ARYNews.tv | Urdu – Har Lamha Bakhabar

Tag: شاہد آفریدی

  • میاں داد کے خلاف بیان دینے پرافسوس ہے، شاہد آفریدی

    میاں داد کے خلاف بیان دینے پرافسوس ہے، شاہد آفریدی

    کراچی: پاکستانی آل راؤنڈر شاہد آفریدی نے کہا ہے کہ جاوید میاں داد کرکٹ کے لیجنڈ ہیں لیکن وہ ایک عرصے سے میری ذاتیات پر حملے کررہے تھے جس پر جواب دیا تاہم سنیئر کے بارے میں غلط بیان دینے پر افسوس ہے۔

    ان خیالات کا اظہار انہوں نے سماجی رابطے کی ویب سائٹ پر اپنے ٹوئٹ کے ذریعے کیا۔ شاہد آفریدی کا کہنا تھا کہ ’’میاں داد کرکٹ کے لیجنٹ ہیں مگر وہ ایک عرصے سے میری ذاتیات پر حملے کررہے تھے، اُن کو ایک عرصے تک برداشت کیا مگر ہر چیز کی ایک حد ہوتی ہے‘‘۔

    شاہد خان آفریدی نے اپنے متنازعہ بیان پر نادم ہوتے ہوئے کہا کہ ’’جاوید میاں داد کرکٹ کے لیجنٹ ہیں ، سینئر کے خلاف جو کچھ کہا مجھے اُس پر دل سے افسوس ہے‘‘۔ انہوں نے مزید کہا کہ مسلسل تلخ رویہ کے باعث مجبو ری میں جواب دیا تھا‘‘۔

    قبل ازیں شاہد آفریدی نے پریس کانفرنس کرتے ہوئے لیجنڈ کرکٹر پر الزام عائد کیا تھا کہ ’’جاوید میاں داد کو پیسوں کی فکر رہتی ہے، عمران خان اور اُن میں بس یہی فرق ہے‘‘۔

    بعد ازاں لیجنڈ کرکٹر نے لالہ کی پریس کانفرنس پر ردِ عمل دیتے ہوئے کہا کہ ’’شاہد آفریدی پیسوں کی خاطر کچھ بھی کرسکتے ہیں اسی وجہ سے وہ بار بار الوداعی میچ کھیلنے کی خواہش ظاہر کررہے ہیں‘‘۔

    انہوں نے مزید کہا کہ ’’شاہد آفریدی کی مارکیٹ ختم ہوگئی ہے اس لیے اب انہیں کوئی نہیں پوچھ رہا، کرکٹ میں کھلاڑی کو پرفارمنس کی بنیاد پر ٹیم میں شامل کیا جاتا ہے تاہم اگر آفریدی اس میں ناکام رہے اور سنیئرز پر الزام عائد کریں تو یہ بات سمجھ سے بالا تر ہے‘‘۔

    سابق ٹی ٹوئنٹی کپتان کی جانب سے لیجنڈ کرکٹر پر لگائے جانے والے الزام کے بعد سماجی رابطے کی ویب سائٹ پر شاہد آفریدی پر میاں داد کے مداحوں کی جانب سے شدید تنقید کی گئی جس پر آفریدی نے اپنی غلطی کا اعتراف کرتے ہوئے ٹوئٹ کے ذریعے دیے گئے بیان پر افسوس کا اظہار کیا۔

    آفریدی کے بیان پر کرکٹ کے مداحوں کا ردعمل

  • شاہد آفریدی کیلئے جو ہوسکا ضرور کرینگے، نجم سیٹھی

    شاہد آفریدی کیلئے جو ہوسکا ضرور کرینگے، نجم سیٹھی

    لاہور : پی سی بی ایگزیکٹیو کمیٹی کے چیئرمین اور پاکستان سپر لیگ کے چیئرمین نجم سیٹھی نے کہا ہے کہ ہم آفریدی کیلئے جو ہو سکا کریں گے لیکن سب کچھ ڈسٹرب کرکے آفریدی کو ٹیم میں شامل نہیں کیاجاسکتا۔

    ان خیالات کا اظہار انہوں نے باغ جناح لاہور میں میڈیا سے گفتگو کرتے ہوئے کیا۔ نجم سیٹھی نے کہا کہ پی ایس ایل کی ڈرافٹنگ 19 اکتوبر کو ہوگی، ایونٹ کا فائنل لاہور میں کرانے کی کوشش کررہے ہیں.

