Tag: شائستہ زریں

عمران کی والدہ بیگم عرفان نے حنا کو اُس کے ایم ڈی کے بیٹے کے ولیمے میں دیکھا۔ حنا کے شخصی وقار، وضع داری، خوش اخلاقی، سادگی اور تہذیبی رویے نے اُن کا دل موہ لیا۔ اس قدر کہ پہلی ہی ملاقات میں حنا کو اپنی بہو بنانے کا فیصلہ کر لیا، اور دوسرے ہی دن حنا کے گھر اپنے بیٹے کا رشتہ لے کر چلی گئیں۔

حنا کے لیے اُس کے کولیگ عمران کا رشتہ آنا ہی غضب ہو گیا۔ بیگم عرفان بہت آس لگا کر گئی تھیں کہ ہاں میں جواب لے کر لوٹیں گی۔ لیکن حنا کی دادی نے صاف انکار کر دیا کہ ”ہمارے خاندان کا رواج نہیں بیٹی باہر بیاہنے کا۔“

بیگم عرفان سلجھی ہوئی طبیعت کی مالک اور بہت رکھ رکھاؤ والی خاتون تھیں۔اپنے طور پر اُنہوں نے قائل کرنے کی بہت کوشش کی لیکن حنا کی دادی نے نہ صرف سختی سے انکار کردیا بلکہ حنا کو ملازمت سے روکتے ہوئے یہ بھی کہہ دیا کہ ”معلوم ہوتا کہ یہ اپنا بَر تلاش کرنے کے لیے نوکری کرے گی تو کبھی اس کے باپ سے اجازت سے سفارش نہ کرتی اس نوکری کی۔“ یہ فرمان سن کر بیگم عرفان دم بخود رہ گئیں۔ ایسی بے اعتباری؟ معصوم حنا تو بغیر جرم کیے معتوب قرار پائی تھی۔

بیگم عرفان نے کہا بھی، ”حنا میری یہاں آمد سے قطعاً لا علم ہے۔ بس کل احتشام صاحب کے گھر کی تقریب میں یہ میرے دل کو کچھ ایسی بھائی کہ پل کی پل میں اپنی بہو بنانے کا فیصلہ کر لیا اور رشتہ لے کر چلی آئی۔“ لیکن کوئی بھی بیگم عرفان کی بات سننے اور ماننے کو تیار ہی تھا۔ وہ نامراد اپنے گھر لوٹ گئیں۔

حنا اگر دادی کے عتاب کا نشانہ بن رہی تھی تو اُس کی امی بھی خراب تربیت کے طعنے سُن رہی تھیں۔ یہی نہیں حنا کی دادی نے فون کر کے اپنی بڑی بیٹی صادقہ بیگم کو ساری داستان سنا دی۔ وہ تو پہلے ہی حنا سے بہت خار کھاتی تھیں کہ صورت اور ذہانت میں حنا اُن کی بیٹیوں سے بڑھ کر تھی۔ رہی بات سیرت کی تو اس میں بھی حنا کا پلڑا بھاری تھا۔ اپنی بیٹی کی ہم عمر حنا کی تعریفیں سُن کر صادقہ بیگم کے سینے پر سانپ لوٹ جاتے تھے۔ اب اُنہیں اس لڑکی کو نیچا دکھانے کا موقع مل گیا۔ ماں کی سنائی داستان میں رنگ آمیزی کر کے صادقہ بیگم نے اسے عام کرنا شروع کر دیا۔

نکلی ہونٹوں، چڑھی کوٹھوں کے مصداق اگلے ہی دن خاندان بھر میں یہ بات پھیل گئی کہ حنا کی خواہش پر غیر خاندان کی عورت اپنے بیٹے کا رشتہ اُس کے لیے لائی تھی لیکن اماں نے سختی سے انکار کر دیا۔ جس پر حنا نے خوب شور مچایا۔“

اگلے دن حنا کی دادی پھپیوں، امی، ابو اور خاندان کے دو تین بزرگوں کی موجودگی میں ایک اجلاس ہُوا۔ دور دور تک نظر دوڑائی گئی لیکن خاندان بھر میں حنا کے جوڑ کا کوئی نظر نہ آیا۔ تب ازراہِ عنایت صادقہ بیگم نے اپنے تایا زاد اور جیٹھ نورُ الدّین کا رشتہ پیش کر دیا جو بقول اُن کے نہایت مناسب رشتہ تھا۔ نورُ الدّین صاحب کو حنا کمسنی سے ہی تایا ابّا کہ کر مخاطب کرتی تھی۔ نور الدّین چار بیٹیوں اور پانچ بیٹوں کو بیاہ چکے تھے۔ اُن کے سارے بچّے بیرونِ ملک مقیم تھے اور ہزار گز کا بنگلہ اُنہیں کاٹ کھانے کو دوڑتا تھا۔ ایسے میں صادقہ بیگم نے حنا سے شادی کی پیشکش کی۔ لمحہ بھر کو تو وہ ہکا بکا رہ گئے۔ لیکن صادقہ بیگم کے اصرار پر تو اُن کی باچھیں کھل گئیں۔ گویا اُن کی لاٹری نکل آئی ہو۔

ادھر حاجرہ بیگم نے بیٹے کو کچھ ایسے خدشات سے خوفزدہ کر دیا کہ وہ بھی ماں اور بہن کے حمایتی بن گئے۔ یوں آناً فاناً نورُ الدّین کا رشتہ منظور کر لیا گیا۔ حنا حیران تھی کہ بن کہے، حنا کے دل کی بات جان لینے والی ماں نے اُس کی خاموش نگاہوں کے پیغام کو نظر انداز کر دیا تھا، جو چُپ کی زبان میں نوحہ کناں تھیں۔

ماں کا یہ طرزِ عمل دیکھ کر حنا نے چپ سادھ لی۔ ورنہ اُسے یقین تھا کہ اور کوئی بولے یا نہ بولے امّی ضرور میرے حق میں نہ صرف بولیں گی بلکہ اپنے مؤقف پر ڈٹ جائیں گی۔ لیکن وہ تو چپ کی چادر تانے اُس کی شادی کی تیاریوں میں مصروف تھیں اور پھر ٹھیک ایک ہفتے بعد ایک اعلیٰ تعلیم یافتہ لڑکی رواجوں کی سولی پر چڑھ کر باطن کی موت مر گئی۔

خوب دھوم دھام سے شہنائیوں کی گونج میں حنا دلہن بن کر اُس آنگن میں آگئی جہاں وہ بچپن میں آتی تو اس کی معصوم شرارتوں پر ہنستے ہوئے نورُالدّین کہتے”ہماری بیٹی بہت پیاری ہے، اللہ نصیب اچھے کرے۔ بھئی میں‌ تو اس کو اپنے راشد کی دلہن بناؤں گا۔“ لیکن راشد کو تو صادقہ چچی نے ایسا قابو کیا کہ وہ اُن کی بد مزاج عارفہ کو اپنانے کی ضد کر بیٹھے اور بالآخر اس کو بیاہ کر اپنے ساتھ کنیڈا لے گئے۔ اور حنا کے نصیب کہ اپنی بہو بنانے کے آرزومند نورُ الدّین اس کو اپنی دلہن بنا کر لے آئے۔ صادقہ پھپو کی پاٹ دار آواز نے حنا کو ماضی سے حال میں لا کھڑا کیا۔ وہ حنا کو اُس کی خوش بختی کی نوید سنا رہی تھیں کہ ”ایک ہزار گز کے بنگلے پر راج کرے گی ہماری بیٹی۔“ حنا اپنی بے بسی پر رونے کے بجائے دل ہی دل میں ہنس دی۔ ”اپنی عزتِ نفس تاراج ہونے پر بھی کوئی راج کرتا ہے بھلا؟“ اُدھر پھپو کا بیانِ عالمانہ جاری تھا کہ ”بھائی جان! ہماری بیٹی کو کبھی شکایت کا موقع نہیں دیجیے گا۔ اُس کے عیش میں کبھی کوئی کمی نہیں آنی چاہیے۔ ہم نے اپنی پھول سی بیٹی آپ کے حوالے کی ہے، اب یہ آپ کی ذمہ داری ہے۔“

