لاہور: سینٹرل پنجاب کے کپتان احمد شہزاد پر قائد اعظم ٹرافی کے میچ میں بال ٹمپرنگ کا چارج لگا دیا گیا، احمد شہزاد پر سزا کا تعین آج ہوگا۔
تفصیلات کے مطابق سینٹرل پنجاب کے کپتان احمد شہزاد بال ٹمپرنگ کے الزام کی زد میں آگئے، ان پر الزام ہے کہ انہوں نے میچ کے دوران گیند کی حالت کوممنوعہ طریقے سے تبدیل کیا تھا۔
پی سی بی کے مطابق بال ٹمپرنگ کا واقعہ سینٹرل پنجاب اور سندھ کی ٹیموں کے درمیان فیصل آباد کے اقبال اسٹیڈیم میں کھیلے گئے میچ کے دوسرے روز پیش آیا۔
ذرائع کا کہنا ہے کہ سندھ کی پہلی اننگز میں 16ویں سے 20ویں اوور کے دوران فیلڈ امپائرز نے گیند کی کنڈیشن کا معائنہ کیا اور اس میں تبدیلیاں محسوس کیں۔ بعدازاں امپائرز نے فوری طور پر گیند تبدیل کردی۔
پاکستان کرکٹ بورڈ کے مطابق قائد اعظم ٹرافی کے دوران بال ٹمپرنگ کرنے پر احمد شہزاد کے خلاف ہونے والی کارروائی کا اعلاج آج کیا جائے گا۔
میچ ریفری ندیم ارشد احمد شہزاد کا موقف سننے کے بعد فیصلہ کریں گے، امکان ہے کہ اوپنر بلے باز پر میچ فیس کا 50 سے 75 فیصد جرمانہ عائد کیا جاسکتا ہے۔
یاد رہے کہ احمد شہزاد پر ممنوعہ ادویات کے استعمال کے باعث چار ماہ کی پابندی عائد کی گئی تھی جو گزشتہ سال 22 دسمبر کو ختم ہوگئی تھی۔
