کوئٹہ: شاہراہ اقبال میں بخاری سینٹر کے قریب دھماکا ہو اہے جس کے نتیجے میں 4 افراد جاں بحق جب کہ کئی افراد زخمی ہو گئے۔
اے آر وائی نیوز کے مطابق ریسکیو ذرائع کا کہنا ہے بلوچستان کے صوبائی دارالحکومت کوئٹہ میں شارع اقبال، بخاری سینٹر کے قریب دھماکا ہوا ہے جس کے نتیجے میں 4 افراد جاں بحق جب کہ 9 افراد زخمی ہو گئے ہیں۔
ایس ایس پی انویسٹی گیشن ذوہیب محسن کے مطابق دھماکے میں جاں بحق ہونے والوں میں 2 پولیس اہل کار بھی شامل ہیں۔ ریسکیو ذرائع کا کہنا ہے کہ دھماکے سے متعدد گاڑیوں اور موٹر سائیکلوں کو بھی نقصان پہنچا ہے۔
پولیس حکام کے مطابق دھماکے کے وقت جائے وقوع سے ایس پی انویسٹی گیشن صدر کی گاڑی گزر رہی تھی، تاہم وہ گاڑی میں موجود نہیں تھے۔
ایس ایس پی انویسٹی گیشن ذوہیب محسن نے بتایا ہے کہ بظاہر لگتا ہے کہ پولیس کی گاڑی کو نشانہ بنایا گیا ہے، 2 سے 3 کلو بارودی مواد موٹر سائیکل میں نصب کیا گیا تھا۔ انھوں نے کہا کہ شواہد جمع کر کے تفتیش کی جا رہی ہے، سی سی ٹی وی فوٹیج کا بھی جائزہ لیا جا رہا ہے۔
