شادی میں مضر صحت کھانا کھانے کے بعد تقریب کے شرکا کی طبیعت خراب ہو گئی اور 250 سے زائد مہمان اسپتال جا پہنچے۔
اے ٓآر وائی نیوز کے مطابق یہ واقعہ راولپنڈی میں پیش آیا جہاں ڈھونگ کے علاقے میں شادی کی ایک تقریب میں مبینہ مضر صحت کھانا کھانےکے بعد 260 مہمانوں کی حالت غیر ہو گئی۔
رپورٹ کے مطابق کھانا کھانے کے فوری بعد مہمانوں کو معدے میں درد اور متلی محسوس ہونے لگی۔ متاثر ہونے والوں میں خواتین اور بچے بھی شامل ہیں۔
طبیعت زیادہ خراب ہونے مہمانوں کو قریبی اسپتال منتقل کیا گیا جہاں ان کا علاج جاری ہے۔
دوسری جانب شادی کا کھانا کھانے کے بعد اتنی بڑی تعداد میں لوگوں کی طبعیت خراب ہونے پر علاقے میں ہلچل مچ گئی اور انتظامیہ کی بھی دوڑیں لگ گئیں۔
اسسٹنٹ کمشنر گوجر خان، محکمہ صحت اور فوڈ کی ٹیمیں اسپتال پہنچ گئیں، جہاں انہوں نے ڈاکٹروں سے مریضوں کی صحت سے متعلق معلومات حاصل کیں جبکہ متاثرہ افراد کے بیانات بھی قلمبند کیے۔
ورون دھون کے ساتھ فلم ’بے بی جان‘ سے بالی ووڈ میں ڈیبیو کرنے والی اداکارہ وامیکا گبی نے اپنی شادی کے منصوبوں کا انکشاف کیا ہے۔
وامیکا گبی ورسٹائل اداکارہ ہیں جنہوں نے پنجابی، ہندی، تامل اور ملیالم فلموں کے ساتھ ساتھ ویب سیریز میں بھی اپنی اداکاری کے جوہر دکھائے ہیں۔
انہوں نے اداکاری کے سفر کا آغاز بطور چائلڈ آرٹسٹ بالی ووڈ کلاسک فلم ’جب وی میٹ‘ میں مختصر کردار سے کیا، تاہم اب وہ راج کمار راؤ کی فلم ‘بھول چوک معاف’ میں مرکزی کردار کے طور پر نظر آئیں گی۔
فلم ‘بھول چوک معاف’ کے ٹریلر لانچ کے موقع پر، وامیکا گبی نے بھارتی میڈیا کے ایک سوال کا جواب دیتے ہوئے اپنی شادی کے منصوبوں کے بارے میں بات کی۔
اداکارہ وامیکا نے کہا کہ شادی کا ابھی کوئی منصوبہ نہیں ہے اور نہ ہی آنے والے دنوں میں شادی سے متعلق کچھ سوچا ہے، میں ابھی فلحال شادی کے بارے میں کچھ بھی پلان نہیں کررہی۔
اداکارہ کا کہنا تھا کہ’ نہ ہی میں یہ سوچتی ہوں کہ مجھے کس طرح اور کس سے شادی کرنی چاہیے، میرے دماغ میں ابھی شادی وغیرہ کے لیے کچھ نہیں ہے۔’
وامیکا گبی نے کہا کہ شادی کے لیے جب کوئی ایسا ملے گا اور مجھے شاندار شادی کے خواب آنے لگیں گے تو میں ضرور بتاؤ گی کہ میں کیا خواب دیکھ رہی ہوں لیکن ابھی شادی کو لے کر میرا دماغ بلینک ہے۔
شادی بیاہ میں پیسے نچھاور کرنا غیر معمولی بات نہیں تاہم ایک دولہا کو اپنی بارات میں نوٹ لٹانا بہت مہنگا پڑ گیا۔
شادی بیاہ ہو یا خوشی کا کوئی موقع کئی لوگ اس موقع پر اپنی مسرت کا اظہار کرتے ہوئے پیسے نچھاور کرتے ہیں اور ہر شخص اپنی استطاعت کے مطابق یہ خوشی مناتا ہے۔
