Tag: سیلفی

  • ویڈیوز: شاہد آفریدی کی بھارتی مداح کے ساتھ سیلفی، کامران اکمل نے دیا گلوز کا تحفہ

    ویڈیوز: شاہد آفریدی کی بھارتی مداح کے ساتھ سیلفی، کامران اکمل نے دیا گلوز کا تحفہ

    برطانیہ (31 جولائی 2025) شاہد آفریدی اور کامران اکمل نے بھارتی فینز سے خوش اخلاقی سے ملاقاتیں کر کے ان کے دل جیت لیے۔

    ایک جانب بھارت کے متعصب نام نہاد لیجنڈ کرکٹرز ورلڈ چیمپئن شپ آف لیجنڈز میں پاکستان کے خلاف کھیلنے سے انکار کر کے جنٹلمین کھیل کا امیج خراب کر رہے ہیں۔

    دوسری جانب پاکستان کرکٹرز انڈین کھلاڑیوں کے برعکس بھارتی شائقین کے ساتھ پیار اور محبت کا اظہار کرتے ہوئے خوش اخلاقی سے ملاقاتیں کر کے ان کے دل جیت رہے ہیں۔

    شاہد آفریدی جو ورلڈ چیمپئن شپ آف لیجنڈز کھیلنے کے لیے برطانیہ میں موجود ہیں۔ انہوں نے بھارتی فینز کی خواہش پر ان کے ساتھ سیلفی لی اور اس کی ویڈیو شیئر کی۔

    پاکستان کے سابق وکٹ کیپر جنہوں نے چیمپئن شپ آف لیجنڈز میں حال ہی میں سنچری اسکور کی ہے۔ انہوں نے بھی گراؤنڈ میں فینز کے ساتھ سیلفیاں بنوائیں اور ایک بھارتی پرستار کی خواہش پر اپنے کرکٹ گلوز اس کو تحفے میں دے دیے۔

    دوسری جانب بھارتی کھلاڑیوں کےمیدان سے جاتے ہوئےشاہد آفریدی کی بالکونی میں کھڑے وڈیو نےبھی سوشل میڈیا پر دھوم مچا دی ہے۔ بھارتی پرستار بھی لالہ، لالہ کی آوازیں لگا کر اپنی محبت کا اظہار کر رہے ہیں۔

    یاد رہے کہ چیمپئن شپ آف لیجنڈز میں بھارت نے پہلے راؤنڈ میچ میں اور گزشتہ روز سیمی فائنل میں پاکستان کے خلاف کھیلنے سے انکار کر دیا تھا۔ جس پر دنیا بھر میں کرکٹ شائقین تنقید کر رہے ہیں۔

  • سیلفی کا جنون 20 سالہ نوجوان کی جان لے گیا

    سیلفی کا جنون 20 سالہ نوجوان کی جان لے گیا

    سیلفی کے شوق نے اب تک دنیا بھر میں ہزاروں افراد کی جان لے لی ہے، کچھ لوگ سیلفی لینے کے دوران خطرناک حد تک لاپروائی کا مظاہرہ کرکے اپنی جان گنوا دیتے ہیں۔

    ایسا ہی ایک افسوسناک واقعہ بھارت کے شہر ممبئی کے نوجوان کے ساتھ پیش آیا ہے جہاں وہ دوستوں سے ساتھ سیلفی لینے کے دوران سمندر میں گر کر ہلاک ہوگیا۔

    بھارتی میڈیا کے مطابق ممبئی کے جوہو جیٹی کا رہائشی 20 سالہ نوجوان اپنے دوستوں کے ساتھ سمندر کنارے سیر کے لیے آیا تھا کہ اس دوران دوستوں کے ساتھ تصویریں کھینچتے ہوئے سمندر میں گر کر ہلاک ہو گیا۔

    بھارتی حکام کا کہنا ہے کہ حادثے کا شکار ہونے والے نوجوان کی شناخت انیل ارجن کے نام سے ہوئی ہے، وہ ہفتے کی شام اپنے دوستوں کے ساتھ سیلفی لیتے ہوئے اچانک توازن کھو بیٹھا اور سمندر میں جا گرا تھا۔

    جس کے بعد موقع پر موجود لائف گارڈز نے فوری کارروائی کرتے ہوئے نوجوان کو پانی سے باہر نکالا اور اسے فوری طور پر قریشی اسپتال منتقل کیا گیا جہاں ڈاکٹروں نے معائنے کے بعد اسے مردہ قرار دے دیا۔

