ڈرائیونگ کرنا ایک ایسی ذمہ داری ہے کہ ڈرائیور سیٹ پر بیٹھتے ہی بدل جاتا ہے وہ پہلے جیسا شخص نہیں رہتا وہ یکسر تبدیل ہوجاتے ہیں۔
اگراس پر آپ کے ذہن میں سوال آرہا ہے کہ ڈرائیونگ کرتے ہوئے کیا کرنا اور کیا نہیں کرنا چاہیے تو اس جواب سیدتی میگزین کی رپورٹ میں دیا گیا ہے۔
اس میں ماہرین نے ان عام غلطیوں کی نشاندہی کی ہے جو زیادہ تر لوگ دوران ڈرائیونگ کرتے ہیں ان سے نہ صرف گاڑی کو نقصان پہنچتا ہے بلکہ جانی نقصان بھی ہو سکتا ہے۔
تھکاوٹ
اگر آپ جسمانی طور پر اچھا محسوس نہیں کر رہے یا تھکاوٹ کا شکار ہیں تو اس صورت میں کبھی ڈرائیونگ سیٹ پر نہ بیٹھیں، اگر آپ کے جسم کو آرام کی ضرورت ہے تو اس صورت میں آپ کو آرام کرنا چاہیے۔
اگر ایسی صورت حال کا سامنا راستے کے درمیان کرنا پڑ گیا ہے تو بھی گاڑی روک دیں اور آرام کریں کیونکہ اس کے بعد آپ اپنی منزل پر پہنچ جائیں گے لیکن دوسری صورت میں کچھ بھی ہو سکتا ہے۔
تیز رفتاری
ماہرین تیز رفتاری سے پرہیز کرنے کا مشورہ دیتے ہیں اور جس سڑک پر آپ سفر کر رہے ہیں اس کے لیے مقررہ معیار کی پابندی کرنے پر بھی زور دیتے ہیں اور ہر سال اسی وجہ سے کئی ایکسیڈنٹس ہوتے ہیں۔
مناسب جوتے پہنیں
ہوائی چپل یا عام طور پر باتھ روم وغیرہ میں استعمال ہونے والی جوتی میں گاڑی چلانا خطرناک ہو سکتا ہے اسی طرح ننگے پاؤں تو قطعی گاڑی چلانے کی کوشش نہیں کرنی چاہیے۔
ماہرین کہتے ہیں کہ مناسب جوتے پہن کر گاڑی چلائی جائے وہ بوٹ بھی ہو سکتے ہیں اور سینڈل بھی تاہم ڈھیلے ڈھالے یا پیر کے سائز سے بڑے یا چھوٹے جوتے استعمال کرنے سے گریز کریں۔
سیٹ بیلٹ
یہ ایک اہم بات ہے سیٹ بیلٹ کی اہمیت بہت زیادہ ہے کسی بھی حادثے کی صورت میں اس کی بدولت جانی نقصان سے بچا جا سکتا ہے۔
ہیڈ فون کا استعمال
سفر خصوصاً لمبے سفر کے دوران موسیقی کا سنا جانا کوئی انہونی بات نہیں ہے اور یہ زیادہ قابل اعتراض بھی نہیں ہے تاہم اس کے لیے ہیڈفون کا استعمال کرنا زیادہ اچھی بات نہیں ہے۔
ہیڈفون کے ذریعے موسیقی سنتے ہوئے آپ کی توجہ بٹتی ہے اور باہر کی آوازیں بھی درست طور پر سنائی نہیں دیتیں جیسا کہ کسی دوسری گاڑی کا ہارن وغیرہ، اس لیے کوشش کی جانی چاہیے کہ اگر موسیقی سننا بھی ہے تو اسپیکر سے سنی جائے۔
موبائل فون کا استعمال
ڈرائیو کرتے ہوئے آپ کا ذہن اور آنکھیں ڈرائیونگ پر مرکوز رہنی چاہییں اور اس کی راہ میں سب سے بڑی رکاوٹ آج کل موبائل فون بنتا دیکھا جا رہا ہے اکثر کال آنے پر لوگ باتیں کرتے ہیں اور پھر اس کا استعمال بھی کرتے ہیں یہ عمل مزید توجہ بٹا سکتا ہے۔
اس لیے کوشش کی جائے کہ دوران ڈرائیونگ موبائل استعمال نہ کیا جائے جبکہ اس پر ٹیکسٹ میسیج لکھنا یا پڑھنا اس سے بھی زیادہ خطرناک ہو سکتاہے۔
اگلی گاڑی سے کچھ فاصلہ رکھیں
اکثر ڈرائیور اگلی گاڑی کے بہت قریب چلتے ہیں اور اگر اس کو ہنگامی طور پر بریک لگانا پڑ جائے تو آپ کی گاڑی اس سے ٹکرا سکتی ہے اس لیے مناسب فاصلہ رکھ کر گاڑی چلائیں۔ جبکہ اگر آپ کے پیچھے کوئی گاڑی بہت قریب چل رہی ہے تو بائیں طرف ہٹ کر اس کو آگے نکلنے کا موقع دے دیں۔
گاڑی کی رفتار میں اچانک اضافہ یا کمی کرنے کو غلطی ہی قرار دیا جاتا ہے کیونکہ اس سے ایک تو حادثہ پیش آنے کا رہتا ہے اور دوسرا اس سے گاڑی کی حالت پر بھی منفی اثر پڑتا ہے
