Tag: شان الحق حقی

زبان کسی بھی ملک کی ثقافت کی آئینہ دار ہوتی ہے جسے زندہ رکھنے کا مطلب اپنی ثقافت کو زندہ رکھنا ہے اور اس کے لیے ضروری ہے کہ زبان کو نسل در نسل منتقل کیا جاتا رہے۔ خواہ یہ زبان قومی سطح کی ہو، مقامی اور علاقائی ہو۔ اس کے ساتھ اجتماعی ترقی اور خوش حالی کے لیے ضروری ہے کہ ہم میں‌ سے ایک طبقہ ایسا ہو جو مختلف اہم اور دنیا بھر میں رابطے کا ذریعہ بننے والی زبانیں سیکھے اور ان کے علمی و ادبی سرمائے کو مقامی زبان میں منتقل کرے۔ پیشِ نظر پارہ اسی مسئلے کی جانب ہماری توجہ مبذول کرواتا ہے۔ ملاحظہ کیجیے۔

"افسوس ہے کہ ہمارے ملک میں اب تک زبانوں کی تحصیل کی طرف خاطر خواہ دھیان نہیں دیا گیا۔ ہم نہ روسی سیکھنا چاہتے ہیں، نہ چینی، نہ جاپانی، اور دعویٰ یہ رکھتے ہیں کہ ہم ہر زبان بول سکتے ہیں اور ہمارے ہاں مصوّتے اور مصمّتے سب زبانوں سے زیادہ ہیں۔

عربی و فارسی پہلے خاصی مقبول زبانیں تھیں، اب اسکولوں اور کالجوں میں ان کے پڑھنے والوں کی تعداد بھی گھٹتی جارہی ہے۔ کوئی قوم جو علمی ترقی کی مدعی یا متمنی ہو کلاسکی زبانوں مثلاً لاطینی، یونانی، سنسکرت، عربی سے بے تعلق نہیں رہ سکتی، نہ جدید ترقی یافتہ زبانوں کو پسِ پشت ڈال سکتی ہے، جیسے کہ جرمن، فرانسیسی، روسی، اطالوی، ڈچ وغیرہ۔

ہماری زبان دانی لے دے کر انگریزی تک رہ گئی ہے۔ انگریزی بہت کچھ ہے، مگر سب کچھ نہیں۔ حد یہ ہے کہ ہمارے تعلیمی اداروں میں الاّ ماشاءَ اللہ اپنی قومی و علاقائی زبانوں کی تعلیم کا بھی نہ تو انتظام ہے، نہ شاید اس کے طلب گار۔

مختلف ممالک کے ساتھ جو ثقافتی معاہدے یا مشترک ثقافتی ادارے ہیں، ان سے بھی کوئی ٹھوس نتائج برآمد نہیں ہوئے۔ یہ ہماری کم ذوقی کی دلیل ہے۔”

( اردو زبان کے ممتاز ماہرِ لسانیات، محقق، نقّاد اور مترجم شان الحق حقّی کے مضمون ‘زبان اور تعلیمِ زبان’ سے اقتباس۔ یہ مضمون 1966ء میں لکھا گیا تھا۔)

شان الحق حقّی اردو زبان و ادب کا روشن حوالہ ہیں‌ جنھوں‌ نے اپنی تخلیقات اور علم و ادب کے لیے اپنی خدمات سے بڑا نام و مقام بنایا۔

ہر حساس طبع، تعلیم یافتہ اور ذی شعور پاکستانی کی طرح ان کی نظر میں بھی اجتماعی ترقّی و خوش حالی کا واحد ذریعہ تعلیم کا فروغ اور خواندہ معاشرہ رہا ہے اور اس حوالے سے ناکامی اور بعض خرابیوں پر نہ صرف حکومت بلکہ اساتذہ کو بھی ذمہ دار قرار دیتے ہوئے کئی اہم اور قابلِ غور پہلوؤں پر بات کی ہے۔

ممتاز شاعر، ادیب، ماہرِ لسانیات، محقّق، نقّاد اور مترجم شان الحق حقّی نے مارچ 1967ء میں ‘اردو نامہ’ کے افتتاحیہ پر نظامِ تعلیم اور اساتذہ سے متعلق اپنے خیالات کا اظہار کچھ کیوں کیا تھا:

"ہمارا غریب ملک استادوں کو گزارے بھر تنخواہ نہیں دے سکتا، مگر ان کی عزّت اور مرتبے کو ضرور بحال کر سکتا ہے۔ انسان کو زندگی میں قوّت کی ہوس ہوتی ہے جس کے عام مترادف دولت و اقتدار ہیں۔

یہ اگر نہ ہوں تو محبّت ہی سے ان کی تلافی ہوسکتی ہے۔ استاد کی عزّت وہ تعلیم ہے جو ہمارے بچّے بنیادی عقائد و آداب کے ساتھ اپنے گھر ہی سے سیکھ سکتے ہیں۔ اس کو ہمارے معاشرے کے بنیادی اصول میں داخل ہونا چاہیے، پھر یہ ممکن ہو جائے گا کہ اساتذہ بھی اپنے مرتبے کی شرم رکھیں۔”

"فی الوقت اس طبقے کے بعض بعض افراد زبوں حالی سے زیادہ جس قسم کی زبوں کاریوں میں مبتلا ہیں ان کو دیکھتے ہوئے علم کا مستقبل اس ملک میں تاریک دکھائی دیتا ہے۔ جو استاد طالبِ علموں کے ساتھ انصاف نہ کرسکیں، جو اس اختیار کو جو انھیں طلبہ کی قسمت پر حاصل ہے رشوت خور اہل کاروں یا اقربا پرور عہدے داروں کی طرح برتیں، جو اپنے علم سے زیادہ اپنی متاع کی نمائش کریں جس میں ان کا شاگردوں سے چوٹ کھا جانا لازمی ہے، وہ اپنے منصب کی عزّت کو کیسے قائم رکھ سکتے ہیں۔”

"ان پر دنیوی و سیاسی دباؤ کیونکر نہ پڑیں گے۔ ان کے کردار میں جان نہ ہو گی تو ان کی آواز میں کیا جان ہو گی، اور ان کے وہی شاگرد جو ان کے لیے ذریعۂ قوّت ہو سکتے تھے، وہ ان سے بے پروا، بد دل اور گستاخ کیوں نہ ہوں گے۔”

آج، دورِ جدید میں جہاں صرف لڑکوں ہی نہیں‌، لڑکیوں کے لیے بھی اعلیٰ مدارج تک حصولِ تعلیم کو ضروری سمجھا جانے لگا ہے، اور ان کا گھروں سے باہر کمانے کے لیے جانا، سرکاری و نجی اداروں میں‌ ملازمت، حتٰی کہ تجارتی مراکز میں دکان لے کر بوتیک، بیوٹی پارلر چلانا یا اسی قسم کی کاروباری سرگرمیاں انجام دینا بھی عام ہو گیا ہے، بالکل اسی طرح لڑکیاں کالجوں اور جامعات میں سائنس و فنون کے مضامین کے علاوہ تیکنیکی مہارت کے ان شعبوں میں‌ بھی زیرِ تعلیم ہیں‌ جن میں‌ کل تک صرف لڑکے ہی داخلہ لیتے تھے۔

دنیا بدل گئی ہے، اور ہمارا معاشرہ چند دہائیوں کے دوران بڑی تبدیلیوں سے گزرا ہے اور گزر رہا ہے، لیکن جہاں آج کی عورت خاصی حد تک اپنے معاملات میں آزاد اور خودمختار ہوئی ہے، وہیں‌ چاہے لڑکے ہوں یا لڑکیاں‌، ان کی تربیت اور کردار سازی بہت اہم ہے اور اسے نظرانداز نہیں‌ کیا جاتا۔