”فکر نہ کرو صادقہ یہ لو ابھی تمہارے سامنے اس گھر کی ساری چابیاں حنا کے حوالے کرتا ہوں۔ “ یہ سن کر صادقہ پھپھو گھبرا کر جلدی سے بولیں ”ارے نہیں بھائی جان! یہ کیا کر رہے ہیں۔ ابھی یہ اتنی سمجھدار کہاں ہے، سارے تالے چابیاں اپنے پاس ہی رکھیے۔ خیر سے آپ کے بچّوں کا آنا جانا لگا رہتا ہے۔“ یہ سن کر نورُ الدّین نے حنا کی ہتھیلی پر رکھی چابیاں اُٹھائیں اور واپس اس کی جگہ پر رکھ دیں۔ تب صادقہ پھپو نہال ہو گئیں۔

حنا خود کو اس نئے بندھن کے لیے ذہنی طور پر تیار کر رہی تھی۔ سفاک ہی سہی لیکن یہ بہت بڑی حقیقت تھی کہ اب نورُ الدّین اُس کے تایا ابّا نہیں شوہر تھے اور بقول صادقہ پھپو اُن کی تابعداری حنا پر فرض تھی۔ سو حنا نے بھی اپنے فرائض نباہے اور خوب نباہے۔ اگلے ہی دن نورُ الدّین کی چاروں بیٹیوں سے فون پر بات کی۔ وہ بیٹیاں جنہیں حنا بالترتیب بڑی آپا، منجھلی آپا، چھوٹی آپا اور باجی کہتی تھی۔ اب اُن سے مادرانہ شفقت سے بات کرنا اُس کی ذمہ داری تھی۔ حنا نے اپنی سوتیلی بیٹیوں کو ملول پایا۔ کوئی بھی خوش نہ تھی، کتنا ارمان تھا اُن چاروں کو حنا کو اپنی بھابھی بنانے کا لیکن ہر بھائی کی دفعہ صادقہ چچی نے اپنی بیٹی، بھانجی، بھتیجیوں اور ایک نواسی کو پیش کر دیا۔ چاروں بہنیں دل مسوس کر رہ گئیں کہ ابّا کبھی اپنی لاڈلی بھاوج کی بات رد نہیں کرتے تھے۔ معلوم نہیں ابّا کو اُن کا خوشامدی لہجہ بھاتا تھا یا پھر وہ صادقہ چچی کو بہت دور اندیش سمجھتے تھے۔

بڑی آپا نے حنا کے دکھ کو بہت توانائی سے محسوس کیا اور کیوں نہ کرتیں وہ اُن سے پورے بیس برس چھوٹی تھی۔ حنا سے بات کر کے وہ بہت اُداس تھیں۔ یہ پیاری سی بچی اب اُس کی ماں تھی۔ سوتیلی ہی سہی، کہلائیں گی تو وہ اب حنا کی بیٹی۔

حنا نے حالات سے سمجھوتہ کر لیا تھا، میکے بھی بہت کم جاتی تھی۔ اُس کو اپنی ماں سے بہت گِلے تھے۔ وہ اُس پر محبت نچھاور کرتیں تو اس کا دل بین کرنے لگتا۔ اس کی فریادی آنکھیں ماں سے سوال کرتیں، ”اب کیوں امّی؟ جب وقت تھا تو آپ کی محبّت کہاں جا سوئی تھی؟ جب مجھے آپ کی ضرورت سب سے زیادہ تھی تب آپ مجھے نظر انداز کر رہی تھیں تو پھر اب کیوں؟“ اور ماں! جو کہے بغیر اولاد کے دل کی بات جان لیتی ہے کل کی طرح آج بھی چپ کی مہر لگائے اس شعر کی تفسیر بنی نظر آتی کہ
یہ ہم ہی ہیں جو تیرا درد چھپا کر دل میں
کام دنیا کے بدستور کیے جاتے ہیں

کئی ہفتوں سے حنا میکے نہیں گئی تھی۔ کوئی دو ماہ بعد اپنے شوہر کے ساتھ حنا نے ایک شادی کی تقریب میں شرکت کی۔ وہاں اپنی امی کو دیکھ کر اُس کا دل دکھ سے بھر گیا۔ کیسا شاداب چہرہ مرجھا کر رہ گیا تھا۔ نور الدّین ساس سسر کو دیکھ کر آگے بڑھے۔ حنا کے سلام کے جواب میں ابو نے بہت ساری دعائیں دیں تو سُن کر وہ ہنس دی۔ عجب بے بس سی ہنسی تھی کہ پہلی بار وہ خود کو اپنی بیٹی کا مجرم سمجھ رہے تھے۔ ابو کو وہاں اپنے کولیگ نظر آئے تو وہ اُن کی پکار پر وہاں چلے گئے اور حنا نہ چاہتے ہوئے بھی نورُ الدّین کے ساتھ آگے بڑھ گئی۔ اتنی دیر میں بیگم عرفان بھی عرفان صاحب کے ساتھ آگئیں۔ اُن کی نظر حنا کی امی پر پڑی تو وہ اُن سے ملنے چلی آئیں۔ حنا کی امی اُن سے بہت محبت سے ملیں۔ اچانک بات کرتے کرتے اپنے شوہر کے ساتھ آتی حنا پر بیگم عرفان کی نظر پڑی تو اُن پر تو گویا سکتہ سا طاری ہو گیا۔ اپنی بات ادھوری چھوڑ کر وہ تأسف بھری نظروں سے حنا کو دیکھ رہی تھیں۔ کافی دیر تک تو وہ کچھ بول ہی نہ سکیں۔ حنا کی نظر اُن پر پڑی تو اُس نے بیگم عرفان کو سلام کیا۔ اُنہوں نے اشارے سے حنا کو اپنے پاس بلایا۔ اُس کی خیریت دریافت کر کے اُنہوں نے حنا کی امی سے شکوہ کیا ”میرے عمران میں کیا کمی تھی؟ کون سی برائی تھی؟ عمر میں بھی زیادہ فرق نہیں، کیسا سجتے دونوں ایک دوسرے کے ساتھ۔ ہیرا مٹی میں رُل گیا۔“

تب حنا کے امی کی چپ کی مہر بھی ٹوٹ گئی اور وہ تلخی سے بولیں،”بہت بڑی کمی اور بُرائی تھی عمران میں۔ وہ غیر خاندان کا تھا۔“

