہ کو یہ مسائل درپیش ہوں گے۔

رؤف صدیقی کا مراد علی شاہ کے وزیر اعلیٰ سندھ منتخب ہونے کے بعد سندھ اسمبلی میں خطاب کرتے ہوئے کہنا تھا کہ مراد علی شاہ نے ایم کیو ایم کے ووٹنگ میں حصہ نہ لینے کے باوجود متحدہ قومی موومنٹ کے ارکان اسمبلی سے ملاقات کی اور مجھ اسیر رکن اسمبلی کے پاس بھی چل کر آئے اور خیریت دریافت کی جو انکسارانہ اور بہت اچھا اقدام ہے۔

سینیر صوبائی وزیر نثار کھوڑو  مراد علی شاہ کو سندھ کا وزیر اعلیٰ منتخب ہونے کے بعد سندھ اسمبلی میں خطاب میں انہیں مبارکباد پیش کی، ان کا کہنا تھا کہ بہت باتیں ہوتی تھیں کہ پارٹی میں کتنے ناراض ہیں، آج ہم نے دکھادیا کہ سیسہ پلائی دیوار ہیں، پیپلز پارٹی مقابلے کی سکت رکھتی ہے،تا ہم مراد علی شاہ کو ابھی بہت کام کرنا ہے۔