آئے روز ایسی ویڈیوز بھی وائرل ہوتی ہیں جس میں دولہا یا خاندان والے بارات کے موقع پر نوٹوں کی برسات کر دیتے ہیں حالیہ کچھ عرصہ میں تو پاکستان کے کئی علاقوں میں بڑی مالیت کے پاکستانی نوٹوں سمیت ڈالر اور پاؤنڈز تک لٹائے جانے کی ویڈیوز وائرل ہوئی ہیں۔
تاہم ایک دولہا کو اپنی شادی پر پیسے لٹانے بہت مہنگا ثابت ہوا اور اس کو جیل کی ہوا کھانی پڑی وہ بھی ایک یا دو روز نہیں بلکہ 6 ماہ کے لیے۔
یہ واقعہ پاکستان نہیں بلکہ افریقی ملک نائجیریا میں پیش آیا جہاں ایک دولہا کو شادی کے بعد ہنی مون کے بجائے جیل جانا پڑ گیا۔
غیر ملکی میڈیا کے مطابق عبداللہ موسیٰ حسینی نامی دولہا اپنی شادی پر نہ صرف ڈانس کر رہا تھا بلکہ خوشی میں پیسے بھی لٹا رہا تھا۔ باراتی اس کی ویڈیو بنا رہے تھے جو سوشل میڈیا پر تیزی سے وائرل ہوگئی اور یہی ویڈیو دولہا کے لیے مصیبت بن گئی۔
پولیس نے دولہا کے خلاف پیسے کے ناجائز استعمال کا مقدمہ درج کر کے اسے گرفتار کر لیا۔
عبداللہ موسیٰ کو عدالت میں پیش کیا گیا جہاں اس نے اعتراف جرم کر لیا جس کے بعد عدالت نے اس کو 6 ماہ قید کی سزا سنا دی۔
واضح رہےکہ نائجیریا میں اکنامک اینڈ فنانشل کرائمز کمیشن اس رسم کے خلاف مہم چلا رہا ہے اور اسے پیسے کی بے توقیری قرار دیا جاتا ہے۔
پاکستانی شوبز انڈسٹری کے ورسٹائل فنکار عثمان خالد بٹ نے ذاتی زندگی سے متعلق سوال کرنے والوں کو دو ٹوک جواب دیا ہے۔
عثمان خالد ایک اداکار، مصنف، ہدایت کار اور کریوگرافر ہیں، ان کے ٹیلنٹ سے پر ایک واقف ہیں لیکن وہ ٹیلی ویژن اسکرین پر اس قدر نظر نہیں آتے جتنا ناظرین انہیں دیکھنا چاہتے ہیں۔
عثمان خالد بٹ اس وقت اسلام آباد سے تعلق رکھنے والے اپنے قریبی شوبز گروپ میں ان چند افراد میں شامل ہیں جو ابھی تک غیر شادی شدہ ہیں جس کے باعث ان سے انٹرویو اور سوشل میڈیا پر شادی سے متعلق سوال کیا جاتا ہے۔
حال ہی میں وہ علی سفینہ کے شو میں بطور مہمان شریک ہوئے، جہاں ایک بار پھر ان کی شادی کے موضوع پر سوال کیا گیا، اس بار اداکار عثمان نے نہایت دو ٹوک اور سنجیدہ انداز میں جواب دیا ہے۔
اداکار عثمان خالد بٹ نے کہا کہ میں شادی نہیں کر رہا کیونکہ میں اس کے لیے کوئی کوشش ہی نہیں کر رہا، میں ایک ”نان کنفارمسٹ” (یعنی روایتی سماجی تقاضوں سے ہٹ کر جینے والا) انسان ہوں اور مین صرف معاشرے کو خوش کرنے کے لیے شادی نہیں کرسکتا۔
عثمان خالد بٹ نے انٹرنیٹ پر مسلسل شادی سے متعلق سوالات پر برہمی کا اظہار کرتے ہوئے کہا کہ بھئی میں تھک چکا ہوں کہ لوگ ہر وقت میری شادی کے بارے میں پوچھتے ہیں، انہیں اپنی زندگیوں پر توجہ دینی چاہیے، نہ کہ میری ذاتی زندگی میں دخل دینا چاہیے۔
بیجنگ: چین نے بچوں کی پیدائش کو بڑھانے کے لیے گزشتہ روز شادی کے اندراج کے عمل کو آسان بنانے اور جوڑوں پر مالی بوجھ کو کم کرنے کے لیے اہم اقدامات کا اعلان کیا ہے۔