    پولیس نے بتایا کہ نوجوان کی فیملی نے کسی بھی قسم کی قانونی کارروائی کرنے سے انکار کیا ہے۔

    اس سے قبل کیریبین میں پیش آئے افسوسناک واقعے میں 55 سالہ کینیڈین خاتون شارک کے ساتھ سیلفی لینے کی کوشش میں اپنے دونوں ہاتھ گنوا بیٹھیں، واقعہ اُس وقت پیش آیا جب وہ ترک اور کیکوس جزائر کے درمیان تھامسن کوو بیچ کے پانی میں موجود تھیں۔

    https://urdu.arynews.tv/egypt-incident-four-drown-nile-river/

  • وائرل ویڈیو: ویرات کوہلی کا فوجی کے ساتھ سیلفی لینے سے انکار، بھارت میں کہرام مچ گیا

    وائرل ویڈیو: ویرات کوہلی کا فوجی کے ساتھ سیلفی لینے سے انکار، بھارت میں کہرام مچ گیا

    اسٹار بھارتی بلے باز ویرات کوہلی نے ممبئی میں اپنے پرستار فوجی کے ساتھ سیلفی لینے سے انکار کیا جس کے بعد بھارت بھر میں کہرام مچ گیا ہے۔

    بھارتی کرکٹ ٹیم کے ریکارڈ ساز بلے باز ویرات کوہلی کی ایک ویڈیو سوشل میڈیا پر تیزی سے وائرل ہو رہی ہے جس میں وہ ممبئی میں اپنے ایک پرستار فوجی اہلکار کے ساتھ سیلفی لینے سے صاف انکار کرتے دکھائی دیتے ہیں۔

    ویڈیو میں دیکھا جا سکتا ہے کہ ویرات کوہلی ممبئی میں اپنی گاڑی سے اتر کر کہیں جا رہے ہیں۔ وہیں دیگر لوگوں کے ہجوم میں ایک فوجی وردی میں ملبوس شخص بھی اپنے ہیرو کے انتظار میں کھڑا ہوتا ہے۔

    کرکٹر جیسے ہی اس کے قریب سے گزرتے ہیں تو وہ مبینہ طور پر سیلفی لینے کے لیے آگے بڑھتا ہے لیکن ویرات کوہلی اس کو ہاتھ سے انکار کرتے ہوئے نظر انداز کر کے آگے بڑھ جاتے ہیں۔

    یہ ویڈیو تیزی سے وائرل ہوئی ہے جس نے بھارت بھر میں سوشل میڈیا پر آگ لگا دی ہے اور بھارتی شہری ویرات کی اس حرکت کو شرمناک قرار دیتے ہوئے کڑی تنقید کر رہے ہیں۔

    سوشل میڈیا صارفین نے ویرات پر جان بوجھ کر فوجی کے ساتھ سیلفی سے لینے سے انکار کرنے کا الزام عائد کرتے ہوئے کہا کہ ٹنڈولکر ہوں یا ڈریوڈ، لکشمن ہوں یا گنگولی، کسی سابق بھارتی کرکٹ اسٹار نے ایسا تکبر نہیں کیا جو ویرات کوہلی میں دکھائی دیا۔

    ایک اور صارف نے کہا کہ ایسے کرکٹر یا کھلاڑی ان کے رول ماڈل نہیں ہوسکتے جب کہ ایک نے ان کے جلد لندن مستقل سکونت اختیار کرنے کے حوالے سے کہا کہ وہ کیونکہ اب لندن شفٹ ہو رہے ہیں اس لیے بھارتی فوج سے ایسا برتاؤ کر رہے ہیں۔

    https://urdu.arynews.tv/champions-trophy-opening-ceremony-india-new-demand/

  • شاہین آفریدی اور مچل اسٹارک کی سیلفی کی دھوم

    شاہین آفریدی اور مچل اسٹارک کی سیلفی کی دھوم

    پاکستان اور آسٹریلیا کے لیفٹ آرم فاسٹ بولرز شاہین آفریدی اور مچل اسٹارک نے ون ڈے سیریز سے قبل اتوار کو ایک ساتھ فوٹو سیشن کروایا۔

