کراچی: شہر قائد میں ڈکیتی کی ایک اور واردات نے شہریوں میں عدم تحفظ کا احساس بڑھا دیا ہے، اس واردات میں ڈاکوؤں نے ایف بی ایریا کی ایک گیس دکان کو دن دہاڑے لوٹا، اور بہ آسانی موٹر سائیکل پر فرار ہو گئے۔
تفصیلات کے مطابق کراچی کے علاقے فیڈرل بی ایریا میں 3 ڈاکوؤں نے سی این جی سلنڈر کی دکان پر دھاوا بول کر لوٹ مار کی، واردات کے دوران دکان میں موجود افراد کو یرغمال بنایا گیا، واقعے کی سی سی ٹی وی فوٹیج بھی منظر عام پر آ گئی ہے۔
فوٹیج میں ڈاکوؤں کو واردات کرتے دیکھا جا سکتا ہے اور ڈاکوؤں کے چہرے بھی واضح طور پر نظر آ رہے ہیں، جس سے یہ سوال اٹھتا ہے کہ کراچی میں مجرموں کو پکڑے جانے کا خوف کیوں نہیں ہے، کیا پولیس پکڑنے میں ناکام رہتی ہے یا ان کی سرپرستی حاصل ہے۔
اس واردات میں ڈاکوؤں نے سلنڈر کی دکان پر موجود افراد سے، جو کھانا کھا کر اٹھ رہے تھے، 4 موبائل فون اور 30 ہزار روپے لوٹے، ڈاکو واردات کے بعد ایک ہی موٹر سائیکل پر بیٹھ کر فرار ہو گئے۔
فوٹیج میں دیکھا جا سکتا ہے کہ فرار ہوتے ڈاکوؤں کو دکان دار نے اینٹ اٹھا کر ماری جس سے اس کے غصے اور مایوسی کا اظہار ہوتا ہے۔
کراچی میں اسٹریٹ کرائمز کی وارداتوں سے شہری مایوسی کی گہری کھائی میں اترتے جا رہے ہیں، کیوں کہ شہر میں قانون نافذ کرنے والے ادارے پولیس کا عملاً کوئی وجود نظر نہیں آتا۔