ہفتے کے روز چین نے شادی کی رجسٹریشن کو آسان بنانے اور جوڑوں پر مالی بوجھ کو کم کرنے کے لیے نئے اقدامات کا اعلان کیا ہے، یہ اقدامات حکام کی جانب سے شرح پیدائش کو بڑھانے کی کوشش میں کیے گئے ہیں۔
چین میں بغیر شادی بچے پیدا کرنے کا رجحان نہ ہونے کے برابر ہے، کیوں کہ ایک طرف تو سماجی بدنامی کا دباؤ ہوتا ہے اور دوسری طرف حکومت کی جانب سے ایسے جوڑوں کو مالی و سماجی تحفظ بھی میسر نہیں ہے۔ اس لیے جوڑوں کی شادی اور بچے پیدا کرنے میں کمی سے نمٹنے کے لیے چین پہلے بھی ترغیبات دے چکا ہے۔
ریاستی نشریاتی ادارے سی سی ٹی وی نے 22 مارچ کو ایک سرکاری دستاویز کا حوالہ دیتے ہوئے رپورٹ کیا کہ تازہ ترین اقدام کے بعد اب لوگ وہاں شادی رجسٹر کر سکیں گے جہاں وہ رہ رہے ہوں۔ اب تک جوڑوں کو وہاں جانا پڑتا تھا جہاں سول رجسٹری میں دولہا یا دلہن کا نام ہوتا تھا، جس سے اضافی سفری اور مالی بوجھ پڑتا ہے۔ اس اقدام سے ان لوگوں کو آسانی میسر ہوگی جو اپنے آبائی شہروں سے دور کام کرتے یا رہتے ہیں۔
واضح رہے کہ چین میں گزشتہ سال شادیوں کی تعداد میں 20.5 فی صد کمی واقع ہوئی، جب کہ 2024 مسلسل تیسرا سال تھا جس میں آبادی میں کمی دیکھنے میں آئی۔ حکام کی جانب سے پہلے بھی کئی اقدامات کیے گئے تھے، جن میں شادی کرنے والوں یا بچے پیدا کرنے والوں کو مالی مدد فراہم کرنا شامل ہے۔
شہری امور کی وزارت نے وعدہ کیا کہ کچھ نقصان دہ رسوم و رواج جیسے کہ مہر کی مبالغے کی حد تک زیادہ رقم اور بہت زیادہ مہنگی شادی کی تقریبات کے انعقاد کی حوصلہ شکنی کی جائے گی۔ مہر وہ رقم ہے جو دولہے کا خاندان عام طور پر دلہن کو دیتا ہے۔ چین میں بہت سے نوجوان شادی کرنے اور بچے پیدا کرنے سے گریزاں ہیں، اس کی ایک بڑی وجہ اپارٹمنٹ خریدنے کے لیے مالی استطاعت نہ ہونا ہے۔
مہنگی ترین شادی میں 1600 کروڑ روپے خرچ صرف دلہن کے میک اپ لباس اور زیورات پر ساڑھے 3 ارب سے زائد خرچ آیا۔
آپ نے اب تک کئی مہنگی شادیوں کا ذکر سنا، پڑھا یا دیکھا ہوگا۔ گزشتہ سال اننت امبانی اور رادھیکا مرچنٹ کی شادی کو بھارت کی مہنگی ترین شادی قرار دیا جا رہا ہے، جس پر مبینہ طور پر 600 ملین ڈالر خرچ کیے گئے۔
تاہم ہم آج آپ کو 9 سال قبل ہونے والی ایک ایسی شادی کا احوال بتا رہے ہیں جہاں لڑکی کی شادی پر اس کے والدین نے 500 کروڑ روپے (پاکستانی 1600 کروڑ روپے سے زائد) لٹا دیے، جو آج کی کرنسی ویلیو کے تناسب سے امبانی فیملی کی شادی کے خرچ سے زیادہ ہے۔ اس شادی میں صرف دلہن کی تیاری جس میں میک اپ، عروسی لباس اور زیور پر ساڑھے تین ارب روپے سے زائد خرچ کیا گیا۔
یہ پرتعیش شادی پڑوسی ملک بھارت میں ہوئی جس کو اس وقت دنیا کی مہنگی ترین شادی بھی قرار دیا گیا اور اس مہنگی ترین شادی کا اعزاز کسی کاروباری ٹائیکون کو نہیں بلکہ سیاستدان اور سابق وزیر کو حاصل ہوا۔