کہتے ہیں ایک اچّھی، خوش گوار اور باعزّت زندگی، اچھی تعلیم وتربیت ہی کی مرہونِ منت ہے۔ آج بھی لڑکی جب بیاہ کر دوسرے گھر جاتی ہے تو جہاں اس کی تعلیم، اور دوسری اوصاف کو دیکھا جاتا ہے، وہیں‌ کل کی طرح آج بھی اس کا رکھ رکھاؤ، قرینہ سلیقہ، اندازِ گفتگو اسے دل جیتنے میں مدد دیتا ہے۔ اس تناظر میں‌ پیشِ نظر سطور سے آپ جان سکیں‌ گے کہ دہائیوں‌ پہلے تعلیمی ادارے کس طرح لڑکیوں‌ کو اعلیٰ‌ تعلیم سے بہرہ مند کرنے کے ساتھ ان کی تربیت اور کردار سازی پر زور دیتے تھے۔

"انٹر تک ہم وحیدیہ ہوسٹل میں رہتے تھے جس کی عمارت ایک نیم دائرے کی شکل میں تھی۔ اِدھر اُدھر کمرے کے بیچ میں ایک بڑا سا ڈائننگ ہال، جس کی دیواروں پر اور متفرق تصاویر کے ساتھ پاپا میاں اور اعلیٰ بی کی تصویریں بڑے بڑے فریموں میں آویزاں تھیں۔ یہ بانیِ کالج شیخ عبداللہ اور ان کی بیگم وحید جہاں کی تصویریں تھیں۔

کالج کی لڑکیاں بھی انھیں اسی نام سے پکارتی تھیں جس نام سے ان کے بچّے پکارتے ہوں گے۔ وحیدیہ ہوسٹل کا سنگِ بنیاد بھی ان ہی خاتون نے رکھا ہوگا بلکہ اسکول اور کالج کی بنیاد ہی ان نیک دل میاں بیوی نے ڈالی تھی اور اس پاکیزہ مقصد کے لیے شانہ بہ شانہ سعی و عمل میں گرفتار بے غرضانہ زندگی بسر کی تھی۔

ان روشن دل خاتون کی ہلکی سی مسکراہٹ، دل کی طرح آنکھیں بھی غیر معمولی روشن آنکھیں تھیں، لبوں پر خفیف سی مسکراہٹ اور دونوں کے چہرے کی پاکیزگی اور معصومیت آج بھی میری آنکھوں میں ہے۔

سُنا ہے جب یہ ڈولی میں بیٹھ کر لڑکیوں بچّیوں کو اسکول تک لانے کے لیے ان کے گھروں تک جاتی تھیں تو قدامت پسند لوگ راستے میں ان کی ڈولی پر ڈنڈے برساتے تھے۔ بعد میں سنا ہے کہ ڈولی کی جگہ بیل گاڑی نے لے لی تھی۔

ان کی وسیع و عریض کوٹھی "عبداللہ لاج” چند قدم کے فاصلے پر تھی، مگر کئی لاوارث لڑکیاں جو ہوسٹل میں مقیم تھیں وہ شب و روز ان ہی کے زیرِ سایہ رہتی تھیں۔ یہ ان کے لیے کھانا پکواتیں اور ان کے ساتھ ہی کھاتی تھیں۔ ان کے لباس، نہانے دھونے، کنگھی چوٹی کی فکر رکھتیں اور ان کو زندگی بسر کرنے کے گُر سکھاتیں۔

زندگی کا جو سانچا وہ مقرّر کر گئی تھیں، وہاں کی لڑکیوں کی تربیت اسی ڈھب پر ہوتی رہی۔ اب کا حال خدا جانے مگر یہاں پاکستان میں اکثر نے مجھ سے یہ سوال کیا کہ "علی گڑھ کی پڑھی ہوئی لڑکیاں سب ایک جیسی کیوں ہوتی ہیں! وہی ایک سا سلجھا ہوا انداز، قدیم و جدید کا ایک مناسب امتزاج، ہوش مند مگر اتنی سادہ کہ انداز سے بالکل گھریلو لگتی ہیں۔”

سچ کہا بالکل درزی کی سوئی، موٹے مہین سے یکساں گزرنے والی۔ یہ اعلیٰ بی کی تربیت تھی جو نسلاً بعد نسل منتقل ہوتی رہی۔ چناں چہ وہاں کی تربیت یافتہ لڑکیوں کا قرینہ ایک سا ہی رہا۔”

(سلمیٰ شان الحق حقی کی کتاب ‘شہیدانِ وفا کا خوں بہا کیا’ سے اقتباس)