پشاور : وزیراعلیٰ علی امین گنڈاپور کی ہدایت پر سیلاب متاثرین کے لیے معاوضے کا پیکج دُگناکر دیا گیا، جاں بحق افراد کے لواحقین کو دس لاکھ کے بجائے بیس لاکھ روپے دیے جائیں گے۔

تفصیلات کے مطابق خیبر پختونخوا حکومت نے سیلاب متاثرین کے لیے معاوضوں کی ادائیگی کا باضابطہ آغاز کر دیا ہے۔

وزیر اطلاعات بیرسٹر سیف کے مطابق وزیراعلیٰ علی امین گنڈاپور کی ہدایت پر معاوضے کا پیکج دگنا کر دیا گیا ہے۔ جاں بحق افراد کے لواحقین کو دس لاکھ کے بجائے بیس لاکھ روپے دیے جائیں گے۔

بیرسٹر سیف نے بتایا کہ تمام متاثرہ اضلاع کو 85 کروڑ روپے جاری کر دیے گئے ہیں اور سیلاب متاثرین کو چیکس کی تقسیم کا عمل جاری ہے۔ وزیراعلیٰ نے سوات کا دورہ کیا اور متاثرین میں معاوضے کے چیکس تقسیم کیے۔

ان کا کہنا تھا کہ صوبائی حکومت مشکل کی اس گھڑی میں متاثرین کے ساتھ کھڑی ہے اور وزیراعلیٰ خود متاثرہ علاقوں کے دورے کر رہے ہیں تاکہ متاثرہ خاندانوں سے یکجہتی کا اظہار کیا جا سکے۔

مزید پڑھیں : صرف ضلع دیر میں 1000 سے زائد اموات ہو سکتی ہیں، وزیر اعظم کے معاون نے خدشہ ظاہر کر دیا

مشیر اطلاعات نے مزید کہا کہ صوبے میں مزید بارشوں کی پیش گوئی کی گئی ہے، اس لیے عوام احتیاطی تدابیر اپنائیں اور ندی نالوں کے قریب جانے سے گریز کریں۔

ان کا مزید کہنا تھا کہ کہ کسی بھی ناخوشگوار واقعے کی اطلاع فوری طور پر ایمرجنسی نمبر 1700 پر دی جائے۔

خیال رہے خیبر پختونخوا میں حالیہ بارشوں اور فلش فلڈ سے صوبے میں اب تک 325 افراد جاں بحق اور 156 زخمی ہو چکے ہیں۔

جاں بحق افراد میں 274 مرد، 30 خواتین اور 21 بچے شامل ہیں جبکہ زخمیوں میں 123 مرد، 23 خواتین اور 10 بچے شامل ہیں۔

بارشوں اور سیلاب کے باعث مجموعی طور پر 336 گھروں کو نقصان پہنچا جن میں سے 106 مکانات مکمل طور پر منہدم ہو گئے۔

اعداد و شمار کے مطابق سب سے زیادہ نقصان بونیر میں ہوا جہاں اب تک 217 افراد جان کی بازی ہار چکے ہیں۔ دیگر حادثات سوات، باجوڑ، مانسہرہ، شانگلہ، دیر لوئر اور بٹگرام میں پیش آئے۔

سوات (17 اگست 2025): وزیراعلیٰ کے پی علی امین گنڈاپور نے کہا ہے کہ برملا کہتا ہوں کہ صوبے کے سیلاب متاثرین کے لیے کسی کی مدد کی ضرورت نہیں۔

اے آر وائی نیوز کے مطابق وزیراعلیٰ خیبر پختونخوا علی امین گنڈاپور نے سوات کے دورے کے موقع پر پریس کانفرنس کرتے ہوئے کہا ہے کہ یہ وہ کے پی حکومت نہیں، جس کے پاس وسائل یا تنخواہ کے پیسے نہ ہوں۔ عوام کا جو ذاتی نقصان بھی ہوا ہے، ہماری حکومت ہر شخص کے نقصان کا اازالہ کرے گی۔

