Tag: شارٹ ٹرم اغوا

کراچی: شہر قائد میں ان دنوں مختصر مدت کے اغوا کی وارداتیں بڑھتی جا رہی ہیں، ایک ویڈیو سے انکشاف ہوا کہ شارٹ ٹرم کڈنیپنگ میں پولیس اہل کار بھی ملوث ہیں۔

اے آر وائی نیوز کے مطابق کراچی کے علاقے سچل میں صفورا چورنگی کے قریب سے پولیس اہل کاروں نے پولیس موبائل ہی میں ایک دکان دار کو اغوا کر کے تاوان وصول کیا۔

اے آر وائی نیوز کو موصول ہونے والی ویڈیو سے یہ تشویش ناک امر بھی سامنے آیا ہے کہ سچل پولیس نے جس طرح کھلم کھلا واردات کی ہے، اس سے معلوم ہوتا ہے کہ پولیس کو سر عام شدید مجرمانہ کارروائیاں کرتے ہوئے بھی کسی قسم کا محکمانہ خوف لاحق نہیں۔

سچل پولیس نے ایک کباڑیے محمد بلال کو اغوا کرنے کی واردات پولیس موبائل ہی میں انجام دی، صفورا گوٹھ سے کباڑی کو بغیر نمبر پلیٹ موبائل میں اغوا کیا گیا، اہل کار کباڑی کو آنکھوں پر پٹی باندھ کر گھماتے رہے۔

اہل کاروں نے بلال سے اس کے ماموں کو فون کرایا، اور لاکھوں روپے رقم منگوائی، تاہم مغوی کے رشتے داروں نے 25 ہزار تاوان ادا کر کے اس کی جان چھڑائی۔

واردات کے بعد متاثرہ شخص بلال نے واقعے کی ایس ایس پی ایسٹ کو درخواست دے دی، اور بتایا کہ ایک پولیس موبائل میں چار افراد آئے، جن میں سے 2 وردی میں تھے اور 2 سادہ لباس میں تھے، ان کے پاس سرکاری اسلحہ بھی تھا، انھوں نے دکان میں گھس کر مجھے اٹھایا، آنکھوں پر پٹی باندھی اور کسی نامعلوم مقام پر لے گئے۔

درخواست گزار کا کہنا تھا کہ انھیں پولیس اہل کاروں کی جانب سے قتل کی دھمکیاں دی گئیں، مار پیٹ بھی کی، جیب میں دکان کے 2 لاکھ روپے موجود تھے، جو انھوں نے نکال لیے، اور پھر مجھ سے میرے ماموں منیر کو فون کروا کر 25 ہزار روپے منگوائے۔

محمد بلال نے دعویٰ کیا ہے کہ ان کے پاس تاوان وصولی کی ویڈیو کال بھی موجود ہے۔

پولیس ذرائع کے مطابق شارٹ ٹرم کڈنیپنگ، چند روز قبل سچل تھانے کی حدود میں ہونے والے مبینہ جعلی مقابلوں، اور دیگر شکایات پر ایس ایچ او سچل رسول سیال کو معطل کر دیا گیا ہے۔

کراچی: شہر قائد میں چند دن قبل کورنگی کراسنگ کے علاقے میں تاجر کے بیٹے کے مختصر مدت کے اغوا کا واقعہ پیش آیا تھا، اس واقعے کی سی سی ٹی وی فوٹیج اے آر وائی نیوز کو حاصل ہوئی ہے، جس سے واقعے کی تفصیل سامنے آ گئی۔

تفصیلات کے مطابق نامعلوم افراد 11 جون کو کورنگی کراسنگ پر واقع ٹاور میں سونے کے تاجر کی جیولری شاپ میں داخل ہوئے، اور ان کے بیٹے کو دکان سے اغوا کر کے لے گئے، واردات کے وقت جیولری شاپ پر تاجر کا بیٹا ہی موجود تھا۔

سی سی ٹی وی فوٹیج کے مطابق مسلح افراد نے دکان میں داخل ہوتے وقت خود کو اسپیشل برانچ کے اہل کار ظاہر کیا، ملزمان نے دکان میں داخل ہوتے ہی تاجر کے بیٹے کے ہاتھ سے سونا لے کر جیب میں رکھ لیا۔

ملزمان نے تاجر کے بیٹے کو اپنے ساتھ لیا اور باہر لے گئے، تاجر کے بیٹے کو باہر لے جانے سے قبل ملزمان نے بچے سے بھی دکان بند کرائی، اس کے بعد انھوں نے بچے کو مارکیٹ کے باہر کھڑی سفید رنگ کی کار میں بٹھا دیا۔

تاجر کے بیٹے کو لے جاتے وقت ملزمان کے پاس پہلے ہی سے ایک بچہ اور تھا، ملزمان بچے کو کار میں ڈال کر ساتھ لے گئے، اور پھر ملزمان کی جانب سے اغوا کیے گئے بچے کی فیملی سے رابطہ کیا گیا۔

اس واقعے میں ملزمان نے بچے کی بحفاظت رہائی کے لیے 10 لاکھ روپے تاوان کا مطالبہ کیا تھا، اور رقم کی ادائیگی میں تاخیر پر ملزمان نے بچے کو تشدد کا نشانہ بھی بنایا تھا، تشدد کے وقت بچے کی جیب سے 140 گرام سونا برآمد ہوا تو ملزمان نے اسے قبضے میں لے لیا۔

پولیس رپورٹ کے مطابق ملزمان نے 3 گھنٹے تک بچے کو تحویل میں رکھا تھا، اور پھر سنسان ایریا میں چھوڑ کر بھاگ گئے، پولیس نے نامعلوم ملزمان کے خلاف مقدمہ درج کر لیا ہے۔