اسپن وام : سیکیورٹی فورسز نے شمالی وزیرستان میں آپریشن کرتے ہوئے 6 خوارجی ہلاک کردیا جبکہ لیفٹیننٹ کرنل سمیت 5 اہلکار بھی شہید ہوئے۔
تفصیلات کے مطابق پاک فوج کے شعبہ تعلقات عامہ ( آئی ایس پی آر ) کی جانب سے بیان میں کہا گیا کہ سیکیورٹی فورسز نے شمالی وزیرستان کے علاقے اسپن وام میں آپریشن کیا ، آپریشن کے دوران 6 خوارجی مارے گئے۔
آئی ایس پی آر کا کہنا تھا کہ آپریشن میں فائرنگ کے تبادلے میں لیفٹیننٹ کرنل سمیت 5 اہلکار بھی شہید ہوگئے ، شہدا میں لیفٹیننٹ کرنل محمد علی شوکت، نائیک محمد اللہ ، لانس نائیک اختر زمان، لانس نائیک شاہد اللہ ،لانس نائیک یوسف علی اور سپاہی جمیل احمد شامل ہیں۔
ترجمان نے بتایا کہ علاقےمیں ممکنہ خوارجیوں کے خاتمے کیلئے کلیئرنس آپریشن جاری ہے۔
شہید ہونے والے 43 سالہ لیفٹیننٹ کرنل محمدعلی شوکت کا تعلق فیصل آباد سے تھا ، لیفٹیننٹ کرنل محمدعلی شوکت شہید نے سوگوار ان میں اہلیہ اور 3 بیٹے چھوڑے۔
30سالہ لانس نائیک محمداللہ شہید کا تعلق ضلع خیبر سےتھا ، لانس نائیک محمداللہ شہید نے پاک فوج میں 13 سال تک دفاع وطن کا فریضہ سرانجام دیا انھوں نے سوگواران میں اہلیہ کو چھوڑا۔
30 سالہ لانس نائیک اختر زمان شہید کا تعلق ضلع لکی مروت سے تھا، انھوں نے 10 سال تک دفاع وطن کا فریضہ سرانجام دیا، شہید نے سوگواران میں اہلیہ کوچھوڑا۔
29 سالہ لانس نائیک شاہد اللہ شہید کا تعلق ضلع ٹانک سے تھا، انھوں نے 7 سال پاک فوج میں خدمات سرانجام دیں ، شہید نے سوگواران میں اہلیہ چھوڑی جبکہ 31 سالہ لانس نائیک یوسف علی شہید کا تعلق لوئر اورکزئی سے تھا، انھوں نے11 سال تک پاک فوج میں فریضہ سرانجام دیا، شہید نے سوگواران میں اہلیہ چھوڑی۔
26 سالہ سپاہی جمیل احمدشہیدکاتعلق ضلع سوات سے تھا، سپاہی نے 5سال تک پاک فوج میں خدمات سرانجام دیں اور سوگواران میں اہلیہ چھوڑی۔
