اسلام آباد : سینئر صحافی ایاز امیر کے بیٹے شاہ نواز نے پولیس کو بیان دیتے ہوئے کہا کہ گلے سے پکڑنے پر اہلیہ کو دھکا دیا، دوبارہ حملہ کرنے پر ڈمبل مارا۔
تفصیلات کے مطابق اسلام آباد میں تھانہ شہزاد ٹاؤن کی حدود چک شہزاد میں اہلیہ کو قتل کرنے میں ملوث ملزم شاہنواز امیر نے پولیس کو ابتدائی بیان ریکارڈ کرا دیا۔
ملزم شاہنواز امیر نے بیان میں کہا کہ سارہ سے کچھ عرصہ قبل سوشل میڈیا کے ذریعے رابطہ ہوا، 3 ماہ قبل شادی ہوئی، سارہ میری تیسری بیوی تھی۔
شاہنواز امیر نے کہا کہ پہلی اہلیہ کانام بھی سارہ تھا اور تیسری بیوہ سارہ کل ہی دبئی سے اسلام آباد پہنچی تھی۔
ملزم کا کہنا تھا کہ ایسا محسوس ہوتا تھا جیسے وہ کسی کی ایجنٹ ہے، گزشتہ شب اہلیہ نے مجھے گلے سے پکڑا لیکن میں نے پیچھے دھکیل دیا۔
شاہنواز امیر نے بتایا کہ جمعہ کی صبح بھی اس نےیہی کام کیا مجھے لگا میں دم گھٹنے سے مر جاؤں گا ، میں نے سارہ کو دھکا دیا، جس سے وہ گر گئی، اٹھ کر دوبارہ مجھ پر حملہ کیا، حملہ کرنے پر میں نے ورزش والا ڈمبل اسکو مارا وہ زخمی ہو گئی۔
ملزم کا بیان میں کہنا تھا کہ خون پھیلنے پراس کو باتھ ٹب میں ڈال کر پانی کھول دیا اور والد کو آگاہ کیا تو انہوں نے پولیس حکام کو واقعے کی اطلاع دی۔