    شاہین نے اسٹارک کے ساتھ سیلفی بھی لی جو سوشل میڈیا پر تیزی سے وائرل ہوگئی، پاکستان کرکٹ بورڈ نے میلبورن کرکٹ گراؤنڈ (ایم سی جی) میں دنیائے کرکٹ کے دونوں مشہور پیسرز کی ملاقات کی ویڈیو بھی شیئر کی۔

    وائٹ بال سیریز سے قبل شاہین آفریدی اور مچل اسٹارک کی سیلفی سوشل میڈیا پر دھوم مچاتی نظر آئی اور دنیا بھر سے مداحوں نے اس پر تبصرے بھی کیے۔

    اسٹارک اور شاہین دونوں ہی اپنی سوئنگ بولنگ کی بدولت شہرت رکھتے ہیں، پاکستانی اور کینگرو کرکٹر نے میلبرن گراؤنڈ میں ملاقات کی اور سیلفی بھی بنائی جبکہ فوٹو شوٹ میں بھی حصہ لیا۔

    دونوں ٹیموں کے درمیان سیریز کا باقاعدہ آغاز 4 نومبر سے ہورہا، جہاں پہلے ون ڈے میچ میں آسٹریلیا مہمان سائیڈ کا امتحان لے گا۔

    خیال رہے کہ دورہ آسٹریلیا کے دوران پاکستان اور میزبان سائیڈ 3 ون ڈے انٹرنیشنلز اور 3 ٹی20 میچز میں مدمقابل آئیں گے جو 4 سے 18 نومبر تک کھیلے جائیں گے۔

  • سیلفی کے جنون نے خاتون کو نہر میں گرادیا، ویڈیو منظر عام پر

    سیلفی کے جنون نے خاتون کو نہر میں گرادیا، ویڈیو منظر عام پر

    نلگنڈہ: سیلفی لینے کے شوقین افراد کی دنیا میں کمی نہیں مگر بعض افراد تو اس جنون میں اس حد تک آگے نکل جاتے ہیں کہ انہیں اپنی زندگی سے بھی ہاتھ دھونا پڑ جاتا ہے۔

    بھارتی میڈیا کے مطابق سیلفی کا شوق ایک خاتون کی جان پر بن آیا، ریاست تلنگانہ ضلع نلگنڈہ کے ویمولہ پلی منڈل میں ایک خاتون پل پر سیلفی لے رہی تھی کہ اچانک اس کا پاؤں پھسل گیا۔

    پاؤں پھسلنے کے سبب خاتون نہر میں گر پڑی، خاتون کی قسمت اچھی تھی کہ وہاں موجود افراد نے بروقت پھرتی دکھاتے ہوئے رسیوں کی مدد سے اس کی جان بچائی۔

    اس سے قبل بھارتی ریاست مہاراشٹرا کے سیاحتی مقام بورنے گھاٹ میں ایک لڑکی کھائی کے نزدیک سیلفی لیتے ہوئے 100فٹ گہری کھائی میں گر گئی تھی۔

    گرلز ہاسٹل کے واش روم میں خفیہ کیمروں سے سینکڑوں ویڈیوز بنانے کا انکشاف

    اس موقع پر فوری طور پر ریسکیو کا کا م شروع کیا گیا اور ہوم گارڈ اور مقامی افراد کی مدد سے لڑکی کو باہر نکالنے میں کامیابی حاصل کی گئی اور اسے علاج کے لیے اسپتال منتقل کردیا گیا۔ جہاں اس کی حالت تشویش ناک بتائی جارہی ہے۔

  • تو پھر ایک سیلفی ہو جائے!

    تو پھر ایک سیلفی ہو جائے!

    ڈیجیٹل میڈیا کی بدولت ایک طرف تو دنیا میں بڑی تبدیلی اور ترقی ممکن ہوئی ہے اور انسان کے کئی کام آسان ہوگئے ہیں، مگر اسی ڈیجیٹل میڈیا نے انسان کو ایک خبط میں بھی مبتلا کر دیا ہے اور اسے تنہائی اور اپنے ماحول سے بیزاری کا تحفہ بھی دیا ہے۔

    سماجی رابطوں کی ویب سائٹس کی بات کریں تو یہ مختلف تہذیبوں، ثقافتوں اور معاشروں کو قریب لاتے ہوئے انھیں اجتماعی اور انفرادی مسائل پر تبادلۂ خیال کا موقع دے رہی ہیں، لیکن سوشل میڈیا نے لوگوں میں حسد اور رقابت جیسے جذبات بھی پیدا کیے ہیں اور اس میں کوئی دو رائے نہیں کہ خود نمائی بھی اسی ٹیکنالوجی کی دین ہے۔