بھارتی میڈیا کے مطابق یہ مہنگی ترین کرناٹک کے سابق وزیر جناردھن ریڈی کی بیٹی کی تھی جو 9 سال قبل ہوئی تھی، جس کے شاہانہ انداز، انتظامات اور خرچوں کا چرچا پورے بھارت میں ہوتا رہا تھا۔
16 نومبر 2016 کو ہونے والی اس شادی میں ریکارڈ پچاس ہزار مہمانوں نے شرکت کی تھی۔ ان مہمانوں کے لیے جناردھن ریڈی نے بنگلورو کے فائیو اسٹار اور تھری اسٹار ہوٹلوں میں 1500 کمرے بک کروائے تھے۔
مہمانوں کو شادی میں شاہی پروٹوکول دیا گیا۔ 40 بیل گاڑیاں، 2 ہزار لگژری کاریں اور 15 ہیلی کاپٹرز مہمانوں کی آمدورفت کے لیے مختص کیے گئے تھے۔ شاہی ضیافت میں 16 مختلف اقسام کی مٹھائیاں پیش کی گئیں۔ ہر پلیٹ کی قیمت تقریباً 3,000 روپے تھی۔
شادی کی تقریبات پانچ دن تک جاری رہی تھیں جب کہ شادی کا پنڈال وجے نگر سلطنت کے شاہی مندروں سے متاثر تھا جس کو بالی ووڈ کے ماہر آرٹ ڈائریکٹر نے تیار کیا تھا۔
دلہن برہمانی نے اپنی شادی والے روز معروف ڈیزائنر نیتا للو کی تیار کردہ خالص سونے کے دھاگوں سے کڑھائی والی لال کانچی ورم ساڑھی پہنی تھی جس کی قیمت 55 کروڑ روپے ہے۔ میک اپ پر بھی ایک کروڑ روپے سے زائد خرچ کیے گئے تھے۔
برہمانی کے شادی والے دن پہنے گئے زیورات کی مجموعی قیمت 3 ارب سے زائد بتائی جاتی ہے۔ ان میں 80 کروڑ روپے مالیت کا ہیروں سے جڑا چوکر ہار بھی شامل ہے۔ اس کے علاوہ ہیروں سے جڑی مانگ ٹیکا جبکہ بالوں کی چوٹی میں بھی ہیرے جڑے زیورات لگائے گئے تھے۔
بھارت میں ایک حالیہ سروے نے تہلکہ مچا دیا ہے جس میں انکشاف ہوا ہے کہ ملک کی خواتین کی اکثریت شادی کرنے کے خلاف ہیں۔
برصغیر پاک وہند کے معاشرے میں خواتین کا تنہا رہنا دشوار سمجھا جاتا ہے اور لڑکی کے بڑے ہوتے ہی والدین اس کی شادی کی کوششیں شروع کر دیتے ہیں۔ لیکن بھارت میں شادی سے متعلق حالیہ ایک سروے کے نتائج نے انڈیا میں ہلچل مچا دی ہے۔
بھارتی میڈیا کے مطابق ڈیٹنگ ایپ بمبل نامی تنظیم کی جانب سے بھارت میں ایک سروے کرایا گیا جس میں ان سے شادی سے متعلق سوال کیا گیا اور نتائج نے سب کو حیران کر دیا کیونکہ 81 فیصد خواتین شادی کرنا نہیں چاہتیں اور ان کا کہنا ہے کہ وہ بغیر شادی کے خوش وخرم زندگی گزار رہی ہیں۔
اس سروے میں 62 فیصد خواتین نے کہا ک وہ اپنی ضروریات اور ترجیحات سے سمجھوتہ نہیں کر سکتیں جب کہ 83 فیصد لڑکیوں کا کہنا تھا کہ جب تک انہیں اچھا جیون ساتھی نہیں مل جاتا وہ شادی نہیں کریں گی۔
اس سروے میں 39 فیصد خواتین نے کہا کہ وہ شادی کے موسم میں خود پر دباؤ محسوس کرتی ہیں اور ہر سال شادیوں کا سیزن میں والدین کو اپنی بیٹیوں کی شادی کے حوالے سے معاشرتی دباؤ کا سامنا کرنا پڑتا ہے اور وہ یہ معاشرتی دباؤ اپنی بیٹیوں پر شادی کے لیے زبردستی رضامند کرنے کے ذریعہ منتقل کرتی ہیں۔
