کراچی : مسلم لیگ ن کے سینیٹر عبدالقیوم نے کہا ہے کہ اٹھارہویں ترمیم میں تبدیلی لانا ہوئی تو مل کر کریں گے، اس کیلئے پی ٹی آئی کو ماحول بنانا ہوگا۔
ان خیالات کا اظہار انہوں نے اے آر وائی نیوز کے پروگرام اعتراض ہے میں میزبان عادل عباسی سے گفتگو کرتے ہوئے کیا، سینیٹر عبدالقیوم نے کہا کہ دنیا بھر میں جو آئین بنتے ہیں ان میں بھی ترامیم ہوتی ہیں۔
اٹھارہویں ترمیم میں95شقیں ہیں ان میں بہت ساری باتیں بہت اچھی ہیں لیکن یہ کہنا کہ اس کو چھیڑ نہیں سکتے یہ بات ٹھیک نہیں ہے،18ویں ترمیم سے کیا فائدہ ہوا اور کیا نقصان ہورہا ہے دیکھا جاسکتا ہے، اس کی بعض شقوں کا بغور جائزہ لے کر اس کو ٹھیک کیا جاسکتا ہے۔
لہٰذا اس کے لیے تمام جماعتوں کو مل کر فیصلہ کرنا ہوگا، آئینی ترمیم کے معاملے پر ہر پارٹی اپنے اپنے ممبران پر نظر رکھے، ترمیم اتفاق رائے سے بنی تھی تو تبدیلی بھی مل کرہی لانا ہوگی۔
اس حوالے سے پیپلز پارٹی کے ایم این اے خورشید شاہ نے کہا کہ اٹھارہویں ترمیم اتفاق رائے سے ہوئی تھی، اس میں تبدیلی کی ضرورت نہیں ہے، دس بیس سال بعد ضرورت پڑی تو کرلیں گے۔
انہوں نے کہا کہ یہ سینیٹر عبدالقیوم کی اپنی رائے ہے لیکن یہ ن لیگ کی نہیں ہوسکتی اور اگر جب ن لیگ ترمیم میں تبدیلی کی بات کرے گی تو پیپلز پارٹی بھی لائحہ عمل بتائے گی۔