Tag: سیلاب متاثرہ علاقوں

دادو: سیلاب متاثرہ علاقوں میں گیسٹرو ڈائریا اور ملیریا نے وبائی صورت اختیار کرلی اور ایک ہی گھر کے 3 بچے جان کی بازی ہارگئے۔

تفصیلات کے مطابق سندھ کے سیلاب متاثرہ علاقوں میں موت کا رقص جاری ہے ، گیسٹرو اور خون کی کمی سے ایک ہی گھر کے 3 بچے جان کی بازی ہارگئے۔

سیتاروڈ کے علاقے میں گیسٹرو اور خون کی کمی سے3بہن بھائی چل بسے، گاؤں نظام آباد کے مزدور بشیر احمد کے 3 بچے گیسٹرو اور ملیریا میں مبتلا تھے۔

2 دن کے دوران شہری بشیر احمد کی 2 بیٹیاں اور ایک بیٹا وبا کے شکار بنے۔

دوسری جانب 15روز کے دوران سول اسپتال میں گیسٹرو کے 1755 مریض لائے گئے ، جس میں 5 سال سےکم عمر کے 288بچے شامل ہیں۔

سکھر کے سول اسپتال میں ملیریا کے مرض میں مبتلا 445 مریض بھی داخل کیے گئے۔

گزشتہ 24 گھنٹے کے دوران مختلف اضلاع میں 9 سیلاب متاثرین دم توڑ گئے جبکہ یکم جولائی سے انیس ستمبر تک 318 سیلاب متاثرین انتقال کر چکے ہیں۔

راولپنڈی : پاک فوج کی سیلاب متاثرہ علاقوں میں امدادی سرگرمیاں بھرپور انداز سے جاری ہیں،24 گھنٹوں میں ایک ہزار 991 افراد کو محفوظ مقامات پر منتقل کیا گیا۔

تفصیلات کے مطابق پاکستان کی فوج کے شعبہ تعلقاتِ عامہ (آئی ایس پی آر) کی جانب سے بیان میں کہا گیا ہے کہ پاک فوج کی سیلاب متاثرہ علاقوں میں امدادی سرگرمیاں تیزی سے جاری ہے۔

پاک فوج کے ترجمان نے کہا آرمی ہیلی کاپٹرز کے ذریعے سیلاب متاثرین کی محفوظ مقامات پر منتقلی کیلئے 200 سے زائد پروازیں ہوئیں، جس کے دوران ہیلی کاپٹرز کے ذریعے امدادی سامان اور راشن بھی منتقل کیا گیا۔

آئی ایس پی آر نے بتایا کہ گزشتہ24 گھنٹے میں 1991متاثرہ افراد کی محفوظ مقامات پر منتقلی سمیت 162 ٹن سے زائد امدادی سامان تقسیم کردیا گیا۔

ترجمان کے مطابق سیلاب متاثرہ علاقوں سے اب تک مجموعی طور پر 50 ہزار سے زائد افراد کو محفوظ مقامات تک منتقل کیا جا چکا ہے۔

آئی ایس پی آر کا کہنا ہے کہ ملک بھر میں 147ریلیف کیمپ 24 گھنٹے کام کررہے ہیں، اب تک 60 ہزار سے زائد مریضوں کا میڈیکل کیمپوں میں علاج کیا جا چکا ہے۔

دوسری جانب سیلاب متاثرہ علاقوں کیلئے عطیات وصولی کے قائم کردہ 221 کلیکشن پوائٹنس پر 1350 ٹن سے زائد خوراک، ادویات اور دیگر سامان اکٹھا کیا گیا۔

اسلام آباد : موبائل فون کمپنیوں نے سیلاب متاثرہ علاقوں میں مفت کالز کی سروس شروع کردی، اب بیلنس نہ ہونے کی صورت میں صارفین آن نیٹ کال کرسکیں گے۔

تفصیلات کے مطابق پی ٹی اے کی ہدایت پر سیلاب متاثرہ علاقوں میں مفت کالز کی سہولت فراہم کردی گئی۔

موبائل فون کمپنیوں نے مفت کالزکی سروس شروع کردی ہے ، اس حوالے سے ترجمان پی ٹی اے نے کہا ہے کہ سیلاب متاثرہ علاقوں کےصارفین مفت کال سروس سےاستفادہ کرسکیں گے۔

ترجمان کا کہنا تھا کہ بیلنس نہ ہونے کی صورت میں صارفین آن نیٹ کال کرسکیں گے اور سیلاب زدہ علاقوں میں متاثرین اپنےاہلخانہ سے رابطہ کرسکیں گے۔

ترجمان نے مزید کہا کہ پی ٹی اے،موبائل فون آپریٹرز متاثرین کے ساتھ کھڑے ہیں اور عوام کو ریلیف دینے کیلئے موبائل فون کمپنیوں کی کاوشیں قابل تعریف ہیں۔

پی ٹی اےسیلاب متاثرہ علاقوں میں مواصلاتی ذرائع سےنگرانی کررہاہے اور رابطوں کویقینی بنانےاورضروری معلومات کی فراہمی کی جارہی ہے۔

یاد رہے گذشتہ روز وزیراعظم شہباز شریف نے سیلاب سے متاثرہ علاقوں میں صفر بیلنس پر موبائل فون کام کی سہولت دینے کی ہدایت کی تھی۔