    ہم کہیں سیر پر جانے کا منصوبہ بنا رہے ہوں یا کسی تقریب میں جانے کا ارادہ ہو وہاں اپنوں کے ساتھ، دوستوں اور دوسرے لوگوں سے بات چیت کرنے سے زیادہ سیلفی لینا ضروری سمجھتے ہیں۔ ہماری گفتگو بھی بار بار سوشل میڈیا پر اپنی سرگرمیوں کی طرف نکل جاتی ہے، یا سوشل میڈیا پر وائرل موضوع پر بحث ہونے لگتی ہے۔ سیلفی لینے کا رحجان تو خطرناک حد تک بڑھ گیا ہے۔ اس حوالے سے ڈیلی ٹیلیگراف نے لکھا کہ 2015ء میں سیلفی کی وجہ سے اتنی اموات ہوئیں جتنی شاید شارک کے حملوں میں بھی نہ ہوتیں۔ امریکا اور بھارتی انسٹیٹیوٹ کی مشترکہ تحقیقاتی رپورٹ کے مطابق مارچ 2014ء سے 2016ء تک پوری دنیا میں سیلفی کی وجہ سے ہونے والی اموات ایک سو ستائیس تھیں جن میں صرف بھارت میں چھہتر اموات ہوئیں۔ گویا سیفلی لینے کے دوران اموات میں بھارت پہلے نمبر پر ہے۔

    پہلی سیلفی کس نے بنائی یہ کہنا تو بہت مشکل ہے لیکن 2013ء تک لفظ سیلفی اتنا عام ہو گیا تھا کہ آکسفورڈ ڈکشنری نے اس لفظ کو سال کا مشہور ترین لفظ قرار دے دیا۔ اب تو سیلفی فون بھی عام مل رہے ہیں جن میں ایک کیمرے کی جگہ دو دو، تین تین کیمرے موجود ہیں تاکہ آپ شان دار تصویریں بنا سکیں۔

    سلیفی کا شوق نوجوانوں سے لے کر ادھیڑ عمر کے لوگوں کو بھی ہے۔ بسترِ مرگ پر پڑے ہوئے لوگوں، حتیٰ کہ جنازوں پر بھی لوگ سیلفی لینے سے باز نہیں آتے۔ سیلفی لیتے ہوئے یہ دھیان نہیں رکھا جاتا کہ ذرا سی غفلت، کوتاہی اور گرد و پیش سے پَل بھر کو بے خبر ہونا زندگی کے لیے خطرناک ثابت ہوسکتا ہے۔ کبھی ریل کی پٹری، کبھی نہر کے کنارے، کبھی کسی پُل کے اوپر غرض کسی بھی جگہ سیلفی کے شوقین افراد اپنا کام کرجاتے ہیں۔ تفریحی اور عام مقامات تو ایک طرف لوگ مقدس مقامات پر بھی نہیں باز آتے اور دورانِ زیارت و عبادت سفیلیاں کھینچ کر دوسروں کے سامنے پیش کرتے ہیں۔

    موبائل کے کیمرے سے تصویر بنانا آسان تو ہے، لیکن سیلفی کا یہ جنون مشہور و معروف شخصیات کے لیے مصیبت بن چکا ہے۔ لوگ کسی مشہور شخصیت کے ساتھ سیلفی بنوائے بغیر نہیں‌ رہ سکتے۔ اب چاہے یہ شخصیات اپنے اُن پرستاروں یا چاہنے والوں کو کتنا ہی ٹالنے کی کوشش کریں اور منع بھی کر لیں، مگر وہ ان کی جان نہیں چھوڑتے۔ ایک طرف ہم بڑے بڑے شاپنگ مالز، مہنگے ریستوراں اور تفریحی مقامات پر اپنی سیلفیاں لینے کے خبط میں مبتلا ہوچکے ہیں اور اکثر اس سے خود نمائی مقصود ہوتی ہے جب کہ دوسری طرف ہم لوگ مشہور شخصیات کے ساتھ تصویریں بنا کر سوشل میڈیا پر پوسٹ کرتے ہیں اور دوسروں‌ کو مرعوب کرنے کی کوشش کی کرتے ہیں۔ دیکھا جائے تو اپنی زندگی کے مختلف لمحات کو محفوظ کرنا اور یادگار بنانا برا نہیں اور یہ اب ایک عام بات ہے، مگر یہاں ہم بات اس رویے اور طرزِ‌فکر کی کررہے ہیں جس میں ایک طرف تو اکثر سلیفی کے شوقین اپنی جان کو خطرے میں ڈال دیتے ہیں اور دوسری طرف یہ سب محض نمائش، دکھاوا اور اکثر دوسروں پر اپنا رعب جمانے یا اپنی برتری جتانے کے لیے کیا جاتا ہے۔

