Tag: سی اے اے

کراچی: سول ایوی ایشن اتھارٹی نے ملک کے مختلف ایئر پورٹس پر کرونا وائرس کی روک تھام کے لیے مزید اقدامات کر دیے ہیں۔

تفصیلات کے مطابق کراچی کے جناح انٹرنیشنل، خیبر کے باچا خان اور بلوچستان کے کوئٹہ ایئر پورٹ پر ایک سے زائد وزیٹر پر پابندی عائد کر دی گئی ہے۔

چند دن قبل سول ایوی ایشن نے کرونا وائرس کے پھیلاؤ کو روکنے کے لیے لاہور کے علامہ اقبال انٹرنیشنل ایئر پورٹ پر ایک سے زائد وزیٹرز پر پابندی عائد کی تھی۔

علامہ اقبال انٹرنیشنل ایئرپورٹ پر ایک سے زائد وزیٹر پر پابندی عائد

سی اے اے کا کہنا ہے کہ مسافروں کو لینے والے حضرات اپنی گاڑیوں ہی میں ان کا انتظار کریں گے، جب کہ ایئر پورٹ کی حدود میں ماسک پہننا لازمی ہوگا۔

ایئرپورٹ انتظامیہ کے مطابق کسی بھی وزیٹر کو کنکورس ہال میں داخلے کی اجازت نہیں ہوگی، ایئر پورٹ کی حدود میں سماجی فاصلے کے ضابطے پر بھی عمل درآمد ہوگا۔

سی اے اے اور ایئر پورٹ پر کام کرنے والا دیگر عملہ بھی غیر ضروری طور پر نقل و حرکت نہیں کرے گا۔

خیال رہے کہ نہایت مہلک اور نئے کرونا وائرس کو وِڈ 19 کی پہلی لہر کو پاکستان میں بہترین حکمت عملی سے قابو کیا گیا تھا، اب دوسری لہر شروع ہو چکی ہے، جسے قابو کرنے کے لیے مختلف اقدامات کیے جا رہے ہیں۔

کراچی: بیرون ملک سے پاکستان آنے والے مسافروں کے لیے اچھی خبر سامنے آئی ہے، بین الاقوامی مسافروں کے لیے سماجی فاصلے کی شرط ختم کر دی گئی۔

تفصیلات کے مطابق سول ایوی ایشن اتھارٹی نے کرونا وائرس کے سلسلے میں بیرون ملک سے آنے والے مسافروں کے لیے نئی سفری ہدایات جاری کر دیں، سی اے اے کی جانب سے سفری سہولتوں میں تبدیلی کی گئی ہے۔

سی اے اے کے شعبہ ایئر ٹرانسپورٹ نے نوٹیفکیشن جاری کرتے ہوئے تبدیل شدہ سفری سہولتوں کے ہدایت نامے میں کہا ہے کہ یہ ہدایات نامہ عام مسافروں کے علاوہ چارٹر پرائیوٹ ایئر کرافٹ پر بھی لاگو ہوگا۔

کرونا وائرس کے باعث سول ایوی ایشن اتھارٹی کے نئی سفری پالیسی کی میعاد اب 31 اکتوبر تک ہو گئی ہے، بورڈنگ پاس جاری کرنے سے قبل کرونا ٹیسٹ نیگیٹو کی شرط پر عمل درآمد کرنے والی ایئر لائنز پر سیٹ کا وقفہ رکھنے کی شرط ختم کر دی گئی۔

سول ایوی ایشن کے حکم نامے میں کہا گیا ہے کہ کرونا ٹیسٹ کی رپورٹ کے بغیر بورڈنگ کارڈ جاری کرنے والی پروازوں پر سماجی فاصلہ برقرار رکھا جائے گا، جہاز میں مسافروں کو بٹھانے سے قبل جہاز میں جراثیم کش اسپرے کیا جائے گا۔

بیرون ملک سے پاکستان آنے والی پروازوں پر بھی جراثیم کش اسپرے پر عمل درآمد کا طریقہ کار مذکورہ بالا ہوگا، جہاز کے کپتان کا انتظامات پر تسلی لازمی قرار دی گئی ہے، حفاظتی سوٹ، دستانے، سرجیکل ماسک، چشمے، اور N-95 ماسک وغیرہ پر مشتمل ضروری لوازمات طیارے میں موجود ہوں گی۔

کراچی: سول ایوی ایشن اتھارٹی (سی اے اے) نے ٹیکس چالان جمع نہ کروانے والی ایئر لائنز، اداروں اور کمپنیوں کو وارننگ جاری کر دی ہے۔

اے آر وائی نیوز کے مطابق غیر ملکی ایئرلائنز، سفارت خانوں اور آپریٹرز کی جانب سے تاحال پیڈ ٹیکس چالان اور سرٹیفکیٹ جمع نہیں کروایا گیا ہے، جس پر سی اے اے نے انھیں وارننگ جاری کر دی ہے۔

ٹیکس چالان جمع نہ کروانے والوں کی فہرست میں 397 ایئرلائنز، فلائنگ کلبز، سفارت خانے اور ایوی ایشن سروسز شامل ہیں۔

سی اے اے کے مطابق ایئر لائنز کی فہرست میں ایئر فرانس، چارٹر، برٹش ایئر، ایئر کینیڈا، قطر ایئر، ایمریٹس، اتحاد ایئر، گلف ایئر، ترکش ایئرلائن سر فہرست ہیں، ایئر زمبابوے، آسٹرین ایئر لائن، بحرین ایئر، چائنا ایئر لائن، مالنڈو ایئر، ڈی ایچ ایل ایوی ایشن، فلائی دبئی، فلائی ناز سمیت دیگر ادارے شامل ہیں۔

بنگلہ دیش، ایران، سعودی عرب، متحدہ عرب امارات، چائنا، کوریا، انڈونیشیا، عراق، کویت کے سفارت خانے بھی اس فہرست میں شامل ہیں، دیگر سفارت خانوں میں جاپان، قطر، کرغیزستان، ناروے، سری لنکا، تھائی لینڈ، ساؤتھ افریقہ، ایتھوپیا، روس، نیوزی لینڈ، جرمن اور اسپین کے سفارت خانے شامل ہیں۔

فلائنگ کلبز میں لاہور فلائنگ کلب، ملتان فلائنگ کلب، کراچی ایرو کلب، پشاور فلائنگ کلب، فیصل آباد شاہین فلائنگ کلب شامل ہیں جب کہ دیگر اداروں میں ایدھی فاؤنڈیشن، سیرین ایئر، ایئر بلیو، عسکری ایئر، پنجاب حکومت، سندھ حکومت اور بلوچستان حکومت بھی شامل ہیں۔

سی اے اے کا کہنا ہے کہ اداروں کی جانب سے مالی سال 20-2019 کے بلز کے ٹیکس پیمنٹ چالان جمع نہیں کروائے گئے، متعلقہ ادارے مالی سال 20-2019 کے ٹیکس پیمنٹ چالان جلد از جلد جمع کروائیں، اس سلسلے میں ڈائریکٹر فنانس سی اے اے شاہد علی کی جانب سے متعلقہ نادہندہ اداروں کو مراسلہ بھی جاری کر دیا گیا ہے۔