    انہوں نے کہا کہ اس سلسلے میں وزیراعلیٰ پنجاب سے بات ہوگئی ہے،انتطامیہ سے بھی بات چل رہی ہے،غیر ملکی کھلاڑیوں سے لاہور میں فائنل کھیلنے کیلئے بات چیت جاری ہے، فارم میں یہ بات لکھ دی گئی تھی کہ پی ایس ایل کا فائنل لاہور میں ہی ہوگا، ہماری تیاریاں جاری ہیں۔

    مزید پڑھیں : پاکستان سپر لیگ چار فروری سے دوہا میں ہوگی، نجم سیٹھی

     چیئرمین پی ایس ایل نے بتایا کہ پاکستان کرکٹ بورڈ کے "بڑے” نے یہ بھی کہا کہ شاہد آفریدی اسٹار ہیں انہیں اچھی طرح الوداع کرنے کی پلاننگ کر رہے ہیں۔ شاہد آفریدی سے بڑا اسٹار پاکستان میں نہیں ہے اسے عزت کے ساتھ رخصت کریں گے۔

    مزید پڑھیں : الوداعی میچ کھیلنا میرا حق ہے، شاہد آفریدی

     بھارت کے حوالے سے ایک سوال کے جواب میں نجم سیٹھی کا کہنا تھا کہ آئی سی سی میٹنگ میں پوری تیاری کے ساتھ جائیں گے بلکہ روایتی حریف کو مزہ بھی چکھائیں گے۔

     

  • شاہد آفریدی کا ٹی ٹوئنٹی کرکٹ سے کنارہ کشی کافیصلہ

    شاہد آفریدی کا ٹی ٹوئنٹی کرکٹ سے کنارہ کشی کافیصلہ

    کراچی:پاکستان کرکٹ ٹیم کے سابق کپتان شاہد آفریدی نے متحدہ عرب امارات میں ویسٹ انڈیز کے خلاف سیریز میں الوداعی میچ کھیل کر ٹی ٹوئنٹی کرکٹ سے کنارہ کشی کا ارادہ ظاہر کردیا۔

    تفصیلات کے مطابق شاہد آفریدی نے پاکستان کرکٹ بورڈ سے ویسٹ انڈیز کے خلاف سیریز میں ایک میچ کھیلنے کی اجازت طلب کی ہے جس کے بعد وہ بین الاقوامی کرکٹ کو خیرباد کہہ دیں گے۔

    ذرائع کا کہنا ہے کہ شاہد آفریدی نے اس موضوع پر چیف سلیکٹر انضمام الحق سے بات کی اور عزت کے ساتھ اپنے کرکٹ کو الوداع کہنے کی اپنی خواہش کا اظہار کردیا ہے۔

    قومی ٹیم ویسٹ انڈیز کے خلاف سیریز میں تین ٹی ٹوئنٹی میچز کھیلے گی جس کا آغاز 23 ستمبر کو ہوگا۔

    خیال رہے کہ شاہد آفریدی نے پاکستان کی جانب سے سب زیادہ 98 ٹی ٹوئنٹی میچ کھیلے ہیں جس میں 18 کی اوسط سے ایک ہزار 405 رنز بنا ئے ہیں۔

    آفریدی ٹی ٹوئنٹی کرکٹ میں سب سے زیادہ وکٹیں لینے والے باؤلر بھی ہیں جہاں انھوں نے 97 وکٹیں حاصل کی ہیں جبکہ عمرگل 60 اور سعید اجمل 64 میچوں میں 85، 85 وکٹیں حاصل کر کے دوسرے نمبر پر ہیں۔