    چھوٹی سے چھوٹی چیز اور بڑے سے بڑے کارنامے کی سیلفی بنا کر سوشل میڈیا پر اپ لوڈ کرنا لوگوں کا معمول بن گیا ہے۔ میں یہ سوچتی ہوں کہ اس ٹیکنالوجی کے کتنے ہی فائدے ہیں اور یہ یقیناً ہمارے لیے بہت سے کاموں کو آسان اور سہل بنا رہی ہے، لیکن بدقسمتی سے شعور اور آگاہی کا فقدان، کج فہمی اور ہماری ناسمجھی اس ٹیکنالوجی کو ہمارے لیے وبال بنارہی ہے بلکہ معاشرہ صبر، برداشت، قناعت سے محروم اور حسد و رقابت کے جذبات سے بھرتا جا رہا ہے۔ کئی مواقع ایسے بھی ہیں جب ہم دیکھتے ہیں کہ کسی کے سیلفی یا ویڈیو بنانے کی وجہ سے ہماری پرائیویسی بھی متاثر ہورہی ہوتی ہے۔ ایک زمانہ تھا کہ خوبصورتی کیمرے کی آنکھ میں ہوتی تھی، فوٹو گرافر کے ایک کلک کی مہارت میں ہوتی تھی اور ہم اپنے بچپن میں کسی سیر گاہ میں جاتے ہوئے کیمرے میں ریل ڈلوانے کی جو خوشی محسوس کرتے تھے، اس کا مقابلہ یہ سیلفی نہیں کرسکتی۔ وہ خوشی ہی الگ ہوتی تھی کہ ہم خوب پوز بنائیں گے، پکنک انجوائے کریں گے۔ وہ خوشی اب ماضی بن گئی ہے اور اب سیلفی کی نمائش کے چکر میں ہم اتنا آگے نکل گئے ہیں کہ نہ ہمیں اپنی جان کی فکر ہے اور نہ ہی امیج کی۔ حالانکہ یہی دونوں چیزیں ہمارے لیے بہت اہم ہیں اور ان کی قدر کی جانی چاہیے۔

    کبھی موقع ملے تو اس مصنوعی دنیا سے تھوڑی دیر کے لیے باہر نکل کر زندگی کا حقیقی معنوں میں ضرور لطف اٹھائیے گا۔

    (یہ تحریر/ بلاگ مصنّف کی ذاتی رائے، خیالات اور مشاہدے پر مبنی ہے جس سے ادارے کا متفق ہونا ضروری نہیں)

  • موبائل چھیننے کی ناکام واردات اور سیلفی نے اندھی موت کا معمہ حل کردیا

    موبائل چھیننے کی ناکام واردات اور سیلفی نے اندھی موت کا معمہ حل کردیا

    موبائل چوری کی ناکام واردات اور فون میں محفوظ ہوجانے والی سیلفی ویڈیو نے اسٹیشن پر ہونے والے اندھی موت کا معمہ حل کردیا۔

    بھارتی ریاست مہاراشٹرا کے شہر کلیان میں ایک ٹرین کے مسافر کا موبائل فون چوری کرنے والے ملزم کے پکڑے جانے کے بعد ایک شخص کی موت کا معمہ حل ہو گیا۔ چور کی شناخت آکاش جادھو کے نام سے کی گئی ہے۔

    آکاش نے پیر کو ایک مسافر کا فون اس وقت اس کے ہاتھ سے چھیننے کی کوشش کی تھی جب وہ چلتی ٹرین میں سیلفی ویڈیو بنا رہا تھا۔

    مسافر زاہد زیدی اپنے فون سے ویڈیو ریکارڈنگ کر رہا تھا کہ ملزم جادھو نے فون پر جھپٹا مارا تاہم وہ موبائل چھیننے میں ناکام رہا، اس دوران زاہد کے موبائل ویڈیو میں آکاش کا چہرہ قید ہوگیا۔