”ماشاء اللہ باشعور خاتون ہیں، کیسی باتیں کر رہی ہیں اور سب سے بڑھ کر آپ ماں ہیں بہن! پھر آپ نے کیوں ظلم ڈھانے دیا اپنی بیٹی پر۔“

”اگر اس وقت میں اپنی لاڈلی بیٹی پر ظلم نہ ڈھاتی تو وہ حشر برپا ہوتا جو آپ سوچ بھی نہیں سکتیں۔“ حنا کی امی کہتے کہتے رو دیں۔

”اچھا! آپ بتائیے تو سہی کیا بات تھی، پھر میں سوچ بھی لوں گی۔ “ بیگم عرفان نے اُن کے ہاتھ تھام لیے۔

”میری چھوٹی بیٹی اپنی منجھلی پھپو کے بیٹے کی منکوحہ ہے۔ میرے انکار کی صورت میں بغیر رخصتی کے طلاق کا پروانہ اُس کے ہاتھوں میں تھما دیا جاتا۔میری منجھلی بیٹی اپنی چھوٹی پھپو کے دیور سے منسوب ہے۔ اُس کی منگنی ٹوٹنے کی دھمکی بھی دی گئی تھی اور رہ گئی حنا تو اُسے جینے کا کوئی حق نہیں تھا کہ اُس کے لیے غیر خاندان سے رشتہ آیا تھا، وہ بھی اُس کے ساتھ دفتر میں‌ کام کرنے والے لڑکے کا۔ بیگم عرفان چپ چاپ اُن کی شکل تکے گئیں اور جب بولیں تو بس اتنا ”یقین نہیں آرہا، آج کے ترقی یافتہ دور کے ایک پڑھے لکھے گھرانے میں بھی ایسی باتیں ہو سکتی ہیں۔“

”ہو سکتی نہیں، ہوتی ہیں مسز عرفان۔ اُن گھرانوں میں جہاں رسم و رواج کو خواہ وہ کتنے ہی فرسودہ کیوں نہ ہوں اپنی عزّت بنا لیا جاتا ہے۔ پھر اس کی سربلندی کی خاطر خواہ کوئی جیتے جی مر جائے کسی کو کوئی فرق نہیں پڑتا۔ ہمارے گھرانے میں خاندان میں شادی کرنے کو اعزاز سمجھا جاتا ہے، چاہے اس ظلم کے نتیجے میں کوئی عمر بھر آزار میں مبتلا رہے جیسا کہ میری حنا ہے۔“

حنا اپنی امی کے گلے لگی چپ چاپ آنسو بہا رہی تھی۔ آج ماں سے ہر گلہ ختم ہو گیا تھا۔ اور بیگم عرفان سوچ رہی تھیں خاندان میں بیٹی بیاہنے کا اصرار کرنے والوں نے کبھی سوچا ہی نہیں کہ حنا کے ساتھ اس سے تیس سال بڑی عمر کے شوہر کو دیکھ کر لوگ کیا کہیں گے؟

برتن گرنے کے شور کے ساتھ ہی بیگم شاہنواز کی پاٹ دار آواز گونجی ”ہائے آج پھر نقصان کر ڈالا بد بخت نے، بھیا خاص میرے لیے لائے تھے جاپان سے، کتنا نازک اور نفیس سیٹ تھا۔ مسز امیر علی تو اسے دیکھ کر انگاروں پر لوٹتی تھیں۔ دیکھوں تو جا کر کیا ٹوٹا اور کیا بچا؟“

بیگم شاہنواز نے چھوٹی کے بال نوچے تو وہ تڑپ اٹھی۔ ”میم صاحب! قسم سے میں نے جان کر نہیں توڑے، میرے ہاتھوں سے گر گئے۔

”واہ واہ ہماری چھوٹی مہارانی پر تو کپکپی چڑھ گئی، اری منحوس ابھی تو میں نے کچھ کہا بھی نہیں۔ چھید ہیں ہاتھوں میں، جو چیز پکڑتی ہے اِن سوراخوں سے چھن کر نکل جاتی ہے اور میری شکل کیا تک رہی ہے؟ منحوس لا کر دے مجھے اپنی تواضع کا سامان۔ ”نہیں نہیں میم صاحب، رحم کریں میں کان پکڑتی ہوں، اٹھک بیٹھک کر لوں گی۔ مجھے نہ ماریں۔ چھوٹی سسک اُٹھی۔“

بیگم شاہنواز نے چھوٹی کو ڈنڈے سے پیٹنا شروع کر دیا۔ ”میم صاحب بس کریں، ہاتھ ٹوٹ جائے گا میرا۔“

شانزے! ممی ممی! آپ یہاں ہیں؟

ارے ارے ڈارلنگ کیا کر رہی ہو باہر جاؤ کانچ چبھ جائے گا جان۔ بیگم شاہنواز نے لاڈ سے بیٹی کو کہا اور چھوٹی سے مخاطب ہوئیں ”ہاں ہاں کر دیا بس۔ اب کانچ کے ٹکڑے سمیٹ اور چائے بنا کر لا میرے لیے۔ صرف دس منٹ میں، میرا سر بُری طرح دکھ رہا ہے۔“

چھوٹی بلک رہی تھی ”ہائے اماں! کانچ چبھ گیا۔ خون بہہ رہا ہے۔“ بیگم شاہنواز سفاکی سے چلائیں ”زیادہ ڈرامہ کرنے کی ضرورت نہیں ہے۔ کیا قیامت آگئی؟ ”میم صاحب! میرے ہاتھ سے کانچ نکال دیجیے، ہائے، ہائے۔“ وہ بری طرح رو رہی تھی۔ بیگم شاہنواز نے تلملاتے ہوئے چھوٹی پر ڈنڈوں کی برسات کر دی، ”بدبخت، چڑیل، اپنا کیا خود بھگت نامراد!

”چھوٹی! میرے شوز پالش کر دے۔“ شاہنواز مرزا نے حکم صادر فرمایا۔ ”جی سر جی! کہتے ہوئے چھوٹی آواز کی سمت لپکی اتنی دیر میں شانزے نے اپنے کپڑے چھوٹی کو تھماتے ہوئے کہا جلدی سے میرا ڈریس پریس کر دے، پنکی کے برتھ ڈے فنکشن میں جانا ہے۔ ” ابھی کرتی ہوں چھوٹی میم صاحب“ شانزے نے عاجزی سے کہا، اُدھر شاہنواز مرزا چلے آئے، ”ابھی تک شوز پالش نہیں کیے تو نے چھوٹی؟ بہت نافرمان ہو گئی ہے۔ ادھر آ، اپنی خوراک تو کھالے بہت دنوں سے نہیں کھائی۔“ چھوٹی نے خوفزدہ ہوتے ہوئے کہا، ”معاف کر دیجیے صاحب، چھوٹی میم کے کپڑے پریس کر رہی تھی، آئندہ پہلے آپ کا کام کروں گی۔“