    یاد رہے کہ شاہد آفریدی نے ورلڈ کپ 2015 میں شکست کے فوری بعد ایک روزہ کرکٹ سے ریٹائرمنٹ کا اعلان کیا تھا۔

    واضح رہے متحدہ عرب امارات میں ویسٹ انڈیز کے خلاف ٹی ٹوئنٹی سیریز کے بعد پاکستان ٹیم اگلے ایک سال تک کوئی ٹی ٹوئنٹی میچ نہیں کھیلے گی۔

  • ٹیلنٹ موجود ہے،ٹیلنٹ کو تلاش کرنے اور آگے لانے کی ضرورت ہے،رمیز راجہ

    ٹیلنٹ موجود ہے،ٹیلنٹ کو تلاش کرنے اور آگے لانے کی ضرورت ہے،رمیز راجہ

    لاہور: ممتاز کمینٹیٹراور پاکستان کرکٹ ٹیم کے سابق کپتان رمیز راجہ کا کہنا ہے کہ پاکستان میں ٹیلنٹ موجود ہے،ضرورت ایسے لوگوں کی ہے جو اس ٹیلنٹ کو تلاش کرکے نکھار سکیں

    شاہد آفریدی کے انٹرویو کے درمیان متنازعہ بیان نے ملک میں ایک نئی بحث چھیڑ دی ہے،ماہرین کرکٹ دو واضح گروپ میں تقسیم ہوگئے ایک شاہد آفریدی کی تائید میں جب کہ دوسرا گروپ اس صورتِ حال کا ذمہ دار شاہد آفریدی کو ٹہراتے ہوئے کافی برہم نظر آتا ہے۔

    اس حوالے سے معروف کرکٹ کمینٹیٹر اور پاکستان کے ممتاز سابقہ اوپنر بیٹسمین رمیز راجہ نے کہا کہ اگر ٹیلنٹ نہیں ہے تو اس کی بھی وجوہات ہیں اور اگر ٹیلنٹ ہے مگر آگے نہیں آپارہا تو اس کی بھی وجوہات ہیں دونوں صورتِ حال میں پاکستان کرکٹ بورڈ کے کرتا دھرتا ذمہ دار ہیں۔

    پاکستان کرکٹ ٹیم کے سابق کپتان رمیز راجہ نے اس موقع پر تجویز دی کہ اچھے ٹیلنٹ کی تلاش کیلئے گراس روٹ لیول پر ایسے لوگوں کو ذمہ داریاں دی جائیں جو ٹیلنٹ دیکھنے کی صلاحیت رکھتے ہوں اور ٹیلنٹ کو نکھار کر آگے لا سکیں۔

    رمیز راجہ نے واضح کیا کہ ٹیلنٹ کو تلاش کرنے کیلئے نچلی سطح پر بہتر اقدامات کرنے کی ضرورت ہے اور ایسے لوگوں کو ذمہ داریاں دینے کی ضرورت ہے جو میرٹ پر انتخاب کر سکیں،15 سے 20 سال ہو گئے ہیں لیکن اب تک کرکٹ ٹیم میں شامل 4 سے 5 کھلاڑیوں کا متبادل نہیں مل سکا۔

    اگر اسکول کی سطح پر نظام بہتر کیا گیا ہوتا ہے اور ڈومیسٹک لیول سے ٹیلنٹ کو تلاش کر کے انہیں مستقبل کیلئے تیار کیا گیا ہوتا تو آج پاکستان کرکٹ ٹیم کو مشکلات کا سامنا نہ ہوتا۔

  • پاکستان میں ٹیلنٹ نہیں ہے،شاہد آفریدی

    پاکستان میں ٹیلنٹ نہیں ہے،شاہد آفریدی

    لاہور: ٹی ٹونٹی ٹیم کے سابق کپتان آل راونڈر شاہد خان آفریدی کہتے ہیں کہ معذرت کے ساتھ پاکستان میں ٹیلنٹ نہیں ہے.

