قومی ٹیم کے فاسٹ بولر شاہین شاہ آفریدی نے سوئنگ اور آؤٹ سوئنگ گیند میں اپنی کامیابی کا راز بتا دیا۔
پاکستان کرکٹ بورڈ کی جانب سے ٹوئٹر اکاؤنٹ پر شیئر کی جانے والی ویڈیو میں شاہین آفریدی نے اپنی بولنگ، نئی گیند، سوئنگ سِیم اور پَیس سے متعلق اہم باتیں بتائی ہیں۔
شاہین نے کہا کہ نئی گیند کو شروع میں کنٹرول کرنا بہت مشکل ہوتا ہے، اس لیے میں میچ سے قبل اسے ہاتھوں میں محسوس کرنے کے لیے اس سے تھوڑا سا کھیلتا ہوں۔
ان کا کہنا تھا کہ 2019 کے بعد سے میری وائٹ گیند اتنی سوئنگ نہیں ہوتی، میری کوشش ہوتی ہے کہ اگر مجھے تھوڑا سوئنگ اور سِیم ملا تو میں بیٹسمین کو اس سے دھوکا دیتا ہوں، اور اس کے لیے میری کوشش ہوتی ہے کہ پَیس سے گیند کراؤں۔
شاہین آفریدی نے بتایا کہ نئی گیند کے سلسلے میں کبھی آپ کو پچ کی صورت حال مدد دیتی ہے اور کبھی نہیں دیتی، تو اس کے لیے یہ اچھا ہوتا ہے کہ آپ نے اس سے نیٹ میں کافی بولنگ کی ہو، اور میں کافی عرصے سے نئی گیند کے ساتھ کھیل رہا ہوں، کئی میچز کھیلے ہیں نئی گیند کے ساتھ۔
Shaheen on new ball, seam, swing and pace!
Pakistan bowling spearhead @iShaheenAfridi talks about his new ball bowling exploits in the T20 format. #T20WorldCup#WeHaveWeWill pic.twitter.com/APgX6XGVrf— Pakistan Cricket (@TheRealPCB) October 29, 2021
قومی کے فاسٹ بولر نے کہا کہ میری کامیابی کا راز یہی ہے کہ میں وارم اپ میچز اور نیٹ پریکٹس بھی نئی گیند سے کرتا ہوں، اس لیے اس میں میری اکیوریسی اچھی ہے، لیکن میں ابھی بھی سیکھ رہا ہوں، جتنا زیادہ سیکھوں گا ٹیم کے لیے اچھا ہوگا۔
انھوں نے کہا نئے بولرز کو یہ کہنا چاہوں گا کہ جب وہ گیند کرائیں تو ان کی ریسٹ پوزیشن ٹھیک ہو، اور الائنمنٹ اچھی ہو۔
انھوں نے یہ بھی کہا کہ ریڈ اور وائٹ بال میں کافی فرق ہے، سفید گیند ایک اوور کے بعد اتنی سوئنگ نہیں ہوتی، اس لیے اس پر زیادہ پریکٹس کی ضرورت ہوتی ہے، میں خود بھی اس کے لیے پریکٹس کر رہا ہوں، کیوں کہ کنڈیشن ایسی ہے کہ زیادہ شیپ نہیں مل رہی، میری کوشش ہوتی ہے کہ شیپ اچھی ہو، اور سِیم ملے تو شروع میں وکٹ حاصل کرنا آسان ہو جاتا ہے۔
شاہین نے کہا میرے خیال میں اسپنر یا فاسٹ بولر کو اپنی فیلڈ کا پتا ہونا چاہیے کہ اسے کون سی فیلڈ پر بولنگ کرانی ہے، کیوں کہ کپتان پہلے ہی بہت ساری باتیں سوچ رہا ہوتا ہے، تو اس کے لیے آسانی ہو جاتی ہے۔
شاہین شاہ نے مسکراتے ہوئے بتایا کہ میرا کام تو گیند پھینکنا ہوتا ہے، باقی وہ آخر میں کیسے گھومتی ہے، مجھے نہیں پتا، لیکن میری پسندیدہ بولنگ سوئنگ اور آؤٹ سوئنگ ہے، میری یہ دونوں ڈیلیوریز اچھی ہیں، تو جس میں بھی وکٹ ملے، فائدہ ہی ہوتا ہے۔
