کراچی: سینئر صوبائی وزیر شرجیل انعام میمن کی ہدایت پر شہرقائد میں شہریوں کے لیے الیکٹرک بسوں کے نئے روٹ کا آغاز ہوگیا۔
الیکٹرک بس کا نیا روٹ ’’ای وی۔4‘‘ سپر ہائی وے سے نمائش چورنگی تک ہوگا، پیپلز پارٹی ایم پی اے راجا عبدالرزاق اور ساجد جوکھیو نے نئے روٹ کا افتتاح کیا، سینئر صوبائی وزیر شرجیل انعام میمن نے بتایا کہ نیا روٹ ’’ای وی فور‘‘ 55 کلومیٹر طویل ہوگا۔
شرجیل میمن نے کہا کہ نیا روٹ دنبہ گوٹھ، گلشن معمار، سہراب گوٹھ اور الآصف اسکوائر سے گزرے گا، روٹ سے عائشہ منزل، لالو کھیت اور تین ہٹی کے عوام بھی مستفید ہوسکیں گے۔
صوبائی وزیر نے کہا کہ الیکٹرک بس کے نئے روٹ سے مقامی معیشتوں کو فروغ ملے گا، لوگوں کے سفری اخراجات اور سڑکوں پر ٹریفک دباؤ میں بھی کمی آئے گی۔
شرجیل میمن نے کہا کہ حکومت شہریوں کو بہترین، سستی اور جدید سفری سہولت کیلئے مزید بسیں لائے گی، محکمہ ٹرانسپورٹ سندھ مزید نئے روٹس متعارف کرائے گا۔