    تفصیلات کے مطابق شاہد خان آفریدی نے انٹرویو میں کہا کہ معذرت کے ساتھ پاکستان میں ٹیلنٹ نہیں ہے،انہوں نے کہا کہ خواتین مردوں سے زیادہ مشکل حالات میں کرکٹ کھیل رہی ہیں.

    اُن کا کہنا تھا کہ اس وقت ان کے پاس سینٹرل کنٹریکٹ ہے لہٰذا اگر وہ کچھ کہیں گے تو انھیں نوٹس مل جائے گا اس لیے وہ مناسب وقت پر بات کریں گے لیکن پاکستان کرکٹ بورڈ میں بہت کچھ ٹھیک ہونا ہے.

    شاہد آفریدی نے ریٹائرمنٹ پر بات کرتے ہوئے کہا پہلے اُن کا ارادہ تھا کہ ایک اچھی ٹیم بنا کر ریٹائر ہوں لیکن ایسا نہیں ہو سکا پھر انھوں نے فیصلہ کیا کہ اگر موجودہ ٹیم کے کھلاڑی کھیل سکتے ہیں تو میں ان سے ابھی بھی بہتر ہوں.

    ان کا کہنا تھا میں کبھی بھی اپنے آپ کو ٹیم کے اوپر بوجھ رکھ کر کھیلا ہی نہیں ہوں مجھے اللہ تعالی نے بڑی عزت سے کھلایا ہے،عزت سے ہی کھیلوں گا اور عزت ہی سے کرکٹ چھوڑوں گا.

    واضح رہے کہ ٹی ٹونٹی ٹیم کے سابق کپتان آل راونڈر شاہد خان آفریدی کا کہنا تھا کہ کپتانی اس لیے چھوڑ دی کیونکہ ایک کھلاڑی کی حیثیت سے میں ابھی بھی ان سے بہت بہتر ہوں.

  • شاہد آفریدی نے پشاور زلمی چھوڑنے کا اشارہ دے دیا

    شاہد آفریدی نے پشاور زلمی چھوڑنے کا اشارہ دے دیا

    لندن : پاکستان کے سابق آل راونڈر اور ٹی ٹونٹی ٹیم کے کپتان شاہد آفریدی نے پاکستان سپرلیگ کی فرنچائز پشاورزلمی کو خیرباد کہنے کا اشارہ دے دیا۔

    ان کا کہنا ہے کہ پشاور زلمی مستقل ٹیم نہیں ہے کسی بھی فرنچائز نےآفر کی تو دستیاب ہوں گا، صرف پشاور زلمی کی طرف سے کھیلنے کیلئے محدود نہیں۔

    بوم بوم آفریدی نے پی ایس ایل کے دوسرے ایڈیشن میں پشاور زلمی کو گڈبائے کہنے کا عندیہ دےدیا۔ غیرملکی ویب سائٹ کو انٹرویودیتے ہوئے آفریدی نےکہا کہ پروفیشنل کرکٹرہوں، ایسا نہیں کہ صرف پشاورزلمی کی طرف سے کھیلتا رہوں، کسی بھی فرنچائز نےاچھی آفر کی تو ضرور سوچوں گا۔

    انہوں نے کہا کہ پشاورزلمی کے ساتھ آگے بڑھنے سے پہلے اونرسے کچھ باتیں طے کرنا ہونگی۔ کچھ چیزیں ہیں جنہیں ٹھیک ہونے کی ضرورت ہے۔

    شاہد آفریدی نے کہا کہ گذشتہ دو سے تین سال بگ بیش لیگ کی پیشکش ٹھکرا رہا ہوں۔ اس سال آفر آئی تو قبول کرلوں گا۔ آفریدی نے کہا کہ ابھی میری کرکٹ ختم نہیں ہوئی۔ مختصر فارمیٹ میں پاکستان سمیت دنیا بھرکی ٹی ٹوئنٹی لیگ کھیل سکتا ہوں۔