    زاہد نے پولیس سے مدد طلب کرتے ہوئے ویڈیو سوشل میڈیا پر پوسٹ کردی، کلیان ریلوے پولیس نے وائرل ویڈیو کو دیکھنے کے بعد جادھو کو گرفتار کرلیا۔

    پولیس افسر پندھری ناتھ کاندے نے بتایا کہ ہم نے ایک مشتبہ شخص کو گرفتار کیا جس کے خلاف تھانے میں پہلے سے مقدمات درج تھے جبکہ اس سے دوسرا موبائل فون بھی برآمد ہوا۔

    ہم نے اس سے پوچھ گچھ کی کہ اسے موبائل کہاں سے ملا، موبائل فون کو آن کیا گیا تو پتہ چلا کہ یہ پونے کے رہنے والے پربھاس بھانگے کا ہے۔

    انھوں نے کہا کہ بھانگے ایک بینک میں ملازم تھا اور ہولی کے لیے پونے سے گھر جارہا تھا۔ 25 مارچ کو آدھی رات کو ریلوے اسٹیشن پر ٹرین سے گر کر اس کی موت واقع ہوگئی تھی۔

    افسر پندھری ناتھ کاندے نے کہا کہ جادھو سے پوچھ گچھ پر ایک چونکا دینے والا انکشاف سامنے آیا۔ جادھو نے چلتی ٹرین سے موبائل چرایا تھا اور پربھاس بھانگے نے جب اپنا موبائل واپس لینے کی کوشش کی تو ٹرین سے گر کر ہلاک ہوگیا۔

    پولیس کا اس حوالے سے کہنا تھا کہ ملز آکاش جادھو کے خلاف مقدمہ درج کرلیا گیا ہے اور کیس کی مزید تحقیقات کی جارہی ہے۔

  • ویڈیو: کوہلی کے ہمشکل کو دیکھ کر سیلفی کے لیے مداحوں کا ہجوم جمع ہوگیا

    ویڈیو: کوہلی کے ہمشکل کو دیکھ کر سیلفی کے لیے مداحوں کا ہجوم جمع ہوگیا

    ویرات کوہلی کے ہمشکل کو دیکھ کر سیلفی لینے کے لیے مداحوں کا ہجوم لگ گیا، واقعے کی ویڈیو سوشل میڈیا پر وائرل ہوگئی۔

    بھارتی سپراسٹار کرکٹر ویرات کوہلی کو ایودھیا میں رام مندر کے افتتاح کے موقع پر مدعو کیا گیا تھا مگر وہ اس میں شریک نہیں ہوئے تھے۔ تاہم وہاں لوگوں کو ویرات کا ہمشکل نظر آگیا جسے مداح کوہلی سمجھ بیٹھے اور ان کے ساتھ سیلفی لینے کے لیے امڈ آئے۔

    کوہلی کے ہمشکل نے بھارتی کرکٹ ٹیم کی کٹ زیب تن کی ہوئی تھی جبکہ بھارتی ٹیم کے مداح اس شخص کے ساتھ تصویر کھنچوانے کو بے تاب نظر آرہے تھے۔

    سوشل میڈیا پلیٹ فارم ’ایکس‘ پر شیئر کی گئی ویڈیو میں دیکھا جاسکتا ہے کہ بڑی تعداد میں لوگ کوہلی سے ملتے جلتے شخص کے گرد جمع ہیں۔

    ایکس پر شیئر کی گئی ویڈیو کے پیغام میں لکھا گیا کہ ’ایودھیا میں ویرات کوہلی کا ڈپلیکیٹ۔ لوگ ڈپلیکیٹ کوہلی کو دیکھ کر دیوانے ہوئے جارہے ہیں۔

    واضح رہے کہ بھارتی بلے باز 25 جنوری سے انگلینڈ کے خلاف شروع ہونے والی ہوم ٹیسٹ سیریز میں نجی وجوہات کی بنا پر پہلے دو مقابلوں کے لیے دستیاب نہیں ہونگے۔

