کراچی: سندھ سیف سٹی کیمرے اپنی ٹیسٹنگ پیریڈ میں الرٹس کامیابی سے بھیج رہے ہیں، گزشتہ 21 روز میں 15 گرفتاریاں اور مقدمات درج کر کے گاڑیاں ضبط کی گئیں، جب کہ اسنیچر گینگ کی گرفتاری اور ہزاروں الرٹس بھی جاری ہوئے۔
تفصیلات کے مطابق ڈی جی سیف سٹی آصف اعجاز شیخ کا کہنا ہے کہ سیف سٹی پراجیکٹ کے کیمروں کی ٹیسٹنگ کے دوران 21 روز میں اسنیچر گینگ کی گرفتاری اور ہزاروں الرٹس جاری ہوئے ہیں۔
ڈی جی سیف سٹی اتھارٹی آصف اعجاز شیخ نے بریفنگ میں بتایا کہ اب تک 12 سائٹس پر 57 کیمرے ورکنگ پوزیشن میں آچکے ہیں، اور اکیس روز میں 5 ہزار سے زائد ٹریفک خلاف ورزیاں شناخت کی گئیں، کیمروں نے 1 ہزار 39 کاروں اور 1 ہزار 516 موٹر سائیکلوں کا الرٹ جاری کیا،۔
آصف اعجاز کے مطابق جن خلاف ورزیوں کے بارے میں الرٹ موصول ہوئیں ان میں ڈبل پارکنگ، فیک نمبر پلیٹ، فاسٹ ٹریک کی خلاف ورزیاں، اور نو اینٹری، نو پارکنگ، ون وے، اوورلوڈنگ، بغیر ہیلمٹ الرٹ، دوران سفر موبائل کا استعمال، سیٹ بیلٹ اور دیگر خلاف ورزیاں شامل ہیں۔
ڈی جی کا کہنا تھا کہ سیف سٹی پراجیکٹ کے کیمروں نے 20 جنوری سے کام شروع کیا تھا، اب تک 4 ہزار 616 چوری شدہ کار موٹر سائیکلوں کو شناخت کیا جا چکا ہے، اور 5 ماہ میں 2 ہزار 918 چوری شدہ کار موٹر سائیکلوں کا الرٹ جاری ہوا ہے۔
اسمارٹ کیمروں نے 5 ہزار 538 جعلی نمبر پلیٹس کی شناخت بھی کی، کیمروں نے چہرے کی مدد سے 72 انتہائی مطلوب ملزمان کا الرٹ بھی جاری کیا، کریمنل ڈیٹا میں موجود 2 ہزار 487 چہروں کو بھی شناخت کیا گیا، جب کہ بینک سے رقم لے کر نکلنے والے شہری کو لوٹنے والے گینگ کو پکڑا گیا۔
آصف اعجازشیخ کے مطابق ڈاکوؤں نے کار پر 4 دن میں 3 مرتبہ نمبر پلیٹ تبدیل کی پھر بھی پکڑے گئے، جلد مزید کیمرے اور سائٹس ورکنگ پوزیشن میں آ جائیں گے۔