”بہت کام چور ہو گئی ہے یہ چھوٹی! ذرا سی چائے نہیں بن سکی اس سے۔ جتنا چاہو نقصان کروا لو منحوس، چھوٹی ہی نہیں کھوٹی اور کھوتی بھی ہے۔ چائے کہا تھا تجھ سے کیا پائے پکا رہی ہے؟ آئی میم صاحب چھوٹی نے شاہنواز مرزا کے سامنے شوز پالش کر کے رکھتے ہوئے کہا۔ یہ لیجیے سر جی! آپ کے شوز“
یہ کیسی پالش کی ہے؟ کہا تھا نا ایسی پالش کرنا کہ تجھے اپنی شکل صاف نظرآئے شاہنواز مرزا نے غراتے ہوئے گھونسوں سے چھوٹی کی تواضع کر دی۔
چھوٹی! بری طرح روتے ہوئے کہہ رہی تھی ”سر جی! معاف کر دو۔ ابھی چمکا دیتی ہوں آپ کے شوز۔ بیگم شاہنواز کی چنگارتی آواز آئی ”چھوٹی چائے“
”ابھی سر جی کے شوز چمکا دوں پھر لاتی ہوں آپ کی چائے بھی۔“ چھوٹی نے سہمے ہوئے کہا تو بیگم شاہنواز چلائیں ”سنا نہیں تُو نے؟ چھوٹی میم صاحب نے کیا کہا ہے۔ پہلے میری پرنسز کے کپڑے صحیح سے پریس کر“ یہ لیجیے میم صاحب! گرم گرم چائے۔“ پانچ منٹ بعد ہی وہ بیگم شاہنواز کو چائے تھما رہی تھی۔

یہ گرم چائے ہے یا گرم پانی؟ پھوہڑ کہیں کی، میں تو نہیں پی سکتی یہ۔ تجھ ہی پر اُنڈیل دیتی ہوں۔ بیگم شاہنواز نے چائے چھوٹی کے ہاتھ پر گرا دی۔ ہائے میم صاحب میرا ہاتھ جل گیا چھوٹی بلک بلک کر رو رہی تھی اور بیگم شاہنواز طیش کے عالم میں یہ کہتے ہوئے اس کی جانب بڑھیں کہ ”اری تُو ایک ذرا سا ہاتھ جلا تو شور کیوں مچا رہی ہے؟ لاتوں کی بھوت باتوں سے کہاں مانے گی؟ تُو نے تو میرا درد اور بڑھا دیا۔ آ کھا لے اس جرم میں میری لاتیں۔“ بیگم شاہنواز بے دردی سے لاتیں مار رہی تھیں اور چھوٹی کہہ رہی تھی معافی میم صاحب! آئندہ بہت اچھی چائے بناؤں گی۔

چھوٹی کا بدن بُری طرح دکھ رہا تھا۔ کل کی مار سے وہ بے حال تھی۔ رات بھر بخار میں مبتلا رہی پھر بھی کام کرنے آگئی تھی۔ ذرا دیر کو تھک ہار کر بیٹھی کہ شانزے نے صدا لگائی۔ ”میری انگلش کی بک نظر نہیں آرہی۔ میں نے ٹیبل پر رکھی تھی۔ اوہو بھئی مزے آرہے ہیں۔ ممی جلدی آؤ دیکھو۔ ایجوکیشنسٹ کے پاس ہے میری بک، اسٹڈی ہو رہی ہے۔“ چھوٹی کے ہاتھ میں اپنی کتاب دیکھتے ہوئے شانزے نے قہقہے لگائے تو بیگم شاہنواز نے اس کا ساتھ دیتے ہوئے کہا ”!اوہو، اللہ کی شان تو دیکھو، چیونٹی کے بھی پر نکل آئے۔ کیوں ری چھوٹی موٹی۔ کیا پڑھ ڈالا تُو نے؟“

”معاف کر دو۔ میں تو تصویریں دیکھ رہی تھی شانزے کی کتاب میں سے۔“ چھوٹی کے ہاتھ سے کتاب گر گئی لیکن شانزے کا غصہ آسمان کو چھو رہا تھا۔

”شانزے! What شانزے؟ کہا تھا نا تم سے ہمیں چھوٹی میم صاحب کہا کرو۔ ابھی کھینچتی ہوں چوٹی۔ ٹھیک ہو جائے گا تمہارا دماغ۔“

نہیں نہیں چھوٹی میم صاحب۔ بس کریں بہت تکلیف ہو رہی ہے، چھوڑ دیں میرے بال، ماں قسم ہمیشہ آپ کو چھوٹی میم صاحب کہوں گی۔ کان پکڑ کر توبہ کرتی ہوں۔ چھوٹی تکلیف سے تڑپ ہی تو اُٹھی مگر اس کی تکلیف کی پروا ہی کس کو تھی۔ اب باری بیگم شاہنواز کی تھی جو تفریح لینے والے انداز سے پوچھ رہی تھیں
”یہ تو بتا تُو نے کتاب اُٹھائی کیوں تھی چھوٹی؟ ”میرا پڑھنے کو دل چاہتا ہے۔مجھے ڈاکٹر بننے کا بہت شوق ہے، ماں کہتی ہے اس کے لیے بہت سارے پیسے چاہئیں۔ کام پر جا، پیسے کما، پھر اسکول میں داخلہ لے لے اور پڑھ لکھ کر ڈاکٹر بن جا۔ مجھے ڈاکٹر بہت اچھے لگتے ہیں۔“

”بڑا اچھا جوک ہے یہ تو۔ کیوں ممی؟ شانزے نے چھوٹی کا مضحکہ اُڑاتے ہوئے کہا تو بیگم شاہنواز نے مزے لیتے ہوئے کہا ”اچھا… واقعی مزے کا ہے آؤ مل کر ہنستے ہیں۔ ہاں تو چھوٹی تُو کہاں داخلہ لے گی؟ چھوٹی بھلا اتنی سمجھدار کہاں تھی جو اُن کے مذاق کو سمجھ سکتی۔ خوشامدی لہجے میں بولی ”میم صاحب! آپ مجھے چھوٹی میم صاحب کے اسکول میں داخل کروا دیں۔ ہم دونوں ساتھ ساتھ ڈاکٹر بن جائیں گی۔“ آئیڈیا تو بہت زبردست ہے چھوٹی لیکن ایک بات ہمیشہ یاد رکھنا

پیر میں رہنے والی جوتی دیکھ نہ اونچے خواب
ایک ہی شے پہ حق ہے تیرا وہ ہے صرف عذاب
(عنبرؔ)

میری بیٹی کی برابری کرے گی۔ ادھر آ ابھی جلاتی ہوں تیری گستاخ زبان۔“
چھوٹی متوقع تکلیف کے خیال سے ہی بُری طرح خوفزدہ ہو گئی، نہیں نہیں میم صاحب! ابھی تو کل کی مار کا درد نہیں گیا۔ اماں نے مالش بھی کی تھی پھر بھی نہیں گیا“

”تو میں کیا کروں، بہت اونچے خواب دیکھتی ہے۔ چھوٹی کی پرواز تو کوئی دیکھے۔ میں تجھے ناکوں چنے نہ چبوا دوں۔ شانزے ڈارلنگ کچن سے ماچس تو لانا، ابھی زبان جلاتی ہوں چھوٹی کی، بیگم شاہنواز نے قہر برساتی نظروں سے چھوٹی کو دیکھا تو وہ بلک بلک کر رونے لگی۔ ”میم صاحب میری زبان نہ جلاؤ۔کل آپ نے ہاتھ جلایا تھا، اب تک دکھ رہا ہے۔ میری زبان نہ جلاؤ میں کیسے بولوں گی؟“