بالی ووڈ کے مسٹر پرفیکشنسٹ عامر خان کو بظاہر دو ناکام شادیوں کے بعد اپنی تیسری جیون ساتھی مل گئیں ہیں، جس نے سب کو حیران کردیا ہے۔
بالی ووڈ کے مسٹر پرفیکشنسٹ عامر خان 60 سال کے ہوگئے ہیں انہوں نے اپنی گرینڈ سالگرہ سے پہلی اپنی نئی گرل فرینڈ کا اعلان کیا ہے جس سے پوری انڈسٹری میں کھلبلی مچ گئی۔
بھارتی میڈیا کے مطابق عامر خان اپنی نئی گرل فرینڈ گوری سپراٹ کو متعارف کرواتے ہوئے کچھ ایسا عندیہ دیا جس سے لگتا ہے کہ اداکار تیسری شادی کرنے جا رہے ہیں۔
خان نے اپنی 25 سال پرانی دوست گوری سپراٹ سے میڈیا کو ملوایا اور بتایا کہ یہ میری پرانی دوست ہیں، جب ہم ملے تو سنگل تھے لیکن اب ہمارے بچے جوان ہوگئے ہیں۔
اداکار نے مزید کہا کہ اب ہم پارٹنرز ہیں اور 18 ماہ سے ایک ساتھ ہیں، ہم ایک دوسرے کے لیے بہت سنجیدہ اور پرعزم ہیں، میں نے انہیں سلمان خان اور شاہ رخ خان سے بھی ملوایا ہے۔
عامر نے میڈیا سے گفتگو میں اپنی شادی سے متعلق کہا کہ مجھے نہیں معلوم کہ 60 سال کی عمر میں، مجھے شادی شوبھا دیتی ہے یا نہیں لیکن ہاں میرے بچے بہت خوش ہیں، میں بہت خوش قسمت ہوں کہ سابقہ بیویوں کے ساتھ میرے بہت اچھے تعلقات ہیں۔
یاد رہے کہ اداکار کی پہلی شادی فلم پروڈیوسر رینا دتہ سے ہوئی تھی، جن سے ان کے دو بچے جنید اور ایرا خان ہیں، دونوں کے درمیان طلاق 2002 میں ہوئی تھی۔
بعد ازاں عامر خان نے ڈائریکٹر کرن راؤ سے 2005 میں دوسری شادی کی تھی لیکن 2021 میں دونوں نے علیحدگی اختیار کرلی، ان کا ایک بیٹا آزاد ہے۔
پاکستان شوبز انڈسٹری کی معروف ماڈل و اداکارہ کرن اشفاق نے مداح کو شادی سے متعلق اہم مشورہ دے دیا، جس کے بعد سوشل میڈیا صارفین کی جانب سے ملے جلے رد عمل کا اظہار کیا جارہا ہے۔
فوٹو اینڈ ویڈیو شیئرنگ ایپ انسٹاگرام پر معروف اداکارہ کرن اشفاق نے اپنے چاہنے والوں سے گپ شپ لگانے کے لیے ایک سیشن رکھا جس میں انہوں نے مداحوں کے سوالات کے جوابات دیئے۔
ایک مداح نے اس سیشن کے دوران اداکارہ سے پوچھا کہ میرے شوہر صرف اپنی والدہ کی ہی بات ترجیح دیتے ہیں، میری شادی کو ابھی صرف 2 سال ہوئے ہیں اور زندگی مشکلات میں گھر گئی ہے۔
مداح کا مزید کہنا تھا کہ آپ مجھے مشورہ دیں کہ مجھے کیا کرنا چاہیے؟
مداح کو مشورہ دیتے ہوئے کرن کا کہنا تھا کہ جو آدمی صرف اپنی ماں کی ہی بات سنتے ہوں ان کے گھر کبھی نہیں بستے، اللّٰہ کرے آپ کے شوہر کو یہ بات جلدی سمجھ آ جائے۔
انہوں نے اپنی پوسٹ میں یہ بھی کہا کہ جو آدمی صرف اپنی ماں کی بات سنتے ہیں وہ کبھی اچھے شوہر نہیں بن سکتے۔
اس سے قبل کرن اشفاق نے فوٹو اینڈ شیئرنگ ایپ انسٹاگرام پر بیٹی کی پیدائش کی خوشخبری سنائی تھی، اداکارہ نے اس پوسٹ میں بتایا کہ ان کے ہاں بیٹی کی پیدائش ہوئی ہے۔
