Tag: سینیٹ کی قائمہ کمیٹی

اسلام آباد : سینیٹ کی قائمہ کمیٹی نے بجلی کی قیمتوں میں کمی کے لئے کیپٹیو پاور پلانٹس لیوی بل 2025 متفقہ طور پر منظور کرلیا۔

تفصیلات کے مطابق سینیٹر انوشہ رحمان کی زیر صدارت سینیٹ کی قائمہ کمیٹی خزانہ کا اجلاس ہوا، کمیٹی نے کیپٹیو پاور پلانٹس لیوی بل 2025 متفقہ طور پر منظور کرلیا۔

سیکرٹری پیٹرولیم ڈویژن نے بتایا کہ بل لانے کا مقصد کیپسٹی یوٹیلائزیشن کا بوجھ کم کرنا ہے، عام عوام کیلئے بجلی کی قیمتوں میں کمی کیلئے یہ بل لایا جارہا ہے۔

ان کا کہنا تھا کہ آرڈیننس کے جاری ہونے کے بعد فوری طور پر 5فیصد لیوی عائد ہوئی، جولائی 2025 سے کیپٹیو پاور پلانٹس پر لیوی کی شرح 10 فیصد ہوگی جبکہ فروری 2026 میں لیوی 15 فیصد اور اگست میں 20 فیصد عائد ہوگی۔

ایڈیشنل سیکرٹری خزانہ نے کہا کہ کیپٹیو پاور پلانٹس کو بند کرنے کا کہا گیا تھا اور پھر کمپنیاں عدالت میں چلی گئیں، اسی لئے حکومت نے فیصلہ کیا کہ اس کو بند کئے بغیر لیوی عائد کی جائے۔

اسلام آباد : سینیٹ کی قائمہ کمیٹی برائے داخلہ نے پیکا ایکٹ میں متنازع ترمیمی بل کی منظوری دے دی۔ سینیٹر کامران مرتضی اور صحافتی تنظیموں نے مخالفت کی۔

تفصیلات کے مطابق سینیٹ کمیٹی داخلہ کا اجلاس فیصل سلیم رحمان کی زیر صدارت ہوا ، اجلاس میں پیکا ایکٹ میں متنازع ترمیم کی منظوری دے دی گئی۔

سیکریٹری داخلہ نے بتایا قانون لوگوں کے تحفظ کیلئے لایا گیا، بحث کے دوران صحافتی تنظیموں نے متنازع بل کی مخالفت کی۔

چیئرمین کمیٹی نے صحافتی تنظیموں سے اپنی تحریری سفارشات پیش نہ کرنے پر سوالات اٹھا دیے اور کہا صحافتی تنظیموں کو چاہیے تھا کمیٹی میں تحریری سفارشات رکھتے۔

سینیٹر عرفان صدیقی نے کہا اس ملک میں کسی کو ہتھکڑیاں لگانے کے لیے ضروری نہیں کہ کسی قانون کی ضرورت ہو، مجھے خود کرایہ داری کے قانون کے تحت پکڑا گیا تھا۔

سینیٹرکامران مرتضی نے کہا بل میں بہت سی کمزوریاں ہیں، فیک نیوز کی تشریح نہیں ہے، کیسے فیصلہ ہوگا کہ فیک نیوزکیا ہے؟ جو متنازع قوانین کی بنیاد رکھتا ہے وہی اس کی زد میں آجاتا ہے۔

چیئرمین کمیٹی کا کہنا تھا کہ میں خود بھی فیک نیوزکا متاثر رہا ہوں۔ فیک نیوزکیخلاف مقدمات کریں تو صرف وکیلوں کو ہی ادائیگیاں کرتے رہیں گے۔

عرفان صدیقی نے کہا بل کی روح سے ہمیں اتفاق ہے، سوشل میڈیا پرفیک نیوزکی بیماری کا علاج ضروری ہے لیکن صحافیوں کا تحفظ بھی کرنا ہے۔ اگر قانون کا رخ صحافیوں کی جانب آئے گا توہم صحافیوں کے ساتھ کھڑے ہوں گے۔

اینکرزایسوسی ایشن نے متنازع بل پراعتراضات کیے کہا ہمیں وقت ہی نہیں دیا گیا کہ ہم تجاویز لاسکیں۔

صحافتی تنظیموں نے کہا اس بل میں بہت سی خامیاں ہیں، بہتری کے بجائے خرابی ہوگی، بل میں فیک نیوز کی تشریح بہت مبہم ہے۔

صحافتی تنظیموں نے مؤقف اختیار کیا ہم خود فیک نیوز کے متاثرین ہیں، فیک نیوز کے لیے قانون کے حامی ہیں لیکن موجودہ صورت میں بل ہمیں قبول نہیں ہے۔

اسلام آباد : صیہونیت کو بطور مذہب اپنانے، لٹریچر کی تبلیغ و اشاعت کیخلاف بل متفقہ طور پر منظور کرلیا گیا۔