بیگم شاہنواز نے تلملاتے ہوئے کہا، ”فٹے منہ کون سا اچھا بولتی ہے جو یوں بولنے کو تڑپ رہی ہے زبان دراز۔“ یہ لیجیے ممی! جلائیے اس کی زبان۔ بہت شوق ہے اسے میرے اسکول جانے کا۔ کل اسکول لے کر جاؤں گی چھوٹی کھوٹی کو اس کی جلی ہوئی زبان سب کو دکھاؤں گی۔ شانزے نے ماچس ماں کو دیتے ہوئے کہا۔ منہ کھول اپنا۔“

”نہیں نہیں میم صاحب! میں کبھی چھوٹی میم صاحب کے اسکول کا نام نہیں لوں گی۔ لیکن بیگم شاہنواز پر تو وحشت سوار تھی، جنونی لہجے میں کہ رہی تھیں ”اے چھوٹی! خود ہی منہ کھول۔ ورنہ زبان کیا تجھے پوری کی پوری چولھے میں جھونک دوں گی۔“

چھوٹی تڑپ رہی تھی ”ہائے جلا دی میری زبان۔ اماں اماں۔ ہائے میری زبان۔“

بیگم شاہنواز بھی ایک ماں تھیں لیکن اپنی امارت کے زعم میں وہ انسانیت کا ہر درس بھلا بیٹھی تھیں۔ تنتناتے ہوئے اس کے بال بے دردی سے کھینچے، ”اری چپ کر۔ ابھی آنے والی ہے تیری ماں۔ بتاتی ہوں اُسے تیرے ارمان اور گز بھر کی زبان۔؟ یہ سارا تماشہ دلچسپی سے دیکھتی ہوئی شانزے چہکی ”ممی! دیکھو چھوٹی کی اماں بھی آگئی۔“

آئیے آئیے مہارانی تشریف لائیے اور سُنیے اپنی رانی کی کہانی۔ یہ تو بتائیے آپ کے لیے صوفہ پیش کروں یا تخت شاہی؟ قابل تو تم تختے کے ہو۔ بیگم شاہنواز نے حقارت بھری نظر چھوٹی کی ماں پر ڈالتے ہوئے کہا۔” ماں کو دیکھ کر چھوٹی چلائی ہائے اماں بچا لو مجھے اور پل کی پل میں چھوٹی بے ہوش ہو گئی۔“

ہائے میری شمشیرن، ماں صدقے، کیا ہو گیا تجھ کو۔ ارے یہ تو بے ہوش ہو گئی۔ کل سے بخار میں تپ رہی تھی آپ کا حکم تھا اس لیے چُھٹی نہیں کروائی۔“

”سن لیا تمہارا شمشیرن نامہ اور یہ کیا سکھایا ہے تم نے چھوٹی کو۔ میری شانزے کی برابری کر رہی تھی کہ شانزے کے اسکول میں داخلہ دلوا دو۔ ڈاکٹر بنوں گی۔ ارے نام تو نے شمشیرن کیا رکھ دیا خود کو شمشیر زن سمجھنے لگی۔ جلا دی میں نے اس کی خود سر زبان۔ بہت اچھے لگتے ہیں نا اسے ڈاکٹر۔ اب ساری زندگی زبان کے علاج کے لیے ڈاکٹروں ہی کو دیکھے گی ارمان پورا ہو جائے گا۔ لے جاؤ اسے نہیں ضرورت اس کی۔“ بیگم شاہنواز نے بیہوش چھوٹی پر تھوکتے ہوئے کہا۔

”میم صاحب جی معاف کر دیجیے۔ باپ تو اس کا چرسی ہے، میں ہمیشہ کی بیمار، اسی کی تنخواہ سے ہمارا گھر چلتا ہے۔ آپ بے شک چھوٹی کو ماریں مگر مجھے تو ہر مہینے تنخواہ اور روز کا کھانا دو گی نا؟ نصیبن نے بے حسی اور سفاکی کی انتہا کر دی تھی۔ جانے اس کی ممتا کہاں جا سوئی تھی۔“

بیگم شاہنواز کو اپنا آرام خطرے میں نظر آیا جو چھوٹی کی بدولت سارا دن اُنہیں میسر تھا۔ اکڑ کر بولیں ”بہت نقصان کیا ہے میرا، اس مہینے کی تنخواہ نہیں ملے گی، اس شرط پر رکھوں گی کہ آئندہ میری شانزے کی برابری نہیں کرے گی۔“

”جیتی رہو میم صاحب جی! بڑی رحم دل ہوآپ۔ کل صبح ہی آجائے گی کام پر۔ نصیبن نے بیگم شاہنواز کے پیر چھوتے ہوئے کہا۔

قارئین! آپ ہی فیصلہ کیجیے کہ ”چھوٹی“ شمشیرن ہے یا بیگم شاہنواز کی گھٹیا سوچ یا پھر اس کی ماں جو اپنی ہی کمسن بیٹی کے ساتھ انسانیت سوز سلوک ہوتے دیکھ کر بھی اپنے مفاد کے لیے بیٹی کو استعمال کر رہی ہے؟ اسی رویے نے چھوٹی کو جیتے جی مار دیا، کیا ہمارے معاشرے کی ہر چھوٹی کا یہی انجام ہوگا؟کیا کبھی چھوٹی کے ساتھ ساتھ بڑوں کی سوچ بھی بڑی ہوکر ہمارے سماج کی چھوٹیوں کو بھی انسان سمجھے گی یا اُن کی چھوٹی سوچ کے نتیجے میں چھوٹی کھوٹی ہی رہے گی؟

(تحریر شائستہ زریں ؔ)

کتاب کی تقریبِ رونمائی کی خبر پڑھتے اور سنتے ہی جانے کیوں یہ مصرع یاد آجاتا ہے

تھی خبر گرم کہ غالبؔ کے اُڑیں گے پرزے

اور ساتھ ہی غالب ؔ کے دشمنوں کا خیال بھی آتا ہے کہ پرزے تو غیر ہی اُڑاتے ہیں اپنے تو پردہ رکھ لیتے ہیں اور سچ پوچھیے تو آئے دن اخبارات میں کتابوں کی تقریبِ رونمائی کا احوال پڑھ کر یقین سا آنے لگتا ہے کہ اس شعر کی تخلیق کے وقت غالبؔ کے ذہن میں بھی کہیں نہ کہیں ”دیوانِ غالبؔ“ کی تقریبِ رونمائی کا خدشہ سر اُٹھا رہا تھا کہ اُن کے دوست احباب قرضِ دوستاں چکانے کے لیے ایسی کسی تقریب کا اہتمام نہ کر ڈالیں اور چونکہ غالبؔ کی نظر بہت دور تک دیکھنے کی عادی تھی اس لیے غالب نے بھی بہت پہلے یہ نکتہ پا لیا تھا کہ تقریب میں کتاب اور صاحبِ کتاب کے پرزے ضرور اڑیں گے۔

