Tag: سینیٹ انتخابات

اسلام آباد: پی ٹی آئی سینیٹر اورنگزیب اورکزئی سینیٹ میں پارٹی ٹکٹ سے دست بردار ہو گئے۔

اے آر وائی نیوز کے مطابق وفاقی وزیر شبلی فراز اور اعظم سواتی آج جمعے کو سینیٹر اورنگزیب اورکزئی کے گھر گئے، سینیٹر سجاد حسین، سینیٹر مرزا آفریدی اور نصیب اللہ بازئی بھی ان کے ہمراہ تھے۔

ملاقات میں سینیٹر اورنگزیب پارٹی ٹکٹ سے دست بردار ہو گئے، وفاقی وزرا نے سینیٹر اورنگزیب کی پارٹی کے لیے خدمات کا اعتراف کیا۔

شبلی فراز نے میڈیا سے گفتگو میں کہا اورنگزیب خان نے فراخ دلی سے وزیر اعظم عمران خان کا فیصلہ قبول کیا، وہ پارٹی کا اثاثہ ہیں، مستقبل میں بھی ان سے خدمات لیں گے۔

شبلی فراز کا کہنا تھا کہ اورنگزیب خان اورکزئی نے پی ٹی آئی کا مؤقف پُر زور طریقے سے پیش کیا۔

خیبرپختونخوا؛ پی ٹی آئی کے سینیٹ ٹکٹوں میں ردوبدل کا امکان

سینیٹر اورنگزیب خان نے کہا عمران خان کا وژن ہمارے لیے قابل قدر ہے، وقت کا تقاضا ہے کہ عمران خان کا ساتھ دیں، ہم محب وطن ہیں ہر مشکل میں وزیر اعظم کے ساتھ رہیں گے۔

اعظم خان سواتی نے اس موقع پر کہا اورنگزیب خان کے مشکور ہیں جنھوں نے اس فیصلے کو قبول کیا، ان کی خدمات کے اعتراف میں آج ہم یہاں آئے، آئندہ انتخابات میں بھاری اکثریت سے کامیاب ہوں گے۔

یاد رہے کہ وزیر اعظم عمران خان نے ایک بیان میں کہا تھا کہ ہم نے ارب پتی لوگوں کو سینیٹ ٹکٹ کی روایت توڑ دی ، سینیٹ الیکشن میں بہ آسانی کامیابی حاصل کر لیں گے۔

سکھر: سینیٹ الیکشن کے لیے ٹکٹوں کی تقسیم کے سلسلے میں بلوچستان کے بعد سندھ سے بھی آواز اٹھنے لگی۔

اے آر وائی نیوز کے مطابق ٹکٹوں کی تقسیم پر پاکستان تحریک انصاف سندھ ریجن کے نمائندوں نے گورنر سندھ عمران اسماعیل کو خط لکھ کر اپنا احتجاج ریکارڈ کرا دیا ہے۔

خط میں کہا گیا ہے کہ ٹیکنو کریٹ کی سیٹ پر نامزد سیف اللہ ابڑو کو ٹکٹ دے کر غلط فیصلہ کیا گیا، سیف اللہ ابڑو پر کرپشن چارجز ہیں، اور ان کے خلاف نیب میں کیسز چل رہے ہیں۔

خط میں کہا گیا کہ سیف اللہ ابڑو پیپلز پارٹی کے لیے کام کرتے رہے ہیں، ایک متنازع شخص کو ٹکٹ دیا گیا تو بلدیاتی اور عام انتخابات سے دست بردار ہو جائیں گے۔

کپتان نے کارکنوں کی آواز سن لی، عبدالقادر کو ٹکٹ نہ دینے کا فیصلہ

خط کے متن میں کہا گیا ہے کہ سیف اللہ ابڑو پارٹی کے کئی طاقت ور لوگوں کا اے ٹی ایم ہیں۔ خط میں گورنر سندھ کو یہ بھی بتایا گیا ہے کہ ہم وفد کی شکل میں آپ سے ملاقات کے لیے گورنر ہاؤس آ رہے ہیں۔

یاد رہے کہ چند دن قبل بلوچستان سے بھی عبدالقادر کو جنرل سیٹ کے لیے سینیٹ ٹکٹ جاری کیا گیا تھا، تاہم بلوچستان ریجن کے کارکنوں کے احتجاج کے بعد ان سے ٹکٹ واپس لیا گیا اور ان کی جگہ ظہور آغا کو ٹکٹ دیا گیا۔

پی ٹی آئی بلوچستان نے عبدالقادر کو سینیٹ ٹکٹ دینے پر شدید تحفظات کا اظہار کیا تھا، اور ارکان نے ان کو پیراشوٹر قرار دیا تھا۔