اسلام آباد: پاکستان تحریکِ انصاف نے سینیٹ انتخابات میں حصہ لینے والے امیدواروں کی جانچ پڑتال کے لئے پارلیمانی بورڈ قائم کرنے کا فیصلہ کیا اور اچھی شہرت کے حامل نئے چہروں کو ترجیح دینے کا فیصلہ بھی کر لیا گیا ہے۔
تحریکِ انصاف کے چیئرمین عمران خان کی زیرِ صدارت بنی گالا میں تحریکِ انصاف کی کور کمیٹی کا اجلاس ہوا، جس میں سینیٹ انتخابات سے متعلق طویل مشاورت کی گئی۔
اس موقع پر پی ٹی آئی کور کمیٹی نے اسمبلیوں میں واپس نہ جانے کا فیصلہ برقرار رکھتے ہوئے اچھی شہرت کے حامل امیدواروں کو موقع دینے کا فیصلہ کیا جبکہ سینیٹ انتخابات میں حصہ لینے کے لئے درخواستوں کی وصولی اور امیدواروں کی جانچ پڑتال کے لئے پارلیمانی بورڈ بھی قائم کیا گیا۔
عمران خان نے اراکینِ کور کمیٹی سے مشاورت کرتے ہوئے کہا کہ این اے ایک سو بائیس کی فرانزک رپورٹ سے دھاندلی ثابت ہوگئی ہے، حکومت یہ نہ سمجھے کہ عدالتی کمیشن قائم کئے بناء جان بخشی ہو جائے گی۔
انھوں نے کہا کہ حکومت مخالف دھرنا پہلا حملہ تھا، عدالتی کمیشن نہ بنا تو محمود غزنوی کی طرح بار بار حملے کریں گے۔
