لاہور : محکمہ انسداد دہشت گردی (سی ٹی ڈی) نے پنجاب میں کارروائیاں کرتے ہوئے 21 دہشت گردوں کو گرفتار کرلیا، دہشت گردوں میں کالعدم ٹی ٹی پی کے 9 اورکالعدم داعش کے4 کمانڈرشامل ہیں۔
تفصیلات کے مطابق محکمہ انسداد دہشت گردی (سی ٹی ڈی) نے پنجاب میں انٹیلی جنس بیسڈ پر کارروائیاں کیں اور مختلف شہروں سے 21 دہشت گرد گرفتار کرلئے۔
ترجمان سی ٹی ڈی نے بتایا کہ دہشت گردوں میں کالعدم ٹی ٹی پی کے 9 اور کالعدم داعش کے4 کمانڈرشامل ہیں، دہشت گردوں کو لاہور، نارووال، ڈی جی خان، راولپنڈی ، جہلم سے گرفتار کیا گیا۔
حکام کا کہنا تھا کہ مظفر گڑھ، گوجرانوالہ ، سرگودھا، لیہ ، اٹک ، ساہیوال میں بھی کارروائیاں کی گئیں، گرفتار دہشت گرد مختلف شہروں میں دہشت گردی کی منصوبہ بندی کر رہے تھے۔
گرفتار دہشت گردوں سے بارودی مواد، پرائما کارڈ، ڈیٹو نیٹر، حفاظتی فیوز، ہینڈ گرینڈ اور نقدی برآمد کرلی ہے اور دہشت گردوں کے خلاف مقدمات درج کر کے مزید تفتیش جاری ہے۔
ترجمان نے بتایا کہ رواں ہفتے700 کومبنگ آپریشنز کے دوران 49 مشتبہ افراد گرفتار کیے۔