اداکارہ کا اپنی پوسٹ میں کہنا تھا کہ اپنی نومولود بیٹی کا نام خدیجہ علی رکھا ہے اور بیٹی کی پیدائش رواں ماہ کی 5 تاریخ کو ہوئی ہے۔ انہوں نے انسٹاگرام پر اپنی بہن کی اسٹوری کو بھی شیئر کیا ہے جس میں بچی کو دیکھا جاسکتا ہے۔
پاکستانی شوبز انڈسٹری کے معروف اداکار آریز احمد نے انکشاف کیا ہے کہ ایک اداکارہ شادی کے بعد بھی میرے پیچھے پڑی رہی، حالانکہ میں نے واضح کر دیا تھا کہ میرا کوئی ایسا ارادہ نہیں ہے۔ اس کے باوجود مجھ پر شادی کے لئے دباؤ ڈالتی رہی۔
آریز نے کہا کہ اگر میری حبا سے شادی نہ بھی ہوتی، تب بھی میں اس اداکارہ سے شادی نہیں کرتا۔
حال ہی میں ایک رمضان شو میں پاکستانی شوبز کا مقبول جوڑا حبا بخاری اور آریز احمد شریک ہوئے، جہاں انہوں نے اپنی ازدواجی زندگی، سوشل میڈیا پر تنقید کے حوالے سے کھل کر بات کی۔
آریز نے بات چیت کے دوران حبا بخاری پر حمل کے دوران تنقید کرنے والوں کو آڑے ہاتھوں لیا، انہوں نے کہا کہ اگر حاملہ خواتین گھر سے باہر نہ نکلیں تو کیا کریں؟ کیا وہ اپنا پیٹ گھر پر رکھ کر آئیں؟”
حبا بخاری نے بھی معاشرتی سوچ پر سوال اٹھاتے ہوئے کہا کہ ”کیا حاملہ ہونا بیماری ہے؟ کیا یہ کوئی معیوب بات ہے کہ کام کرتے رہنا غلط سمجھا جائے؟”
آریز نے کہا کہ ایک اداکارہ نے نہ صرف ان سے تعلقات استوار کرنے کی کوشش کی بلکہ ان کی شادی طے ہوجانے کے باوجود بھی پیچھے پڑی رہیں اور شادی کے لئے دباؤ ڈالتی رہیں۔
آریز نے اداکارہ کا نام ظاہر کیے بغیر مزید کہا کہ ”میں اس اداکارہ سے کبھی بھی شادی نہیں کرتا، چاہے میری اور حبا کی شادی ہوتی یا نہ ہوتی۔”
واضح رہے کہ اس سے قبل شوبز انڈسٹری کی معروف جوڑی حبا بخاری اور آریز نے نادیہ خان سے متعلق تنازع پر لب کشائی کی تھی۔
اے آر وائی ڈیجیٹل کے پروگرام ’شان سحور‘ میں حال ہی میں اداکارہ حبا بخاری نے شوہر آریز کے ساتھ شرکت کی اور نادیہ خان سے متعلق تنازع پر اظہار خیال کیا۔
آریز کا کہنا تھا کہ انڈسٹری میں تقریباً ہر کوئی جانتا تھا کہ ہم والدین بننے والے ہیں کیونکہ حبا بخاری ڈرامے کی شوٹنگ کروارہی تھیں لیکن لوگوں کے پاس شائستگی ہے کہ وہ خود سے آگے بڑھ کر اس خوشخبری کو شیئر نہ کریں۔
انہوں نے کہا کہ میزبان و اداکارہ نادیہ خان سب جانتی تھیں لیکن انہوں نے اس بات کا اعلان ٹی وی پر کردیا، کچھ باتیں آپ کی اپنی ہوتی ہیں جو آپ دنیا کے سامنے رکھنا چاہتے ہیں۔
حبا بخاری نے بتایا کہ جب وہ حاملہ تھی تو انہیں تنقید کا نشانہ بنایا گیا اور ایوارڈ کی تقریب میں پہنے گئے لباس پر بھی تنقید کی گئی، ہر کسی کی اپنی رئے ہوتی ہے اور شاید لوگوں کو تکلیف ہوتی ہے لیکن میں صرف خود کو دیکھتی ہوں اور کسی کی رائے پر توجہ نہیں دیتی۔