غالب پر تو اللہ نے بڑ ا کرم کیا ان کے نصیب میں وہ تماشہ لکھا ہی نہیں تھا جو اُن کے بعد آنے والوں کو بے طلب دیکھنے کو مل جاتا ہے۔ بھلا ہو اس ادبی فیشن کا جو روز بہ روز زور پکڑتا جا رہا ہے، کبھی صاحبِ کتاب خود اور کبھی کوئی اور اس کی محبت اور عقیدت سے سرشار صاحبِ کتاب کے دوستوں اور قارئین کا مجمع لگا کر صاحبِ کتاب کی بے محابہ توصیف اور کتاب پر ایسی رائے دینے پر مجبور کردیتا ہے کہ بیک وقت مصنّف کا حوصلہ اور کتاب کی ترسیل کا اہتمام ہو جائے۔ اس اجتماعی رائے زنی کا اثر کبھی کبھی مضحکہ خیز المیے کی صورت میں بھی ظاہر ہوتا ہے کہ پرزے اُڑانے والے صاحبِ کتاب کے رفیق بھی ہوتے ہیں جو حقِ رفاقت نباہتے ہوئے اس قدر نڈھال ہو جاتے ہیں کہ حاضرینِ محفل سوچتے ہیں کیا واقعی صاحبِ کتاب اتنا صاحبِ اعزاز ہے جتنا کہ اسے سراہا جا رہا ہے اور کیا مقالہ نگار اتنا صائب الرّ ائے ہے جتنا نظر آرہا ہے؟

یہ تو خیر دوستوں کا احوال تھا مگر بعض انجانے بھی ایسے صاحب کمال اور صاحب کشف و کرامات ہوتے ہیں کہ کتاب اور صاحبِ کتاب کے مطالعے کے بغیر ہی محض ذاتی مفاد کی خاطر سنی سنائی پر اعتبار کر کے کتاب اور صاحبِ کتاب کا اعتبار قائم کرنے کی دھن میں اپنا اعتبار بھی کھو دیتے ہیں مگر وہ سب ضرور پا لیتے ہیں جس کے وہ آرزو مند ہو تے ہیں۔

اس امر سے تو سب ہی واقف ہیں کہ معاشی اعتبار سے ادب کی منڈی میں کسی مصنّف کی قدر شناسی کا کس قدر کال ہے۔ کچھ تو فطرتاً ایسے بے نیاز ہوتے ہیں کہ صلے اور ستائش سے بے پروا ہو کر اپنا کام کیے جاتے ہیں لیکن حلقۂ ادب میں ایسے حضرات بھی ہیں جو خود کو منوانے کے لیے کوئی ایسا مؤثر طریقہ اختیار کرنا چاہتے ہیں جس سے ان کی ادبی حیثیت کو بھی تسلیم کر لیا جائے اور وہ تہی دست بھی نہ رہیں اور اس کے لیے وہ کتابوں کی تقریبِ رونمائی کو مفید قرار دیتے ہیں۔ ہمیں اعترا ض کسی کے مفاد پر نہیں۔ معترض تو ہم اس تقریب میں پڑھے جانے والے بعض مضامین پر ہیں جن میں پڑھنے والے کی ”رضا“ سے بڑھ کر صاحبِ کتاب کی” خوشنودی“ کا خصوصی خیال رکھا جاتا ہے۔ بلکہ یہ کہنا بے جا نہ ہوگا کہ اس اہم تقریب میں مصنّف اور کتاب کی تشہیر کا خصوصی بلیٹن نشر کیا جاتا ہے، تب کبھی کبھی یوں بھی ہوتا ہے کہ حاضرین مضامین پڑھنے والوں کے بارے میں یہ سوچنے پر مجبور ہو جاتے ہیں کہ

یہ ملکِ سخن کے وہ منافق ہیں جو ہر ”شام“
رکھ دیتے ہیں ایک تاج سَرِ بے ہنراں پر

کتاب کی تقریبِ رونمائی کے موقع پر توصیفی کلمات ادا کیے اور تعریفی مضامین پڑھے جاتے ہیں لیکن آج تک ایسا نہیں ہوا کہ کسی نے کتاب کا گھونگھٹ الٹتے ہی صاحبِ کتاب سے بے بسی اور جی داری کی ملی جلی کیفیت میں سوال کیا ہو کہ

تیری نئی کتاب پر کیا تبصرہ کروں؟
مضمون منحنی سا ہے، عنواں جسیم ہے

جی ہاں؛ ایسی کئی کتابیں منظرِ عام پر آئی ہیں جن کے عنوان کا خاصا رعب پڑتا ہے مگر جب ان کے مطالعے کی نوبت آتی ہے تو حیرانی و پریشانی کی یکجائی یہ سوچنے پر مجبور کر دیتی ہے کہ جس مریض کی ”صحت“ پر شبہ ہو اس کا ”جشنِ صحت“ کیوں منایا گیا؟ لیکن تقریبِ رو نمائی میں‌ مقالات و مضامین میں تعریفوں کے پل باندھے جاتے ہیں۔ محض اس بنیاد پر کہ مقالہ نگار اخلاق اور ذاتی تعلق دونوں کو نباہنے کے ہنر اور اہمیت سے واقف ہوتے ہیں یا مروتاََ ایسا کرنے پر مجبور ہو جاتے ہیں۔

محض ذاتی تعلقات کی بنیاد پر کسی کتاب کی اس معیار کی تعریف کرنا جس سے کمتر درجے کی وہ کتاب ہو، صاحبِ کتاب کے لیے ”اعزاز“ نہیں ”آزار“ ہے۔ بہت ممکن ہے کتاب کی تقریبِ رونمائی میں مدح سرائی کرنے والے خیال کرتے ہوں کہ رونمائی کے ساتھ کسی بری یا حقیر شے کا تصور نہیں کیا جاسکتا، لہٰذا کتاب پر تبصرہ بھی اعلیٰ درجے کا ہونا چاہیے۔ اندر سے خواہ کتاب کیسی ہی ہو۔ ظاہری حسن تو داد طلب ہے۔ بعض کتابوں کا سرورق متاثر نہیں کرتا مگر مطالعے سے ذوقِ کتب بینی بڑھ جاتا ہے اور ایسی بھی کتابیں ہوتی ہیں کہ سرورق پر نظر ڈالو تو ”واہ“ اور مطالعہ کرو تو ” آہ“ بھر کر رہ جاؤ گویا….

کتاب چھپ گئی چھ رنگے ٹائٹل کے ساتھ
کتابت اور طباعت کا بھی جواب نہیں
مگر کتاب کی تقریبِ رونمائی میں
کتاب چیخ رہی ہے کہ میں کتاب نہیں

دلہن اچھی ہو یا بُری رونمائی کا حق تو دونوں کو حاصل ہے، یہی بات کتاب کے ضمن میں بھی کہی جا سکتی ہے کہ موضوع، اسلوب اور مواد خواہ کیسا ہی کیوں نہ ہو کتاب کی رونمائی کے آرزو مند ہر صاحبِ کتاب کے ارمان تقریبِ رونمائی کے ضمن میں کم و بیش یکساں ہوتے ہیں۔

کتابوں کی رونمائی کی تقریبات شہر میں لگ بھگ اتنی ہی تعداد میں ہوتی ہیں جتنی کہ شادی کی تقریبات۔ کیونکہ شادی ہال کی طرح اس تقریبِ سعید میں تواضع کے لیے کبھی کبھار کھانے کو بھی بہت کچھ ہوتا ہے۔