    واضح رہے کہ زلمی کے اونر جاوید آفریدی اور شاہد آفریدی میں اختلافات شدت اختیار کر گئے تھے۔

     

  • شاہد آفریدی اسپیشل بچوں کے ساتھ باسکٹ بال کھیلنے پہنچ گئے

    شاہد آفریدی اسپیشل بچوں کے ساتھ باسکٹ بال کھیلنے پہنچ گئے

    کراچی: ٹی ٹونٹی کرکٹ ٹیم کے سابق کپتان شاہد خان آفریدی نے ذہنی معذور بچوں کے ادارے آغوش چلڈرن ہائیر اسکول کا دورہ کر کے مخصوص بچوں کے ساتھ وقت گزارا اور باسکٹ بال کھیلی۔

    تفیصلات کے مطابق شاہد آفریدی اور ان کی فاؤنڈیشن کے اسکول پہنچنے پر وہاں موجود مخصوص بچوں کے چہرے خوشی سے کھل اٹھے، اس موقع پر سابق کپتان نے نیلا چشمہ، سفید ٹی شرٹ اور براؤن رنگ کا ٹراوزر پہنا ہوا تھا۔


    یہ دورہ شاہد آفریدی فاؤنڈیشن کی جانب سے تعلیم کی حمایت اور فروغ دینے کے حوالے سے شروع کی جانے والی مہم کا حصہ تھا۔
    مہم کے ذریعے ملک کے مخیّر طبقے میں یہ پیغام پہنچایا جارہا ہے کہ  غربت کے باعث تعلیم حاصل نہ کرنے والے بچوں کی تعلیم کے انتظامات اور ملک میں تعلیم کے فروغ سے ہی بہتر ین پاکستان بنایا جاسکتاہے۔

    اس موقع خصوصی بچوں نے پاکستان اور سابق کپتان کے ساتھ اپنی محبت کا اظہار کرتے ہوئے ’’پاکستان زندہ باد‘‘ اور ’’شاہد آفریدی زندہ باد‘‘ کے نعرے لگائے، طالب علموں کی جانب سے شاہد آفریدی کے لیے خصوصی طور پر ٹیبلو پیش کیاگیا۔

    شاہد آفریدی نے اسکول میں موجود بچوں کے حوصلے بلند کرنے کے لیے ان کے ساتھ باسکٹ بال کھیلی اور بچوں کو آٹو گراف بھی دیے۔

    لالہ کے اس ارادے سے ملک میں تعلیمی نظام کو بہتر بنانے اور اس کے فروغ میں تبدیلی لائی جاسکتی ہے۔

    واضح رہے دورہ انگلینڈ کے لیےپاکستانی کرکٹ ٹیم اس وقت تربیتی کیمپ میں مصروف ہے اور آفریدی کو اس دورے کے لیے انجری کے باعث منتخب نہیں کیا گیا، تاہم اس موقع پر آفریدی کو لنگڑاتے ہوئے چلتے دیکھا گیا جس سے واضح ہوتا ہے کہ ان کے کھٹنے میں انجری کا مسئلہ درپیش ہے۔

     

  • دورہ انگلینڈ : شاہد آفریدی، احمد شہزاد اورعمراکمل ٹیم سےڈراپ کردیا گیا

    دورہ انگلینڈ : شاہد آفریدی، احمد شہزاد اورعمراکمل ٹیم سےڈراپ کردیا گیا

    لاہور : قومی ٹیم کے چیف سلیکٹر انضمام الحق نےشاہد آفریدی، احمد شہزاد اورعمراکمل کودورہ انگلینڈ کے لئے ابتدائی ٹیم سےڈراپ کردیا ہے۔ انضمام الحق کا کہنا ہے کہ ڈسپلن پر اب کوئی سمجھوتہ نہیں ہوگا۔