علی امین نے کہا کہ ہمیں سیلاب متاثرین کی بحالی کے لیے کسی مدد کی ضرورت نہیں۔ تاہم کوئی فرض ادا کرنا چاہتا ہے تو ضرور کرے۔ سیلاب سے تباہ گھروں کو دوبارہ تعمیر کریں گے اور کے پی حکومت اپنے عوام سے کیے گئے تمام وعدے پورے کرے گی۔

وزیراعلیٰ کے پی نے کہا کہ یہ اللہ تعالیٰ کی طرف سے آنے والی آفت تھی اور قدرتی آفت کا انسان مقابلہ نہیں کر سکتا۔ ایسے نقصانات سے پوری نسل تباہ ہو سکتی ہے، انہیں تحفظ دینا ہے۔ صوبے میں اپنے لوگوں کی امداد کیلیے پوری ٹیم موجود ہے اور کابینہ کے تمام ارکان متاثرہ علاقوں میں امدادی کارروائیوں کی نگرانی کر رہے ہیں۔ ریسکیو ورکرز نے دریا میں چھلانگیں لگا کر لوگوں اور بچوں کو بچایا ہے۔

علی امین گنڈاپور نے بتایا کہ وزیراعظم اور وزرا نے رابطہ کر کے مدد کرنے کی پیشکش کی۔ یہ وفاقی حکومت کی ذمہ داری ہے کہ وہ مشکل وقت میں مدد کرے، اور سمجھتے ہیں وفاقی حکومت اپنا فرض سمجھ کر ہماری مدد کرے گی۔

ان کا کہنا تھا کہ تجاوزات کیخلاف جیسا آپریشن ڈی آئی خان میں ہوا کہیں نہیں ہوا۔ پورے صوبے میں ایسا ہی آپریشن کرنا پڑے گا۔ جنہوں نے تجاوزات بنانے کی اجازت دی، ان میں سے کئی ریٹائر اور فوت ہو چکے۔ جب تجاوزات کیخلاف آپریشن کیا تو عدالت سے اسٹے لے لیا گیا۔ عوام سے اپیل ہے کہ وہ قبضوں اور تجاوزات سے گریز کرتے ہوئے حکومت سے تعاون کریں۔

وزیراعلیٰ نے کہا کہ متاثرہ علاقوں میں ریسکیو آپریشن چل رہا ہے، جس میں تمام ادارے شامل ہیں۔ تمام اضلاع میں راستے بحال کر دیے ہیں ہی ہے۔سیلاب سے سب سے زیادہ نقصان بونیر میں ہوا۔ وہاں پانی کےراستے میں قائم عمارات سے زیادہ نقصان ہوا۔ ہمارے کچھ علاقے ابھی بھی الرٹ پر ہیں۔

واضح رہے کہ این ڈی ایم اے نے خیبر پختونخوا میں حالیہ طوفانی بارشوں، کلاؤڈ برسٹ اور آسمانی بجلی گرنے کے واقعات میں 328 اموات کی تصدیق کر دی ہے۔

https://urdu.arynews.tv/kpk-ndma-confirms-328-deaths/

پاک آرمی افسران کی ڈاکٹر بیگمات بھی گوادر کے مختلف علاقوں میں مصیبت زدہ بھائیوں بہنوں کے علاج معالجہ میں رضاکارانہ طور پر مصروف ہیں، جن میں ڈاکٹرزینب اور ڈاکٹر افشاں بھی شامل ہیں۔

تفصیلات کے مطابق پاکستان کی بیٹیاں گوادر میں سیلاب متاثرین کی خدمت میں مصروف ہیں ، ضلع گوادرکےسیلاب زدہ علاقوں میں پاک آرمی کی جانب سے موبائل میڈیکل ٹیمیں اور میڈیکل کیمپس لگائے گئے، جس میں پاک فوج کی میڈیکل ٹیم سیلاب زدہ لوگوں کے علاج معالجہ میں مصروف عمل ہیں۔