  • سیلفی کی لت: یہ کوئی بیماری تو نہیں؟

    سیلفی کی لت: یہ کوئی بیماری تو نہیں؟

    اپنی تصاویر اُتارنے کی بات تو سمجھ میں آتی ہے، مگر جب یہ معاملہ جنون میں تبدیل ہوجائے تو سوال یہ پیدا ہوتا ہے کہ کہیں یہ کوئی بیماری تو نہیں؟ بعض افراد تو سیلفی کے جنون میں اپنی زندگیوں سے بھی ہاتھ دھو بیٹھے ہیں۔

    امریکن سائیکولوجیکل ایسوسی ایشن نے اسے ’سیلفی کا جنون‘ بھی قرار دیا تھا جس میں عجیب وغریب انداز میں سیلفیاں لینے اورانہیں سوشل میڈیا پراپ لوڈ کرنے کی شدید خواہش ہوتی ہے۔

    امریکن سائیکاٹرک ایسوسی ایشن نے چند برس قبل بار بار سیلفی لینے کے عمل کو ایک نیا ذہنی فتور یا بیماری قرار دیا تھا۔

    ماہرین نفسیات کے مطابق یہ عنصر ہر انسان میں پایا جاتا ہے مگر کسی میں اس کا ابھار کم جبکہ کہیں بہت زیادہ ہوتا ہے۔ انسانی فطرت میں ’نرگسیت‘ کا عنصر بڑی حد تک موجود ہے۔

    جب کوئی اپنی سیلفی کو سوشل میڈیا پر پوسٹ کرتا ہے تو وہ یہ جانتا ہے کہ اب بہت سے لوگ اسے دیکھیں گے۔ سیلفی لینے کے بعد اسے سوشل میڈیا پر پوسٹ کرنے کے پس پردہ وہ جذبہ کار فرما ہوتا ہے جسے خود نمائی یا خود ستائشی کا نام دے سکتے ہیں۔

    ماہرین کا ماننا ہے کہ اپنی ذات میں انتہا سے زیادہ خود پسند ہو جانا ایک قسم کا دماغی عارضہ ہے جس کی علامات درج ذیل ہیں۔

    خود کو ہرچیز کا حق دار سمجھنا یعنی بہتر جاننا
    یہ سوچ کہ ہر کوئی حسد کرتا ہے
    دوسروں کو نیچا دکھانا یا ان کے جذبات سے کھیلنا
    مستقل بنیادوں پر پسند کیے جانے کی خواہش
    دوسروں کو کم تر اورخود کو اعلٰی سمجھنا
    ہمدردانہ جذبات میں کمی
    ہمہ وقت وہم میں مبتلا رہنا
    طاقت، مال، شہرت اور کامیابی کی سوچوں میں گم رہنا

    ماہرہ خان نے بھارتی اداکارہ پروین بابی کا روپ دھار لیا

    ماہرین کا کہنا ہے کہ ’سیلفی کا جنون‘ انسان میں خود اعتمادی کی کمی پیدا کرتا ہے، جس کے نتیجے میں وہ شخص اپنے ہی حصار میں قید ہو جاتا ہے اور صرف اپنی پسند کو دوسروں پر لاگو کرنے کی خواہش رکھتا ہے، بالآخر یہ سمجھنے لگتا ہے کہ وہ کوئی اور ہی انسان ہے اور دوسروں سے قطعی مختلف ہے۔

  • سیلفی کا جنون ایک اور نوجوان کی جان لے گیا

    سیلفی کا جنون ایک اور نوجوان کی جان لے گیا

    مدھیہ پردیش: بھارت میں پکنک منانے جانے والا نوجوان سیلفی لینے کے دوران ندی میں گر کر ہلاک ہوگیا۔

    یہ واقعہ بھارت کے مدھیہ پردیش کے ضلع شیوپوری میں پیش آیا جہاں دوستوں کے ہمراہ  پکنک منانے جانے والے شخص کی سیلفی لینے کے دوران ندی میں گرنے سے موت واقع ہوگئی۔

    سیلفی لیتے ہوئے لڑکے کی جان چلی گئی!

    مقامی پولیس کے مطابق 30 سالہ شخص کی شناخت سریند شاکیا کے نام سے ہوئی ہے، وہ ندی کے کنارے کھڑا اپنے موبائل سے سیلفی بنا رہا تھا کہ اچانک اس کا پاؤں پھسل گیا۔

    بھارتی پولیس کا کہنا تھا کہ پاؤں پھسلنے کی وجہ سے سریندر ندی میں ڈوب گیا جس سے  اس کی موت ہوگئی۔