    تفصیلات کے مطابق بگڑے بچےعمراکمل اوراحمد شہزاد کوباربارڈسپلن کی خلاف ورزی کرنا مہنگاپڑگیا۔ پانی سرسےگزراتو نئےچیف سلیکٹرنےاینگری بوائے اورسیلفی بوائے پربجلی گرادی۔

    چیف سلیکٹر انضمام الحق نے سابق ٹی 20 کپتان شاہد آفریدی، احمد شہزاد اورعمراکمل کو دورہ انگلینڈ سے نکال دیا، لاہورمیں پریس کانفرنس سے خطاب کرتے ہوئے قومی ٹیم کے چیف سلیکٹر انضمام الحق نے واضح طور پر کہہ دیا کہ ڈسپلن پر کوئی سمجھوتانہیں کیا جائے گا۔

    انضمام نے واضح کیا کہ بورڈ نے ان دونوں کے خلاف کارروائی کی۔ عمر اکمل اور احمد شہزاد دونوں کا ماضی میں ریکارڈ خراب رہا ہے اورسابق کوچ نے بھی ان کی شکایات کیں۔

    پریس کانفرنس سے خطاب کرتے ہوئے شاہد آفریدی کے حوالے انضمام الحق کا کہنا تھا کہ اگلے 14 مہینے یا رواں سال ہم نے 4 ٹورز کرنے ہیں اور اس دوران 6 ٹی 20 میچز کھیلنے ہیں اس لئے میرا ماننا ہے کہ نئے لڑکوں کوسامنے لے کر آیا جائے اگر شاہد آفریدی اچھی پرفارمنس دے گا تو اسے ضرور آگے لے کر آئیں گے۔

    ان کا کہنا تھا کہ دورہ انگلینڈ کے لئے تربیتی کیمپ 14 مئی سے 4 جون تک ایبٹ آباد میں لگے گا جس میں کھلاڑیوں کی فٹنس پر بھرپور توجہ دی جائے گی لیکن ڈسپلن کی خلاف ورزی پر کوئی رعایت نہیں ہوگی۔

    یاد رہے کہ عمر اکمل کا حیدرآباد میں ڈانس پارٹی اسکینڈل، ٹریفک وارڈن سے جھگڑا اورفیصل آباد میں پنجابی اسٹیج شوکے دوران تنازعہ زیادہ پرانی بات نہیں۔ پھر عمران خان سے سابق کوچ کی شکایت بھی خلاف ورزی شمارہوئی۔

    سیلفی بوائےکانام بھی ریکارڈزمیں کم اورتنازعات میں زیادہ لیاجاتا ہے۔ احمدشہزاد کابلاکم اور زبان زیادہ چلتی ہے۔

    دلشان سےمذہبی تنازعہ، ساتھی کرکٹرویاب ریاض سےلڑائی اورڈریسنگ روم کا شیشہ توڑنا، آئےروزتنازعات میں ان رہنےوالےپی سی بی کے بگڑےبچےاب گڈبکس سے ہی نہیں ٹیم سے بھی نکل گئے۔

     

  • بوم بوم شاہد آفریدی نے ٹی ٹوئنٹی کی کپتانی چھوڑنے کا اعلان کردیا

    بوم بوم شاہد آفریدی نے ٹی ٹوئنٹی کی کپتانی چھوڑنے کا اعلان کردیا

    کراچی: شاہد آفریدی نے ٹی ٹوئنٹی کی کپتانی چھوڑنے کا اعلان کردیا تاہم وہ بطور کھلاڑی ٹیم کیلئے دستیاب ہوں گے ۔

    قومی ٹی ٹوئنٹی ٹیم کے کپتان شاہدآفریدی نے کپتانی چھوڑنے کااعلان کردیا، قومی ٹیم کی بدترین کارکردگی پرقوم سے معافی مانگنے والےآفریدی نے ٹوئٹرپرقیادت چھوڑنے کا باقاعدہ اعلان کیا۔

