اسلام آباد : وفاقی وزیر قانون سینیٹر اعظم نذیر تارڑ کا ورکنگ گروپ کی رپورٹ پر ردعمل سامنے آگیا ، جس میں بانی پی ٹی آئی کی گرفتاری اور زیر التوا مقدمات کو پاکستان کا داخلی معاملہ قرار دیا ہے۔
تفصیلات کے مطابق وزیر قانون اعظم نذیرتارڑ نے اقوام متحدہ کے ورکنگ گروپ کی رپورٹ پر ردعمل دیتے ہوئے کہا ہے کہ بانی پی ٹی آئی کی گرفتاری اور زیرالتوا مقدمات پاکستان کا داخلی معاملہ ہے، خودمختار ریاست کے طور پر پاکستان میں عدالتوں کے ذریعے آئین اور مروجہ قوانین پر عمل ہوتا ہے۔
وفاقی وزیر قانون کا کہنا تھا کہ بانی پی ٹی آئی سزایافتہ قیدی کےطورپرجیل میں ہیں، انہیں آئین، قانون اوربین الاقوامی اصولوں کےمطابق تمام حقوق حاصل ہیں۔
انھوں نے مزید کہا کہ کئی مقدمات میں بانی پی ٹی آئی کو ریلیف ملنا شفاف، منصفانہ ٹرائل اورعدالتی نظام کا مظہر ہے، آئین، قانون ،عالمی اصولوں سے ماورا کوئی مطالبہ امتیازی،جانبدار اور عدل کے منافی کہلائے گا۔
یاد رہے صوابدیدی حراست سے متعلق اقوام متحدہ کے ورکنگ گروپ کی جانب سے بیان میں کہا گیا ہے کہ بانی پی ٹی آئی کی حراست بین الاقوامی قوانین کی خلاف ورزی ہے ، انھیں فوری طورپررہا کرنا چاہیے۔
ورکنگ گروپ کا کہنا تھا کہ بین الاقوامی قانون کے مطابق انہیں معاوضے اوردیگرامورکی تلافی کی جائے۔
ورکنگ گروپ نے مطالبہ کیا تھا کہ سابق وزیراعظم کی غیر قانونی حراست کا ذمےدار کون ہے اس کی باقاعدہ تحقیقات کرائی جائے۔
اقوام متحدہ کے گروپ نے مزید کہا تھا کہ تحریک انصاف کے بانی کو الیکشن لڑنے سے روکنے کیلئے ان کے خلاف سیاسی بنیادوں پرمقدمات بنائے گئے، انتخابات سے قبل ان کی پارٹی کے ارکان کو گرفتاراورتشدد کا نشانہ بنایا گیا اور ان کی ریلیوں میں رکاوٹ ڈالی گئی۔
