Tag: سیکیورٹی فورسز آپریشنز

راولپنڈی : سیکیورٹی فورسز کے مختلف انٹیلی جنس بیسڈ آپریشنز کے دوران 25 جوانوں نے جام شہادت نوش کیا جبکہ 27 دہشت گرد مارے گئے۔

تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ سیکیورٹی فورسز نے ڈیرہ اسماعیل خان کے مختلف علاقوں میں انٹیلی جنس بیسڈ آپریشنز کئے، جس کے دوران مجموعی طور پر ستائیس دہشت گرد مارے گئے۔

سامنے آنے والی تفصیلات میں بتایا گیا دہشت گردوں کی موجودگی کی اطلاع پر درازندہ میں انٹیلی جنس بیسڈ آپریشن کیا گیا، آپریشن کے دوران دہشت گردوں کے ٹھکانے کو تباہ کر دیا گیا اور 17 دہشت گرد مارے گئے۔

دریں اثناء کلاچی میں بھی انٹیلی جنس بیسڈ ایک اور آپریشن کیا گیا، جس کے نتیجے میں دہشت گردوں کے ٹھکانے کو موثر انداز میں نشانہ بنایا گیا اور کارروائی میں چار دہشت گرد مارے گئے، تاہم شدید فائرنگ کے تبادلے میں وطن کے 2 بہادر سپوت بہادری سے لڑتے ہوئے شہید ہوگئے۔

آئی ایس پی آر کا کہنا تھا کہ مارے گئے دہشت گرد سیکورٹی فورسز کے خلاف دہشت گردی کی متعدد کارروائیوں کے ساتھ ساتھ معصوم شہریوں کے قتل میں بھی سرگرم تھے جبکہ کارروائیوں کے دوران اسلحہ، گولہ بارود اور دھماکہ خیز مواد بھی برآمد کیا گیا۔

ایک اور واقعہ میں 12 دسمبر کو علی الصبح چھ دہشت گردوں کے ایک گروپ نے درابن میں سیکورٹی فورسز کی چوکی پر حملہ کیا، چوکی میں داخل ہونے کی کوشش کو مؤثر طریقے سے ناکام بنا دیا گیا، جس کے بعد دہشت گردوں نے بارود سے بھری گاڑی کو پوسٹ سے ٹکرا دیا اور ساتھ ہی خودکش حملہ بھی کیا گیا۔

ترجمان کے مطابق دھماکوں کے نتیجے میں عمارت گر گئی، جس سے متعدد ہلاکتیں ہوئیں، واقعہ میں 23 بہادر جوان شہید ہوئے جبکہ تمام چھ دہشت گردوں کو مؤثر طریقے سے جہنم واصل کر دیا گیا۔

پاک فوج کے ترجمان نے کہا کہ علاقے میں موجود کسی بھی دوسرے دہشت گرد کو ختم کرنے کے لئے سینی ٹائزیشن آپریشنز کئے گئے، سیکیورٹی فورسز ملک سے دہشت گردی کی لعنت کو ختم کرنے کے لئے پرعزم ہیں اور بہادر سپاہیوں کی یہ قربانیاں ہمارے عزم کومزیدتقویت دیتی ہیں۔