بھارت میں شدت پسندوں کے جتھے نے ایک اور مسلمان کی جان لے لی۔
بھارتی میڈیا کے مطابق یہ واقعہ 27 اگست کو چرخی دادری ضلع میں پیش آیا، بھارتی ریاست ہریانہ میں شدت پسند ہندو ٹولے نے مسلمان نوجوان کو گائے ذبح کرنے کے شک میں موت کے گھاٹ اتار دیا۔
بھارتی میڈیا کے مطابق تشدد سے جاں بحق 22 سالہ کے لڑکے کی شناخت صابر ملک کے نام سے ہوئی، وہ بھارت کے مغربی بنگال میں کچرا چنتا تھا۔
سوشل میڈیا پر مسلمان لڑکے پر تشدد کی ویڈیو وائرل ہوئی تو پولیس نے کارروائی کی اور پانچ افراد کو گرفتار کر لیا، گرفتار ملزمان میں ابھیشیک، موہت، رویندر، کملجیت، اور ساحل شامل ہیں۔
ملزمان نے گائے کا گوشت کھانے کے شک میں صابر کو پلاسٹک کی خالی بوتلیں بیچنے کے بہانے ایک دکان پر بلایا جہاں پانچوں نے مل کر متاثرہ کو تشدد کا نشانہ بنایا، جب کچھ لوگوں نے تشدد کرنے سے روکا تو شدت پسند گروہ نے دوسری جگہ لے جاکر اسے دوبارہ مارا پیٹا، جس کے نتیجے میں صابر کی موت ہو گئی۔
بھارتی پولیس کے مطابق اس واقعے میں ملوث پانچ ملزمان کے علاوہ دو نابالغوں کو بھی گرفتار کیا گیا ہے، ان کے خلاف بھارتیہ نیا سنہتا (بی این ایس) کی متعلقہ دفعات کے تحت مقدمہ درج کیا گیا ہے۔