بعض اوقات تقریبِ رونمائی کا اعزاز ایسی ہستی کے حصّے میں آجاتا ہے جو کتاب شناسی تو بڑی بات ہے، کتاب خوانی کی لذّت سے بھی محروم ہو۔ کیا کوئی صاحبِ کتاب واقعی اتنا بے بس ہوسکتا ہے کہ محض تشہیر اور ذاتی مفاد کی خاطر اپنی بے توقیری بخوشی قبول کر لے؟ کیا یہ مضحکہ خیز المیہ نہیں؟

بعض کتابیں اپنے موضوع، اسلوب، مواد کے سبب وہ پذیرائی حاصل کر لیتی ہیں اور صاحبِ کتاب کو بھی علمی اور ادبی حلقے ہی سے نہیں بسا اوقات عام قارئین کی جانب سے بھی وہ ”اعتبار“ حاصل ہو جاتا ہے جو اس کتاب اور صاحبِ کتاب کو حاصل نہیں ہوتا جس کی تشہیر کے لیے کسی”پانچ ستارہ“ ہوٹل میں تقریب کا انعقاد کیا گیا ہو یا جس تقریب کی صدارت کسی ”اعلیٰ سرکاری افسر“ یا کسی بڑی تجارتی کمپنی کے مالک کے حصّے میں آئی ہو۔

(فیچر رائٹر اور مضمون نگار شائستہ زریں‌ کے قلم سے)

خالہ گرم مسالہ کا اصل نام تو حسینہ خاتون ہے۔ وہ محلہ بھر میں گھوم پھر کر اِدھر کی خبریں اُدھر اور اُدھر کی اِدھر اس برق رفتاری سے پہنچاتی ہیں کہ بسا اوقات لوگوں کو بھی اپنے گھر کی باتیں محلّے والوں کی زبانی معلوم ہوتیں۔ اور وہ حیران رہ جاتے کہ جن باتوں کا علم گھر کے تمام افراد کو نہیں خالہ گرم مسالہ تک اُن کی رسائی کیسے ہوئی اور اُس کی محلّے میں دھوم کیسے مچ گئی؟

سادہ سی خبروں میں نمک مرچ لگا کر گرم مسالہ کا تڑکا لگانا بھی خوب جانتی ہیں۔حسینہ خاتون کے اسی ہنر کو دیکھتے ہوئے محلے کے ایک بچّے نے آپ کو ”خالہ گرم مسالہ“ کا نام دیا جس نے اصل نام سے زیادہ شہرت پائی۔

یہی نہیں اور بھی کئی ہنر ایسے ہیں جن میں خالہ گرم مسالہ طاق ہیں۔ مثلاً خالہ گرم مسالہ کو سُنانے کا بہت ہوکا ہے۔ خواہ وہ گیت ہو یا ریت، حکایتیں ہوں یا شکایتیں، باتیں ہو یا داستانیں۔ کھری کھری ہوں یا بے بھاؤ کی جب بھی سناتی ہیں جی بھر کر سناتی ہیں۔ جبریہ سننے والوں کی تو کیا کہیے کبھی کبھی تو شوقیہ سننے والے بھی سُن کر جی بھر کر بدمزہ ہو جاتے ہیں۔

اپنے ان تمام ”ہوکوں“ کے توسط سے خالہ گرم مسالہ اپنی ہر سنانے والی بات حسبِ ضرورت اپنے مخاطبین کو سناتی ہیں۔ بالخصوص شکوؤں شکایتوں کا ہوکا تو وہ کسی ہُڑکے کی طرح کرتی ہیں۔ اس کے ساتھ ہی بڑے سلیقے سے اپنی اہمیت بھی منوانے کی کوشش کرتی ہیں۔ اس ضمن میں اُن کا سب سے بڑا شکوہ ”مجھے بھول گئیں ناں“ ہوتا ہے۔ معلوم نہیں کیوں ایک دن بیٹھے بٹھائے خالہ گرم مسالہ کو خیال آیا کہ لوگ مجھے بھولتے جا رہے ہیں۔ حالانکہ یہ محض اُن کا وہم تھا۔

لو بھلا بتاؤ؟ کیا وہ ایسی شے ہیں جنہیں بھلا دیا جائے؟ ہر گز نہیں۔ جس کو دیکھو اُس کی زبان پر خالہ گرم مسالہ کا نام ہے۔ وہ دن اور آج کا دن خالہ گرم مسالہ کا ”مجھے بھول گئیں ناں“ کا ”ہوکا“ عروج پر ہے۔ جہاں خالہ گرم مسالہ اپنے طور اپنی موجودگی لازمی سمجھتی ہیں وہاں وہاں اپنی عدم موجودگی کا گلہ ضرور کرتی ہیں اور یہ گلہ محض ”مجھے بھول گئیں ناں“ تک محدود نہیں رہتا بلکہ وہ اپنے مخاطبین کو اس حشر برپا موقع پر ماضی کے حوالے دے کر کچھ اس طور سناتی ہیں کہ سننے والے سننے کی ہر خواہش سے ہاتھ کھینچ لیتے ہیں۔ کتنا ہی خالہ گرم مسالہ کو یقین دلائیں کہ آپ کو بھولا کوئی نہیں، بات صرف اتنی سی ہے کہ ہر جگہ اور ہر مقام پر آپ کی شمولیت ضروری نہیں لیکن خالہ گرم مسالہ مان کر ہی نہیں دیتیں۔ ہر دلیل رد کر دیتی ہیں۔ کیونکہ وہ سمجھتی ہیں کہ یہ اُن کا حق بلکہ پیدائشی حق ہے کہ جس ہنر میں اُنہیں معمولی سی بھی دسترس ہے، اس حساب سے نہ صرف اُنہیں یاد رکھا جائے بلکہ پیش پیش بھی رکھا جائے۔ اور جاننے والے بھی جانتے ہیں کہ اُن کی شمولیت اور عدم شمولیت کہاں ضروری ہے سو وہ اسی حساب سے اُنہیں مدعو اور نظر انداز کرتے ہیں۔

بعض تجسس کی ماری خواتین تو اوروں کے گھروں کی سُن گن لینے کے لیے خالہ گرم مسالہ کی خدمات حاصل کرتی ہیں اور خالہ گرم مسالہ یہ ”فلاحی کام“ بلا معاوضہ بڑی لگن اور محنت سے کسی مشن کی طرح یوں کرتی ہیں گویا پیشہ ور سماجی کارکن ہیں۔

ایک روز تو حد کر دی۔ ہُوا یوں کہ فیروزہ خالہ کی منجھلی بیٹی درخشاں کے رشتے کی بات اپنوں میں چل رہی ہے یا غیروں میں اور یہ بھی کہ لڑکا کیا کرتا ہے؟ جاننے کی خواہش میں بمشکل گھنٹہ بھر سوئیں اور شب بھر جاگ کر اپنے اس مشن میں کامیابی کے لیے دعائیں کرتی رہیں۔ ساتھ ہی اپنے منصوبہ بند ذہن کو بھی متحرک رکھا کہ جانے کب کہاں سے کون سا سرا ہاتھ لگ جائے۔ لیکن عقدہ تھا کہ حل ہو کے ہی نہیں دے رہا تھا، پھر یہ بھی ہے کہ خالہ گرم مسالہ اس امر سے بھی تو بخوبی واقف تھیں کہ یہاں دال گلنی بہت مشکل ہے کہ خالہ فیروزہ کے گھر کے ہر فرد کا پیٹ کسی گہرے کنوئیں کی مانند ہے جہاں سے بات نکلوانا کارِ محال ہے۔لیکن خالہ گرم مسالہ بھی خالہ گرم مسالہ ہیں۔ شب بھر دماغ لڑاتی رہیں۔ بالآخر کامیاب ہو ہی گئیں۔ اُنہوں نے فیصلہ کر لیا کہ کنواں جتنا گہرا ہے ڈول بھی اتنا ہی بڑا ڈالا جائے لیکن احتیاط سے۔