میڈیکل کیمپ میں اب تک ہزاروں لوگوں کوطبی امدادکےساتھ ساتھ مفت ادویات بھی فراہم کی جاچکی ہیں ، پاک آرمی افسران کی ڈاکٹر بیگمات بھی گوادر کے مختلف علاقوں میں مصیبت زدہ بھائیوں بہنوں کےعلاج معالجہ میں رضاکارانہ طور پر مصروف ہیں
جن میں ڈاکٹرزینب اورڈاکٹرافشاں بھی شامل ہیں۔

ڈاکٹر زینب پاک فوج میں خدمات انجام دینے والے لیفٹیننٹ کرنل کی اورڈاکٹرافشاں میجرکی زوجہ ہیں ، انسانی جذبے سے سرشار ڈاکٹر افشاں اور زینب سیلاب متاثرین کی اس مشکل گھڑی میں خدمت کر رہی ہیں اور اب تک 1500 سے زائد مریضوں کاعلاج کرچکی ہیں۔

ڈاکٹر زینب کا کہنا ہے کہ گوادر کے لوگ ہمارےاپنےلوگ ہیں،انہیں ہماری ضرورت تھی اور یہ میرافرض تھا، پاک آرمی کی میڈیکل ٹیمیں سول انتظامیہ کے ساتھ مل کر لوگوں کو طبی سہولیات فراہم کرنے کی ہرممکن کوشش کررہی ہیں۔

پچھلے 5 دن سے ضلع گوادرمیں ڈاکٹرافشاں بزرگ، خواتین اور بچوں کی دیکھ بھال کر رہی ہیں ، ڈاکٹر افشاں کا کہنا ہے کہ گوادر کے لوگوں کو مصیبت کی گھڑی میں انکی ضرورت ہے۔

پاکستان کوڈاکٹرزینب اورڈاکٹرافشاں جیسی بیٹیوں پرفخرہے ، دونوں اپنےمصیبت زدہ بھائیوں بہنوں اور بچوں کی خدمت میں پیش پیش ہیں۔

فرنٹ لائن کلائمنٹ ہیلتھ ایوارڈ جیتنے والی پاکستان کی قابل فخر بیٹی ڈاکٹر عالیہ حیدر نے کہا ہے کہ حاملہ خواتین کو طبی امداد کی فراہمی کیلئے مجھے چارپائی پر بٹھا کر سیلابی پانی سے لے جایا گیا۔

یہ بات بلوچستان سے تعلق رکھنے والی ڈاکٹر عالیہ حیدر نے اے آر وائی نیوز کے پروگرام باخبر سویرا میں بطور مہمان گفتگو کرتے ہوئے کہی۔ انہوں نے سیلاب زدگان کی امداد کے موقع پر پیش آنے والے واقعات بیان کیے۔

انہوں نے بتایا کہ سیلاب زدگان کی مدد کرنے کا خیال اس لیے آیا کہ سب لوگ سیلاب متاثرین کو ریلیف تو دے رہے تھے لیکن انہیں صحت کی سہولیات فراہم نہیں کی جارہی تھیں۔ مجھے میڈیکل کیمپس لگانے کا تجربہ بھی تھا تو اپنے دوستوں کو ساتھ ملا کر ہم نے یہ کام کرنے کا فیصلہ کیا۔

انہوں نے بتایا کہ ہم نے سیلاب متاثرین کیلئے ملک کے مختلف شہروں اور دیہات میں میڈیکل کیمپس لگائے وہاں کے حالات اتنے خراب تھے کہ بیان کرنا بھی مشکل ہے لوگوں کے پاس رہنے کی جگہ نہیں تو کیا کریں گے۔

