کراچی : فیروزآباد کے علاقے میں 5 کروڑ کے موبائل فونز لوٹنے کے واقعے میں ملوث انتہائی مطلوب گروہ کے 3 کارندوں کو گرفتار کرلیا گیا۔
تفصیلات کے مطابق کراچی میں فیروزآباد کے علاقے میں 5 کروڑ کے موبائل فونز لوٹنے کے معاملے پر سی ٹی ڈی انٹیلیجنس نے انتہائی مطلوب گروہ کے 3 کارندوں کو گرفتار کرلیا۔
انچارج سی ٹی ڈی راجہ عمر خطاب نے بتایا کہ 10 فروری کو کورئیرکمپنی اسٹار موبائل مارکیٹ سے نکلی تھی اور 2 ہزار موبائل فونز کی شپمنٹ کی جارہی تھی، شاہراہ فیصل پر 11 ملزمان موٹر سائیکل رکشہ اور سوزوکی پر سوار تھے، ملزمان نے اسلحے کے زور پر گاڑی کے ڈرائیور کو یرغمال بنایا اور پانچ کروڑ مالیت کے موبائل فونز لوٹ کر فرار ہوئے۔
راجہ عمر خطاب کا کہنا تھا کہ گرفتار ملزمان میں دانش شہزاد، اسد سجاد اور راشد احمد شامل ہیں، واردات میں استعمال سوزوکی اور رکشہ برآمد کر لیا گیا پے جبکہ واردات میں لوٹے گئے کچھ موبائل فونز اور اسلحہ بھی برآمد ہوا۔
دوران تفتیش ملزمان کا تعلق بین الصوبائی جرائم پیشہ گروہ سے نکلا، گروہ کا سرغنہ بلال عرف ملا حیدرآباد پولیس کو انتہائی مطلوب ہے، ملزم بلال کے خلاف 20 سے زائد مقدمات درج ہیں۔
انچارج سی ٹی ڈی راجہ عمر خطاب کے مطابق گروہ اسی نوعیت کی درجنوں وارداتوں میں ملوث ہے گروہ سرغنہ بلال سمیت خرم شہزاد، افضل، سنیل فرار ہیں سہیل، ساجد اور مچھڑ بھی فرار ملزمان میں شامل ہیں تاہم ملزمان کی گرفتاری کے لیے اندرون سندھ چھاپے مارے جارہے ہیں۔
