لاہور: بھارتی جیل میں جنونی قیدیوں کے ہاتھوں شہید ہونے والے پاکستانی شاکر اللہ کی میت واہگہ بارڈر پر پاکستان کے حوالے کر دی گئی۔
تفصیلات کے مطابق بھارتی شہر جے پور کی جیل میں قتل کیے گئے پاکستانی قیدی شاکراللہ کی میت پاکستان پہنچ گئی ہے، پاکستانی شہری کی میت واہگہ بارڈر پر پاکستانی حکام کے حوالے کی گئی۔
بھارتی ریاست راجھستان کے مرکزی شہر جے پور کی جیل میں قید پاکستانی شہری شاکر اللہ کو بھارتی جنونی قیدیوں بد ترین تشدد کر کے 20 فروری کو قتل کیا تھا۔
جے پور سینٹرل جیل کے بیرک میں موجود ہندو انتہا پسندوں نے پاکستانی شہری کے سر پر وار کیے تھے جس کی وجہ سے شاکر اللہ کو گہرے زخم آئے اور انھوں نے جیل ہی میں جان دے کر شہادت کا درجہ پا لیا۔
غیر ملکی میڈیا نے پاکستانی قیدی کی شہادت کا ذمہ دار جے پور جیل کی انتظامیہ کو قرار دیا، قتل کے سلسلے میں تحقیقات کی جا رہی ہیں۔
یہ بھی پڑھیں: پلوامہ حملے کا انتقام، بھارتی جیل میں قید پاکستانی قیدی ہندو انتہا پسندوں کے ہاتھوں قتل
دفترِ خارجہ نے شاکر اللہ کے قتل پر سخت دکھ کا اظہار کرتے ہوئے کہا تھا کہ بھارتی قیدیوں کے گروپ نے پلوامہ حملے کا انتقام لینا چاہا ہے۔
بھارت میں سفارتی ذمہ داریاں انجام دینے والے سابق سفیر عبد الباسط کا کہنا تھا کہ عوام کو کچھ نہیں کہہ سکتے کیوں کہ بھارتی حکومت کا مؤقف ہی دہشت گردی اور انتہا پسندی پر مبنی ہے۔