ڈاکٹر عالیہ حیدر نے ایک واقعہ بیان کیا کہ صحبت پور بلوچستان کے ایک علاقے میں کام کرریے تھے تو لوگوں نے بتایا کہ دور دراز گاؤں میں تقریباً 200افراد پھنسے ہوئے ہیں اور بیمار ہیں جن میں حاملہ خواتین بھی شامل ہیں۔

علاقہ مکینوں نے ہمیں کہا کہ آپ ایک چارپائی پر بیٹھ جائیں ہم چار لوگ آپ کو اٹھا کر سیلابی پانی کے اس طرف گاؤں میں لے جائیں گے جس کے بعد ہم وہاں گئے اور لوگوں کو طبی سہولیات کی فراہمی کے بعد اسی طرح واپس آئے۔

یاد رہے کہ گزشتہ ہفتے دبئی ایکسپو میں ماحولیات پر جاری عالمی کانفرنس کوپ 28 میں بلوچستان کی ڈاکٹر عالیہ حیدر نے فرنٹ لائن کلائمیٹ ہیلتھ ایوارڈ اپنے نام کیا تھا۔

ڈاکٹر عالیہ نے 2022 میں سندھ، بلوچستان اور پنجاب کے سیلاب زدہ علاقوں میں فری میڈیکل کیمپس لگائے، سیلاب متاثرین کو مفت طبی سہولتیں فراہم کیں، ڈاکٹر عالیہ کو یہ ایوارڈ ان کی خدمات کے اعتراف میں دیا گیا۔

ڈاکٹر عالیہ حیدر کا تعلق کوئٹہ کی ہزارہ برادری سے ہے، انہوں نے ابتدائی تعلیم کوئٹہ میں نسل نو ہزارہ اسکول سے حاصل کی اور انہوں نے ایف ایس سی اسلامیہ گرلز کالج کوئٹہ سے کیا جس کے بعد وہ ایم بی بی ایس کرنے چین چلی گئیں۔

پاکستان اور جاپان حکام نے ایک اہم معاہدے پر دستخط کیے ہیں جس کے تحت سندھ کے سیلاب متاثرین کو تعلیم کی سہولیات کی فراہمی کیلئے مختص رقم خرچ کی جائے گی۔

تفصیلات کے مطابق پاکستان اور جاپان کے درمیان 79 کروڑ 40 لاکھ ین گرانٹ کے معاہدے پر دستخط کردیئے گئے ہیں مذکورہ رقم سندھ میں سیلاب سے متاثرین کیلئے تعلیمی سہولیات کی بحالی پر خرچ ہوگی

اس حوالے سے جاری اعلامیے کے مطابق پراجیکٹ نوٹ پر سیکرٹری اقتصادی امور ڈویژن ڈاکٹر کاظم نیاز اور پاکستان میں جاپان کے سفیر واڈا میتسو ہیرو نے دستخط کئے۔

اعلامیہ کے مطابق جاپان نے پاکستان کو تریپن لاکھ ڈالر کی گرانٹ فراہم کر دی ہے، اس سے سندھ میں سیلاب سےمتاثرہ بنیادی تعلیمی ڈھانچے کی تعمیرنو اور تعلیمی ماحول سازگار بنانے میں مدد ملے گی۔لڑکیوں کی تعلیم تک رسائی کو فروغ دینے پر خصوصی توجہ دی جائے گی ۔

سیکرٹری اقتصادی امور نے دونوں فریقین کے مابین مزید بامعنی تعاون کے لیے تمام اہم سہولتیں فراہم کرنے کی یقین دہانی کے ساتھ جاپانی حکومت اور عوام کو پاکستان کی عظیم حمایت پر سراہا۔

جاپانی سفیر واڈا میتسو ہیرو نےدوطرفہ تعلقات اور تعاون مزید مستحکم کرنے کے لیے حکومت پاکستان کے ساتھ مل کر کام کرنےکا یقین دلایا ۔