صبح سویرے ہی وہ اپنے مشن پر نکل کھڑی ہوئیں اور حیرت انگیز طور پر دس فیصد معلومات حاصل کر لیں جس پر وہ بہت نازاں تھیں کہ جہاں سے ایک فیصد بات اُگلوانا بھی ناممکن ہے، وہاں سے اُن کی ناممکن کی جستجو نے ممکنہ فتح حاصل کر لی۔ وہ جان گئی تھیں کہ درخشاں کے رشتے کی بات چیت اُس کی امی کی خالہ زاد بہن کے نواسے سے چل رہی ہے جو ایک سرکاری ادارے میں آفیسر ہے۔ اتنا بھید بھی خالہ گرم مسالہ کی سیماب صفت اور تجسس پسند فطرت کے لیے کافی تھا۔ جہاں وہ اپنی اس غیر متوقع کامیابی پر بہت مسرور تھیں وہاں ”لڑکے“ کی سرکاری آفیسر والی اطلاع اُنہیں تشویش میں مبتلا کر گئی کہ سرکار کی تو خود حالت بہت پتلی اور غیر ہے۔ جس کی اپنی ترقی خطرے میں ہو، جو خود اپنی خیر خواہ نہ ہو، ایسی سرکار سے کیا توقع رکھی جا سکتی ہے؟

اور پھر خالہ گرم مسالہ نے اس خبر کو بارہ مسالوں سے آراستہ کیا اور جہاں تک ممکن ہو سکا یہ خبر سماعتوں کی نذر کر دی۔ چونکہ خالہ گرم مسالہ خود سیراب نہ ہو سکیں تھیں۔ اس لیے اوروں کو مطمئن کرنا اُن کے لیے خاصی بڑی آزمائش تھی۔ کہ لوگ اس نامکمل معلومات میں دل چسپی نہیں لے رہے تھے۔ لیکن خالہ گرم مسالہ کی سنانے کی ہوس تھی کہ ختم ہو کر ہی نہیں دے رہی تھی۔

اور پھر یوں ہُوا کہ خالہ گرم مسالہ کے برس ہا برس کے تجربات سے مستفیض ہونے کے لیے ایک ادارے نے اُن سے رابطہ کر لیا۔ بے شک سیاسی بصیرت اُن میں نام کو نہیں لیکن خالہ گرم مسالہ اپنی زباں دانی کے جوہر اور لفظوں کے ہیر پھیر سے سیاسی مبصرین کو باہمی جھگڑوں میں الجھا کر مات دینے کا ہنر خوب جانتی ہیں۔ ابھی خالہ گرم مسالہ کو پیشکش ملے گھنٹہ بھر بھی نہ ہوا تھا کہ آپ نے محلے بھر میں الم نشرح کر دیا۔ محلّے والوں نے خوشی کا بھر پور اظہار کیا اور خالہ گرم مسالہ کو جلد از جلد یہ پیشکش قبول کرنے کی تاکید بھی کی۔ خالہ گرم مسالہ خوشی سے پھولے نہ سمارہی تھیں کہ خالو ببلو بیچارے (خالہ گرم مسالہ کے میاں) نے یکایک بے چارگی کا لبادہ اُتار پھینکا اور اپنی ازدواجی زندگی کے پچاس سالہ عرصے میں پہلی مرتبہ جرأت کا مظاہرہ کرتے ہوئے خالہ گرم مسالہ پر قدغن لگا کر اُنہیں اس فعل سے باز رکھا جو وہ اگر اختیار کر لیتیں تو جہنم کے دروازے اُن کے لیے کھل جاتے۔ ابھی بھی وہ محلّے بھر میں کون سا کارِ خیر کر رہی تھیں لیکن شر کی جو تاریخ وہ رقم کرنے جا رہی تھیں اس کا کفارہ بہت مشکل تھا اور جب یہ خبر عمران تک پہنچی جس نے خالہ گرم مسالہ کے میاں کو خالو ببلو بیچارے کے خطاب سے نوازا تھا، ببانگِ دہل اعلان کرتا پھر رہا تھا کہ ”خالو ببلو بیچارے بنے انگارے۔“ لیکن نہ جانے خالو ببلو نے خالہ گرم مسالہ کے کانوں میں کیا صور پھونکا تھا کہ وہ اس خواہش سے تائب ہو گئیں تھیں اور چینل والوں کے بے حد اصرار پر بھی راضی ہو کر ہی نہیں دے رہی تھیں۔

خالہ گرم مسالہ کے قطعی انکار سے عمران سخت آزردہ تھا۔ اُس نے سب سے زیادہ کوشش کی کہ خالہ گرم مسالہ کو بھڑکا کر راضی کر سکے تاکہ خالہ گرم مسالہ کے توسط سے وہ بھی سوشل ورکر بننے کا اپنا برسوں پرانا خواب پورا کر سکے۔ اور اب خالو ببلو بیچارے خالو خسارے بنے اُس کی راہ کی دیوار بن رہے تھے۔ جب خالہ گرم مسالہ عمران کے پے در پے سوالوں سے زچ آگئیں تو اُنہوں نے بڑے سبھاؤ اور تدبر سے کہا کہ ”سر اور دستارکی سلامتی اسی میں ہے کہ اس جھنجھٹ سے دور رہا جائے۔“ عمران ہونق بنا اُن کی شکل دیکھے گیا اور جب کچھ دیر بعد اُس کاسکتہ ٹوٹا تو اُس نے صرف اتنا ہی کہا ”کاش خالو ببلو بیچارے، بیچارے ہی بنے رہتے۔ کر دیا نا اُنہوں نے آپ کا کباڑا، بن گئے نا خالو مرچ مسالہ۔آج تک کسی نے آپ کو کچھ کہا؟ کس شان سے سر اُٹھا کر جی رہی ہیں۔“

” عمران بیٹا! بے شک شان سے ہی نہیں آن سے بھی جی رہی ہوں۔ لیکن اس لیے کہ اپنوں کے درمیان ہوں۔ اپنا مارے گا تو پھر چھاؤں میں بٹھائے گا۔ وہ کون سے میرے اپنے ہیں جو میرا مان رکھیں گے۔“

اور عمران! خالہ گرم مسالہ کے اپنے پرائے کے فلسفے میں الجھا سوچ رہا تھا۔خالہ گرم مسالہ کا اپنوں پہ یہ کیسا مان ہے جس نے اُن کو شہرت کی خواہش سے ہاتھ کھینچنے پر مجبور کر دیا۔ کیا واقعی اپنائیت کا احساس ایسا طاقتور ہوتا ہے جو خالہ گرم مسالہ کو خالہ نرم دو شالہ بننے پر آمادہ کر دے؟

(شائستہ زریں کے قلم سے)