تفصیلات کے مطابق سینیٹ کی قائمہ کمیٹی برائے داخلہ کا اجلاس ہوا، اجلاس میں صیہونیت کو بطور مذہب اپنانے، لٹریچر کی تبلیغ و اشاعت کیخلاف بل متفقہ طور پر منظور کرلیا گیا۔

سینیٹ کمیٹی برائے داخلہ میں بل سینیٹر افنان اللہ کی جانب سے پیش کیا گیا، بل میں کہا گیا کہ کوئی صیہونیت کو بطور مذہب اپنائے، تبلیغ واشاعت کرے تو3 سال سزا ،40ہزار روپے جرمانہ ہوگا۔

بل میں کہنا تھا کہ صہیونیت کے ذریعے کوئی تفریق ،نفرت کی پاداش میں بھی3 سال سزا ،40 ہزار جرمانہ ہوگا۔

محکمہ داخلہ خیبرپختونخوا اور سندھ پہلے ہی اس بل کی حمایت کرچکے ہیں۔

اسلام آباد : سینیٹ کی قائمہ کمیٹی برائےخزانہ نے مرغی کی فیڈ پر ٹیکس چھوٹ ختم کرنے کی حمایت کردی۔

تفصیلات کے مطابق سینیٹ کی قائمہ کمیٹی برائے خزانہ کا اجلاس ہوا، جس میں ایف بی آر حکام نے بتایا کہ مرغی کی فیڈ پر 10 فیصد ٹیکس چھوٹ ختم کی جارہی ہے۔

ٹیکس حکام کا کہنا تھا کہ گائے اور بھینس سمیت لائیو اسٹاک فیڈ پر بھی 10 فیصد سیلز ٹیکس عائد ہو گا، اس سےسیلز ٹیکس کی مد میں سینتالیس ارب روپے حاصل ہوں گے۔

جس پر انوشے رحمان نے کہا کہ مرغی کی فیڈ مہنگی ہونے سے مرغی مہنگی ہوجائے گی، مرغی 480 روپے کے بجائے 580 روپے کلو ہو جائے گی۔

سینیٹر فاروق نائیک نے پوچھا شیر مال پر ٹیکس کس کی سوچ میں آیا، شیر مال تو کراچی والے قورمے کے ساتھ کھاتے ہیں، جس پر انوشے رحمان نے کہا کہ میں شیرمال نہاری کے ساتھ کھاتی ہوں۔

انوشے رحمان نے مزید کہا کہ مرغی کی قیمت بڑھے گی تو انتظامیہ پولٹری والوں کو تنگ کرنے پہنچ جائے گی۔

کمیٹی نے مرغی فیڈ پر دس فیصد ٹیکس چھوٹ ختم کرنے کی حمایت کردی۔

اسلام آباد : سینیٹ کی قائمہ کمیٹی برائے خزانہ نے شیرخوار بچوں کے دودھ کے ڈبے پر ٹیکس مسترد کرتے ہوئے کہا ڈبے پر 18 فیصد سیلز ٹیکس نہ لگایا جائے۔

تفصیلات کے مطابق سلیم مانڈوی والا کی زیر صدارت سینیٹ کی قائمہ کمیٹی خزانہ کا اجلاس ہوا، قائمہ کمیٹی نے شیر خوار بچوں کے دودھ کے ڈبے پر ٹیکس مسترد کردیا۔

کمیٹی نے کہا کہ شیرخوار بچوں کے دودھ کے ڈبے پر 18 فیصد سیلز ٹیکس نہ لگایا جائے اور 18 فیصد سیلز ٹیکس کی تجویز مسترد کی جائے۔

کمیٹی نے اسٹیشنری پر سیلز ٹیکس مسترد کرتے ہوئے کہا اسٹیشنری پر 10 فیصد سیلز ٹیکس نہ لگایا جائے۔

ٹیکس حکام نے بتایا کہ آئی ایم ایف بچوں کےدودھ پر 18 فیصد سیلز ٹیکس اور اسٹیشنری پر بھی 10 فیصد سیلز ٹیکس کا مطالبہ کر رہا ہے۔

حکام کا کہنا تھا کہ آئی ایم ایف 749 اشیا کی ٹیکس چھوٹ ختم کرانا چاہتا ہے، بجٹ میں 337 آئٹمز پر ٹیکس چھوٹ ختم کررہے ہیں۔

جس پر فاروق ایچ نائیک نے کہا کہ سیدھا سیدھا آئی ایم ایف کا بجٹ ہےاور ہربات انہی کی مانی جارہی ہے تو ٹیکس حکام کا کہنا تھا کہ آئی ایم ایف دودھ پر 40 ارب روپے اور اسٹیشنری پر 7 ارب روپے کا ٹیکس لگانا جبکہ 107 ارب روپے کی ٹیکس چھوٹ ختم کرانا چاہتا ہے۔