    آفریدی نے کہاکہ اپنی مرضی سے کپتانی چھوڑ رہاہوں، بحیثیت کھلاڑی ٹیم کیلئے دستیاب رہوں گا۔

    آفریدی نے ٹوئٹرپر پیغام دیاکہ پاکستان کی کپتانی کرنااعزازکی بات ہے، پی سی بی اورشہریارخان کاشکرگزارہوں، جنھوں نے کپتانی کاموقع دیا، دنیا بھر میں ہونے والی لیگز میں حصہ لیتارہوں گا۔

    ٹوئٹرپرپریس ریلیزجاری کرنے کے بعد آفریدی نے شکریہ پاکستان کا پیغام بھی لکھا، ایشیاکپ اورورلڈٹی ٹوئنٹی میں وقت سے پہلے باہرہونے پرآفریدی کی کپتانی پرسوالات اٹھائے گئےتھے، ہیڈ کوچ اورٹیم منیجرنے رپورٹ میں شکست کاملبہ آفریدی پرگرایاتھا۔

    واضح رہے کہ بوم بوم آفریدی نے سات سال قبل پاکستان ٹی ٹوئنٹی ٹیم کی باگ ڈور سنبھالی، عروج و زوال کے اس سفر میں گرین شرٹس کو زیادہ تر شکستوں سے دوچار ہونا پڑا اور بدقسمتی سے کامیابی کی شرح کم رہی۔

    شاہد آفریدی کی کپتانی میں پاکستان ٹیم نے تینتالیس میچز کھیلے، تئیس میں ناکامی کے بادل گرین شرٹس پر چھائے رہے، انیس میں کامیابی ملی، ایک میچ برابر رہا۔

    حالیہ ورلڈ ٹی ٹوئنٹی اور اس سے پہلے ایشیا کپ میں پاکستان ٹیم کی شکست کا ملبہ آفریدی پر گرا، قومی ٹیم کے ہیڈ کوچ اور منیجر بھی اپنی رپورٹس میں آفریدی کی قائدانہ صلاحیتوں پر تشویش کا اظہار کرچکےہیں۔

  • ٹیلی فون پر بیان قلمبند، شکست کا اکیلا ذمہ دار نہیں ہوں، شاہد آفریدی

    ٹیلی فون پر بیان قلمبند، شکست کا اکیلا ذمہ دار نہیں ہوں، شاہد آفریدی

    لاہور: قومی ٹی ٹوئنٹی ٹیم کے کپتان شاہد آفریدی نے تحقیقاتی کمیٹی کے روبرو پیش ہونے کے بجائے ٹیلی فون پر بیان قلمبند کروا دیا ہے،ان کا کہنا ہے کہ شکست کے وہ اکیلے ذمہ دار نہیں۔

    ورلڈ ٹی ٹوئنٹی میں خراب کارکردگی، حقائق جاننے کیلئے کپتان آفریدی کو بھی تحقیقاتی کمیٹی نے لاہور طلب کیا، لیکن ذاتی وجوہات کی وجہ سے کپتان نے معذرت کرلی۔

    ٹیلی فون پر بیان قلمبند کراتے ہوئے آفریدی نے دو ٹوک الفاظوں میں کہہ دیا،شکست کہ وہ اکیلے ذمہ دار نہیں،تمام کھلاڑی جیت کیلئے ہی کھیلتے ہیں۔ ناقص پرفارمنس پر وہ بھی افسردہ ہیں۔

    اپنے بیان میں شاہد آفریدی نے سینیر کھلاڑیوں کیجانب سے تعاون نہ کرنے کا بھی شکوہ کیا۔

    واضح رہے کہ شاہد آفریدی سوشل میڈیا کا سہارا لیتے ہوئے پہلے ہی قوم سے معافی مانگ چکے ہیں۔ جس میں انھوں نے کہا کہ وہ صرف پاکستانی قوم کو جوابدہ ہیں۔