کراچی: سیکریٹری ایوی ایشن اور پائلٹس ایسوسی ایشن (پالپا) کے درمیان مذاکرات کامیاب ہوگئےجس کے بعد قومی ایئرلائن کا آپریشن بحال ہوگیا۔
اے آر وائی نیوز کی رپورٹ کے مطابق پی آئی اے اور پالپا کے درمیان کامیاب مذاکرات کے بعد تحریری معاہدہ طے پاگیا، پالپا کے نائب صدر اور ڈائریکٹر پی آئی اے نے معاہدے پر دستخط کیے۔
معاہدے کے مطابق پی آئی اے کپتانوں اور عملے کو تمام حفاظتی کٹس مہیا کرے گا، طیاروں کی ڈس انفیکشن اور مکمل حفاظتی سامان مہیا کیا جائے گا، کپتان طیارے کی ڈس انفیکشن کو خود مانیٹر کرے گا، ڈس انفیکشن کرنے والے عملے کو پی آئی اے خود تربیت دے گا۔
رپورٹ کے مطابق سی اے اے انسپکٹر ہر طیارے کو کلیئرنس سرٹیفکیٹ دے گا، کپتان ڈس انفیکشن سے مطمئن نہیں تو طیارہ نہیں اڑایا جائے گا۔
معاہدے کے تحت کپتان کی تسلی کے بعد جہاز میں مسئلہ نکل آتا تو انتظامیہ ذمہ دار نہیں ہوگی، کپتان جہاز میں سیفٹی پر مطمئن نہیں تو تحریری طور پر انتظامیہ کو آگاہ کرے گا۔
دوسری جانب پی آئی اے، پالپا کے مذاکرات کے بعد قومی ایئرلائن کا آپریشن بحال ہوگیا، برطانیہ اور کینیڈا جانے والی پرواز روانگی کے لیے تیار ہے۔
ترجمان کے مطابق ہڑتالی پائلٹس ایئرپورٹس پہنچنا شروع ہوگئے، لاہور سے ٹورنٹو جانے والی پی کے 783 میں مسافروں کی بورڈنگ شروع کردی گئی، اسلام آباد سے برمنگھم جانے والی پی کے 791 کی بورڈنگ بھی شروع کردی گئی، دونوں خصوصی پروازوں میں 600 سے زائد مسافر روانہ ہوں گے۔
یاد رہے کہ اس سے قبل پالپا نے پی آئی اے کی پروازیں آپریٹ کرنے سے انکار کردیا تھا، ذرائع کا کہنا تھا کہ پالپا انتظامیہ کے اختلافات کی اصل وجہ تنخواہ سے 3 فیصد کٹوتی ہے، کپتانوں نے پی آئی اے کی مالی مشکلات کے تناظر میں کٹوتی سے انکار کردیا ہے۔
